މަސްވެރިންގެ އަތުން ގަންނަ މަހަށް އަގު ނުދެވޭ މައްސަަލައިގެ ހައްލަކީ ބޭރުގެ މަސް ކުންފުނިތަކުގެ ބޯޓު ފަހަރު ރާއްޖެއަށް އައިސް މަސް ގަތުމުގެ ހުއްދަ ދިނުން ކަމަށް ވިދާޅުވެ، ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހީމް ރަޝީދު މިފްކޯއަށް ވަރަށް ބޮޑަށް ފާޑު ވިދާޅުވެއްޖެ އެވެ.
ސަރުކާރުގެ މަސް ކުންފުނި މިފްކޯއިން މަސްވެރިންނަށް ދޭން ޖެހޭ ފައިސާ ދޫނުކުރާތީ ކަންބޮޑުވުން ފާޅުކޮށް މަރަދޫ ދާއިރާގެ މެމްބަރު ރޮޒައިނާ އާދަމް ހުށަހެޅުއްވި ގަރާރަށް ރައްޔިތުންގެ މަޖިލީހުގެ މިއަދުގެ ޖަލްސާގައި ކުރި ބަހުސްގައި ބޮންޑޭ ވިދާޅުވީ ކުރީގެ ރައީސް އިބްރާހީމް ނާސިރުގެ ވެރިކަމުގައި ޖަޕާނުގެ "ހޯކޯމާރު" ކުންފުނިން ރާއްޖޭގައި މަސްގަތް އިރު މަސްވެރިންނަށް ވަގުތުން ފައިސާ ދިން ކަމަށެވެ.
އެއީ މިހާރު ވެސް އެ ކުންފުންޏާ ބޭރުގެ އެހެން ކުންފުނިތަކަށް ވެސް ކުރެވިދާނެ ކަމެއް ކަަމަށް ދެކެވަޑައިގަންނަވާ ކަމަށް ވެސް އޭނާ ވިދާޅުވި އެވެ.
"[މަސްވެރިންނަށް] ވަގުތުން ފައިސާ ދެވޭނެ ގޮތްތައް އެބަ އޮތޭ، ހޯކޯމާރަށް ދޭންވީނުންތޯ އަނެއްކާ ވެސް، ޖަޕާނުގައި އެހެރީ މަސްކިރާބޯޓުތައް އެހެރީ، ދޫކޮށްލަންވީނުންތޯ އެމީހުންނަށް،" މެމްބަރު ވިދާޅުވި އެވެ.
ސަރުކާރުގެ މަސްކުންފުނި މިފްކޯ އަކީ ކޮރަޕްޝަނުގެ ހާއްޔެއް ކަމަށް ވިދާޅުވެ، އެ ކުންފުނި އުވައިލަން ނުކުންނަން މަސްވެރިންނަށާއި މަސްވެެރިންގެ އާއިލާތަކަށް އޭނާ ގޮވައިލެއްވި އެވެ.
"އެސްޓީއޯއިން، މަސްވެރިންގެ އަތުން ލިބޭ ޑޮލަރުން [މަސް އެކްސްޕޯޓްކޮށްގެން ލިބޭ ޑޮލަރުން] ވިޔަފާރިކޮށްގެން މަސްވެރިންނަށް މިހާ ނިކަމެތިކަން ޖައްސައިގެން [އުޅޭ އިރު] އަސްލު ހަގީގަތުގައި މަސްވެރިން އެބަ ޖެހޭ ނުކުންނަން، ނުކުމެ މިފްކޯ އުވައިލަން،" ބޮންޑެ ވިދާޅުވި އެވެ.
"މެމްބަރުން ގަނަންނަ ސަރުކާރުގައި ލާރި ހުރޭ، މަސްވެރިންނަށް ދޭނެ ލާރިއެއް ނެތް"
މަސްވެރިން ކިރުވި މަހަށް ފައިސާ ދޫނުކުރާތީ ސަރުކާރަށް ފާޑުވިދާޅުވަމުން ބޮންޑޭ ވިދާޅުވީ މަސްވެރިންނަށް ދޭނެ ފައިސާ ނެތް އިރު ސަރުކާރުން ބޮޑެތި އެހެން ހަރަދުތައް ކުރާ ކަމަށެވެ. އެފަދަ އެއް ހަރަދަކީ އޭނާ ވިދާޅުވި ގޮތުގައި މަތިންދާބޯޓްތައް ޗާޓަރުކޮށްގެން ކެމްޕޭނަށް ދަތުރުކުރުމެވެ. ރައްޔިތުންގެ މަޖިލީހުގެ ބައެއް މެމްބަރުން، ސަރުކާރު ހިންގާ ޕީއެންސީއަށް ބަދަލުވީ ފައިސާ ދީގެން ކަމަށް ވެސް އޭނާ ތުހުމަތުކުރެއްވި އެވެ.
"އަޖައިބު އަންތަރީސްވާ ވަރު ކަމެއް ނޫންހޭ، މަސްވެރިންނަށް ދޭނެ ފައިސާއެއް ނެތް، ބޮޑެތި ޗާޓަރު ފްލައިޓްތަކުގައި އެކި ތަންތަނަށް ކެމްޕެއިނަށް ދެވޭ، މިއީ މަސްވެރިން ދައްކާ ވާހައަކީ،" ބޮންޑެ ވިދާޅުވި އެވެ.
ސަރުކާރުން އާއްމުކޮށްފައިވާ މައުލޫމާތު ތަކުގައިވާ ގޮތުން މިފްކޯއިން މަސްވެރިންނަށް ދޭން ޖެހޭ 300 މިލިޔަނަށް ވުރެ ގިނަ ރުފިޔާ ނުދީ އެބަ އޮތެވެ. މާޗް 5، ގެ ކުރިން އެ ފައިސާ ދީ ހަލާސްކުރާނެ ކަމަށް ސަރުކާރުން އަންނަނީ ބުނަމުންނެވެ.
