ކުރިއަށް އޮތް ރައްޔިތުންގެ މަޖިލީހުގެ ބޮޑު އަގުލަބިއްޔަތެއް އެމްޑީޕީއަށް ލިބޭނެ ކަމަށާއި އާ މަޖިލީހުގެ ފުރަތަމަ މަސައްކަތަކަށް ވާނީ ދޮގު ނުހެދުމަށް ސަރުކާރަށް ދެންނެވުން ކަމަށް، ކުރީގެ ރައީސް އިބްރާހިމް މުހައްމަދު ސޯލިހު ރޭ ވިދާޅުވެއްޖެ އެވެ.
ވިހިވަނަ ރައްޔިތންގެ މަޖިލީހުގެ ހިންނަވަރު ދާއިރާއަށް އެމްޑީޕީގެ ޓިކެޓުގައި ވާދަ ކުރައްވާ އެ ދާއިރާގެ މިހާރުގެ ވެސް މެމްބަރު ޖީހާން މަހުމޫދަށް ތާއިދު ހޯދަން ރޭ އެރަށުގައި ބޭއްވި ޖަލްސާގައި ސޯލިހު ވިދާޅުވީ މި ސަރުކާރުގެ މިސްރާބު މިހާރު ހުރި ގޮތުން މަޖިލީހުގެ އަގުލަބިއްޔަތު އެމްޑީޕީއަށް ލިބުން މުހިއްމު ކަމަށެވެ.
ސަރުކާރު ޒިންމާދާރު ކުރެވޭނީ މަޖިލީހުގެ ތެރެއިން މަސައްކަތްތައް ކުރެވިގެން ކަމަށް އެމްޑީޕީގެ ވަގުތީ ރައީސެެއްގެ ގޮތުގައި ވެސް ހުންނެވި ސޯލިހު ވިދާޅުވި އެވެ.
"[މަޖިލީހުގެ އަގުލަބިއްޔަތު ނެގުމަށް ފަހު] އަޅުގަނޑުމެންގެ ފުރަތަމަ އަމާޒަކީ، މަސައްކަތް ކުރަމުން ގެންދާނީ މި ސަރުކާރު ހަމަ މަގަށް އެޅުވުމަށް. ދޮގު ނުހެދުމަށް ޑރ. މުއިއްޒަށް އަޅުގަނޑުމެން ދަންނަވާނަން. އޮޅުވާނުލުމަށް އަޅުގަނޑުމެން ދަންނަވާނަން،" އެ މަނިކުފާނު ވިދާޅުވި އެވެ.
މަޖިލީހުގެ އިންތިހާބުގައި ޖުމުލަ 368 ކެންޑިޑޭޓުން ވާދަކުރައްވާއިރު، އެއް ޕާޓީއަކުން އެންމެ ގިނަ ކެންޑޭޓުން ނެރެފައިވަނީ އެމްޑީޕީންނެވެ. އެ ޕާޓީން، 90 ދާއިރާއަށް ވާދަކުރެ އެވެ.
މި ސަރުކާރުންވި ބައެއް ވައުދުތައް ތަންފީޒުކުރާ ގޮތާމެދު ފާޑުކިޔުން ވަނީ އަމާޒުވެފަ އެވެ. އެންމެ ބޮޑު ފާޑުކިޔުމެއް އަމާޒުވެފައި ވަނީ ރައީސް މުއިއްޒުގެ ރިޔާސީ ކެމްޕޭނު ބިނާކުރި މައިގަނޑު ދެ ވައުދު ކަމުގައިވާ ކުރީގެ ރައީސް އަބްދުﷲ ޔާމީން މިނިވަން ކުރުމާއި، އިންޑިއާ ސިފައިން ބޭރުކުރުމާ ގުޅޭ ގޮތުންނެވެ. އެ ދެ ކަންތައް ކުރާނެ ކަމަށް ވިދާޅުވި ނަމަވެސް ތިން މަސްވެގެން ދިޔައިރު ވެސް އެ ދެ ވައުދު ވެސް ނުފުއްދެ އެވެ.
"އިންޑިއާ އައުޓް" ކެމްޕޭން ހުއްޓުވުމަށް ކުރީގެ ސޯލިހު ނެރުއްވި ގަރާރު، މި ސަރުކާރުން ބާތިލު ނުކުރާތީ ވެސް ސިޔާސީން ދަނީ ފާޑުކިޔަމުންނެވެ.
"ގައުމު މިދާ މިސްރާބު ރަނގަޅެއް ނޫން" ކަމަށާއި "ވެރިކަން ކުރި މީހެއްގެ ހައިސިއްޔަތުން ލޯ މަރާލައިގެން ހުރެވޭކަށް ނެތް" ކަމަށް ވެސް ސޯލިހު ރޭ ވިދާޅުވި އެވެ.
