ދައުލަތުގެ މަސް ކުންފުނި މިފްކޯއަށް ކިރި މަހަށް ފައިސާ ނުދޭތާ ގިނަ ދުވަސްތަކެއް ވުމުން، މިފްކޯގެ ކޫއްޑޫ މަސް ފެކްޓްރީގައި މަސްވެރިން މިއަދު މުޒާހަރާކުރަން ފަށައިފި އެވެ.
ސޯޝަލް މީޑިއާގައި އާއްމުކޮށްފައިވާ ވީޑިއޯތަކުން ފެންނަ ގޮތުގައި މުޒާހަރާކުރާ މަސްވެރިންގެ ޝަކުވާއަކީ އެ މީހުން ކޫއްޑޫއަށް ކިރި މަހަށް ފައިސާ ނުދޭތާ ތިން މަސްދުވަހަށް ވުރެ ދިގުލައިގެން ދިއުމެވެ. އެ ޝަކުވާތަކަށް ކޫއްޑޫގެ އޮފިޝަލުން ޖަވާބެއް ދިން ކަމެއް ނުވަތަ ނޫން ކަމެއް އަދި ނޭނގެ އެވެ.
ފިޝަރީޒް މިނިސްޓަރު އަހުމަދު ޝިޔާމް ރައްޔިތުންގެ މަޖިލީހުގެ ޖަލްސާއެއްގައި މެމްބަރުންގެ ސުވާލުތަކަށް ޖަވާބުދެއްވަމުން މިދިޔަ ހަފުތާގައި ވިދާޅުވެފައިވާ ގޮތުގައި މަސްވެރިންނަށް ދޭން ޖެހޭ 190 މިލިޔަން ރުފިޔާ މިފްކޯއިން ނުދީ އެބަ އޮތެވެ.
އެ ފައިސާ ދިނުމަށް ލޯނެއް ހޯދުމުގެ މަސައްކަތް ކުރަމުން އަންނަ ކަމަށް ވެސް އޭނާ ވިދާޅުވި އެވެ.
ޝިޔާމް ވިދާޅުވީ ނިމިދިޔަ ސަރުކާރުން ފައިސާ ޗާޕުކުރުމާއި މާލީ ޑިސިޕްލިން ގެންގުޅުނު ގޮތުން އެތެރެއިން އަދި ބޭރުން ވެސް ލޯނު ހޯދުމުގައި ގޮންޖެހުން ހުރި ކަމަށެވެ. ނަމަވެސް ސަރުކާރާއި މިފްކޯއިން އެ މަސައްކަތް ކުރަމުންދާ ކަމަށް ވިދާޅުވި އެވެ.
"މަސްވެރިންނަށް ނުދެވި މި ވަގުތަށް 190 މިލިއަނެއްހާ ރުފިޔާ ހުރިކަން ހިސާބުތައް އެބަ ބުނޭ. ސަރުކާރު އަދި މިފްކޯއިން ދަނީ ރައީސުލްޖުމްހޫރިއްޔާގެ އެދިވަޑައިގަތުމަށް ސަވަރިން ގެރެންޓީދީގެން ވެސް ފެސިލިޓީއެއް ހޯދުމުގެ މަސައްކަތް ބާރަށް ކުރަމުން،" ޝިޔާމް ވިދާޅުވި އެވެ.
ދަރަނި އިންތިހާއަށް އިތުރުވެ ރާއްޖެއަށް ދިމާވެފައިވާ މާލީ ދަތިތަކާ ގުޅިގެން ސަރުކާރުން ކުރިއަށްގެންދާ ތަރައްގީގެ މަޝްްރޫއުތައް ނުފެށި ލަސްވާނެ ކަމުގެ އިޝާރާތެއް ރައީސް ޑރ. މުއިއްޒު ވެސް މި މަހުގެ ކުރީކޮޅު ވަނީ ދެއްވައިފަ އެވެ.
ނަމަވެސް އިއްޔެ އިކޮނޮމިކް މިނިސްޓްރީން ބުނެފައިވަނީ މާލީ ދަތިކަމެއް ނެތް ކަމަށެވެ.
އެޑިޓަރުގެ ނޯޓު
ތިޔަ ހުރީ ކޫއްޑޫގައި ހެއްޔެވެ؟ އެ ރަށުގައި ހުރި ނަމަ މަސްވެރިންގެ އިހުތިޖާޖުގެ ވީޑިއޯ، ފޮޓޯ، މައުލޫމާތު "އަދަދު" ނޫހަށް ހިއްސާކޮށް ދެއްވުން އެދެމެވެ. އެކްސްއިން ނުވަތަ ފޭސްބުކުން ފޮނުވިދާނެ އެވެ. ނުވަތަ news@adhadhu.com އަށް އީމެއިލް ކުރާށެވެ.
