އިދިކޮޅު އެންމެ ބޮޑު ސިޔާސީ ޕާޓީ، އެމްޑީޕީގެ ރައީސް ހޮވުމުގެ އިންތިހާބު މާޗް 2، 2024 ގައި ބާއްވަން ނިންމައި، އެމަގާމަށް ކުރިމަތިލާން އެ ޕާޓީން އިއްޔެ ހުޅުވައިލި އެވެ.
އެމްޑީޕީގެ ރައީސް ކަމުގެ މަގާމުގައި ހުންނެވި ކުރީގެ ރައީސް މުހަންމަދު ނަޝީދު ޖޫން 21، 2023 ގައި އެމްޑީޕީން ވަކިވެ ވަޑައިގަތުމާ ގުޅިގެން، ޕާޓީގެ ގައުމީ މަޖިލީހުން ވަނީ ވަގުތީ ގޮތުން ޕާޓީގެ ރައީސް ކަމުގެ މަގާމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ހަމަޖައްސައިފަ އެވެ. މިހާރުވެސް އެ މަގާމުގައި ހުންނެވީ އެމަނިކުފާނެވެ.
އެ ޕާޓީން ކުރި އިއުލާނެއްގައި ބުނީ ޕާޓީގެ ރައީސްގެ މަގާމަށް ކުރިމަތިލުމަށް އެދޭ މެންބަރުންނަށް އެފުރުސަތު މިއަދުން ފެށިގެން ފެބްރުއަރީ 20، 2024 ވަނަ ދުވަހުގެ 14:00 އާއި ހަމައަށް ހުޅުވާލެވިފައިވާ ކަމަށެވެ.
ރައީސް ކަމަށް ކުރިމަތިލާން އެދޭ އެ ޕާޓީގެ މެންބަރުން، އެކަމަށް އެދޭ ފޯމާއެކު ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންއިން ފުރިހަމަކޮށްފައިވާ ކުށާއި ދަރާނީގެ ރިކޯޑާއެކު ހުށަހަޅަން ޖެހޭނެ ކަމަށް އެމްޑީޕީގެ އިއުލާނުގައި ބުންޏެވެ.
