ރާއްޖޭގެ މަސްދޯނިތަކަށް އިންޑިއާ ސިފައިން އެރި މައްސަލާގައި، އިންޑިއާ ސަފީރު މުނޫ މަހާވަރް ފޮރިން މިނިސްޓްރީއަށް ހާޒިރު ނުކުރާތީ ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ މިއަދު ސަރުކާރަށް ފާޑުވިދާޅުވެއްޖެ އެވެ.
ވަކި ޕާޓީއަކަށް ނިސްބަތް ނުވި ނަމަވެސް އާންމުގޮތެއްގައި ޕީއެންސީ/ޕީޕީއެމް އަށް ތާއީދުކުރައްވާ ނަޝީދު މަޖިލީހުގެ މިއަދުގެ ޖަލްސާގައި ވިދާޅުވީ ރާއްޖޭގެ ޑެޕިއުޓީ މިނިސްޓަރަކު ސޯޝަަލް މީޑިއާގައި ލިއުއްވި ލިއުމަކާ ގުޅިގެން، އިންޑިއާގެ ހާރިޖީ ވުޒާރާއަށް ރާއްޖޭގެ ސަފީރު އެތައް ފަހަރަކު ހާޒިކުރި ކަމަށެވެ.
އެކަން އެހެން ހިނގާފައި ވާއިރު ރާއްޖޭގެ މަސްދޯނި ފަހަރަށް އިންޑިއާ ސިފައިން އެރި މައްސަލާގައި އެ ގައުމުގެ ސަފީރު ރާއްޖޭގެ ފޮރިން މިނިސްޓްރީއަށް ހާޒިރު ނުކުރެވެންވީ ކީއްވެތޯ އޭނާ ސުވާލު އުފެއްދެވި އެވެ.
"މިއަދުވެސް ހަމަ ހަމަޖެހިލާފައި މިތާ ފަހަތުގައި [މަޖިލީހުގެ ޖަލްސާ އަޑުއަހަން ވަންނަ މީހުން ތިބޭ މާލަމުގައި] އިން އިންޑިއާ އެމްބެސެޑަރު. އެންމެން ސަލާންކޮށްފައި މިވަރެއް ނެތިގެން އުޅުނީ،" ނަޝީދު ވިދާޅުވި އެވެ.
އޭނާ މިމޭރުމުން ވާހަކަ ދެއްކެވީ އިންޑިއާ ސިފައިން ރާއްޖޭގެ ސަރަހައްދުގެ ތެރޭގައި ދިވެހި މަސްދޯނިފަހަރަށް ހަތިޔާރާ އެކު އެރި މައްސަލާގައި ކަންބޮޑުވުން ފާޅުކުރައްވައި އުނގޫފާރު ދާއިރާގެ މެމްބަރު މުހައްމަދު ވަހީދު ހުށަހެޅުއްވި ކުއްލި މައްސަލައިގެ ބަހުސްގަ އެވެ.
ނަޝީދު ފާހަގަކުރެއްވި ގޮތުގައި ރާއްޖޭގެ ބޮޑެތި ސިޔާސީ ޕާޓީތައް ތިބީ އިންޑިއާ އާއި ޗައިނާއާ ދެމެދު އޮންނަ ވާދަވެރިކަމުގައި ކޮންމެވެސް އެއް ގައުމަކަށް ތާއީދުކޮށްގެންނެވެ. އެގޮތުން އިންޑިއާއަށް ފާޑުކިޔަން އިދިކޮޅު އެމްޑީޕީ ފަސްޖެހޭ އިރު ޗައިނާއަށް ފާޑުކިޔަން، ޕީއެންސީ/ޕީޕީއެމް ކޯލިޝަން ފަސްޖެހޭ ކަމަށް އޭނާ ތުހުމަތުކުރެއްވި އެވެ.
އިންޑިއާ ސިފައިން ހަތިޔާރާ އެކު މަސްދޯނިތަކަށް އެރި މައްސަލާގައި ކަންހިނގި ގޮތް ސަރުކާރުން ރައްޔިތުންނަށް ސާފުނުކޮށްދޭ ކަމަށް ވިދާޅުވެ، އޭނާ ސަަރުކާރަށް ފާޑުވިދާޅުވި އެވެ.
"ރައްޔިތުންނަށް ބޭނުންވަނީ ކަންކަން ހާމަކުރަން. ސަރުކާރުން ވެސް އެބަޖެހޭ މިއަށް ވުރެ ޒިންމާދާރުވާން. ސަރުކާރުން މިއަދާ ހަަމައަށް އިރު ވެސް އަދި ވެސް ސާފެއް ނުކޮށްދޭ މިއީ ކިހިނެއް ވެގެން އުޅޭ ކަމެއް ކަމެއް،" ނަޝީދު ވިދާޅުވި އެވެ.
