ހަތަރު ދުވަހުގެ ދަތުރެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އައްޑޫއަށް ފުރާވަޑައިގަންނަވާ ގޮތަށް ހަމަޖެހިއްޖެ އެވެ.
ރައީސް އައްޑޫއަށް ފުރާވަޑައިގަންނަވާކަން ރައީސް އޮފީހުގެ އޮފިޝަލަކު ވަނީ މި ނޫހަށް ކަށަވަރުކޮށްދެއްވައިފަ އެވެ. އައްޑޫއަށް ރައީސް ވަޑައިގެން ރައްޔިތުންގެ ހާލު ބައްލަވައި، އާންމުންގެ އަޑު އައްސަވާނެ ކަމަށް ރައީސް އޮފީހުން ބުނެ އެވެ.
"[ދަތުރުގެ ބޭނުމަކީ] ރައްޔިތުންނާ ބައްދަލު ކުރެއްވުން. ރައްޔިތުންގެ އަޑު އެއްސެވުން، ރައްޔިތުންގެ ހާލު ބެއްލެވުން. ކުރިން ވެސް ވިދާޅުވެފައި ވަނީ ވަޑައިގެންނެވޭ އެންމެ ގިނަ ރަށްރަށަށް ވަޑައިގަންނަވާނެ ކަމަށް،" ރައީސް އޮފީހުގެ އޮފިޝަލު ވިދާޅުވި އެވެ.
މާލެއަށްފަހު ދިވެހިރާއްޖޭގެ އެންމެ ބޮޑު އާބާދީ އައްޑޫއަށް ރައީސް މިއަދު މި ވަޑައިގަންނަވަނީ ތ. އަތޮޅުގެ ބައެއް ރަށްރަށަށް ވެސް މި މަހު ވަޑައިގަތުމަށްފަހެވެ.
ތ. އަތޮޅުގެ ޖުމުލަ 10 ރަށަކަށް ރައީސް މުއިއްޒު ވަޑައިގެންނެވި އެވެ. އެއީ ގުރައިދޫ އާއި ދިޔަމިގިއްޔާއި މަޑިފުށްޓާއި ވޭމަންޑޫ އާއި ބުރުނީ އާއި ކަނޑޫދޫ އާއި ވަންދޫ އާއި އޮމަދޫ އާއި ކިނބިދޫ އަދި ގާދިއްފުށްޓަށް އެމަނިކުފާނު ވަޑައިގެންނެވި އެވެ.
