ކުރީގެ ސަރުކާރުން ހުޅުމާލޭގައި އަޅަން ފެށި ފްލެޓްތަކުގެ ތެރެއިން އެންމެ ފުރަތަމަ ނިމޭ 4،000 ފްލެޓް ލިބޭ މީހުންގެ ލިސްޓް، އެކުލަވައިލި ގޮތް އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގުކޮށް، ހޯދި ހޯދުންތަކާ މެދު ސުވާލު އުފައްދައި، އެ ލިސްޓާ އެއްގޮތަށް ފްލެޓް ދޫކުރަން ރައްޔިތުންގެ މަޖިލީހުގެ އިދިކޮޅު ބައެއް މެމްބަރުން މިއަދު ގޮވައިލައްވައިފި އެވެ.
ފްލެޓް ލިބޭ މީހުންގެ ލިސްޓް އެކުލަވައިލި ގޮތް އޭސީސީން ތަހުގީގުކުރީ އެ ލިސްޓާ މެދު ކަންބޮޑުވުން ފާޅުކޮށް ބައެއް މީހުން ހުށަހެޅި މައްސަލައަކާ ގުޅިގެންނެވެ. އެ މައްސަލަ ތަހުގުކުރުމަށް ފަހު އެ ކޮމިޝަނުން މިދިޔަ ހޯމަ ދުވަހު ބުނީ ފްލެޓު ލިބޭނެ ކަމަށް ކުރީ ސަރުކާރުގެ ހައުސިން މިނިސްޓްރީން ކަނޑައެޅި މީހުންގެ ތެރެއިން 60 ޕަސެންޓު މީހުންގެ ޝަރުތު ހަމަނުވާ ކަމަށެވެ.
ފްލެޓްތައް އަވަހަށް ދޫކުރަން ގޮވައިލައި ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ ދަ ޑިމޮކްރެޓްސް މެމްބަރު އީވާ އަބްދުﷲ މަޖިލީހަށް ހުށަހެޅުއްވި މައްސަލައިގެ ބަހުސްގައި ބައެއް އިދިކޮޅު ބައެއް މެމްބަރުން ސިފަކުރެއްވި ގޮތުގައި އޭސީސީން ކުރި މަސައްކަތަކީ ސަރުކާރާ ގުޅިގެން ކުރި ސިޔާސީ މަސައްކަތެކެވެ.
މަޖިލީހުގެ ދާންދޫ ދާއިރާގެ އެމްޑީޕީ މެމްބަރު ޔައުގޫބު އަބްދުﷲ ވިދާޅުވީ ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް ނުފޫޒުފޯރުވަން އޭސީސީން ސަރުކާރާ ގުޅިގެން މަސައްކަތްކުރާ ކަމަށެވެ.
"މި ހަތަރުހާސް ފްލެޓް މި ސަރުކާރުން ބޭނުންކުރަމުން މިދަނީ އެންޓިކޮރަޕްޝަން ކަމިޝަނާއި ހައުސިން މިނިސްޓްރީއާއި ސަރުކާރާ ގުޅިގެން ކުރިއަށް އޮތް މަޖިލިސް އިންތިހާބަށް ސީދާ ރައްޔިތުންނަށް ނުފޫޒު ފޯރުވަން، އެމީހުންނަށް ބިރު ދައްކަން މި ހަތަރު ހާސް ފްލެޓް ބޭނުންކޮށްގެން ކުރަމުން ގެންދާ މަސައްކަތް. މި މަސައްކަތުގައި އެންމެ އިސްކޮށް، އެންމެ ބުރަކޮށް އަވަދިނެތި މިއުޅެނީ އެންޓިކޮރަޕްޝަން ކޮމިޝަން," ޔައުގޫބު ވިދާޅުވި އެވެ.
ފްލެޓް ލިސްޓްގެ މައްސަލަ އޭސީސީން ބެލީ ގާނޫނުން އެކޮމިޝަނާ މަތިކޮށްފައިވާ މެންޑޭޓްގެ ބޭރުން ކަމަށް ވެސް އޭނާ ތުހުމަތުކުރެއްވި އެވެ. ފްލެޓްތައް އޭގެ "ހައްގުވެރިންނަށް" މިއަދުން މިއަދަށް ދޭން އޭނާ ސަރުކާރަށް ގޮވައިލެއްވި އެވެ.
އޭސީސީއަކީ ސިޔާސީ ތަނެއް ކަމަށް ސިފަކޮށް، މާފަންނު ހުޅަނގު ދާއިރާގެ މެމްބަރު މުހައްމަދު ފަލާހު ވެސް އެ ކޮމިޝަނަށް ބަހުގެ ހަމަލާތައް މިއަދު ދެއްވި އެވެ. ސަރުކާރުން ބޭނުންވާހާ ކަމެއް ބޭނުންވާހާ ގޮތަކަށް އޭސީސީން ކުރަމުން އަންނަ ކަމަށް ވެސް އޭނާ ތުހުމަތުކުރެއްވި އެވެ.
ހޯރަފުށި ދާއިރާގެ އެމްޑީޕީ މެމްބަރު އަހުމަދު ސަލީމް ވިދާޅުވީ ފްލެޓްގެ ކަންތަކުގައި އޭސީސީން މަސައްކަތްކުރަމުން އަންނަ ގޮތާ މެދު ބޮޑެތި ސުވާލު އުފެދޭ ކަމަށެވެ.
އޭސީސީން އަމަލުކުރަމުން މިދަނީ އޭސީސީގެ މެންޑޭޓްގެ ތެރެއިންތޯ ވެސް އަޅުގަނޑުމެންގެ ހިތުގައި އެބަ ސުވާލު އުފެދޭ. މިކަމުގައި އެންޓިކޮރަޕްޝަން ކޮމިޝަނުގެ ނިޔަތް ރަނގަޅު ނަމަ އެކޮމިޝަނުން މަސައްކަތްކުރީހީ ކޮމިޝަނުގެ ގާނޫނުގެ އެކާވީސް ވަނަ މާއްދާގެ ދަށުން ކަމަށް އަޅުގަނޑު ގަބޫލުކުރަނީ،" ސަލީމް ވިދާޅުވި އެވެ.
އޭނާ ވިދާޅުވީ އެގޮތަށް އަމަލުކުރި ނަމަ، ފްލެޓް ލިސްޓްގެ އިދާރީ މަސައްކަތް ހިނގަމުން ދިޔަ އިރު އޭސީސީން އެކަން ބަލައި، ރަނގަޅުކުރަން އެންގީސް ކަމަށް ވެސް އޭނާ ވިދާޅުވި އެވެ.
ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒު ވިދާޅުވީ 4،000 ފްލެޓް ލިބޭ މީހުންނަށް އެ ތަންތަން ހަވާލުކޮށް، ލިޔެކިއުންތައް ބަދަލުކޮށް ސަރުކާރާ އެކު އެއްބަސްވުން ވެސް ހަދާފައިވާ ކަމަށާއި އެހެންވީމާ އެތަންތަން ދެން އަތުނުލެވޭނެ ކަމަށެވެ.
