ސަރުކާރުގެ ހަރަދުތައް ކުޑަކުރުމުގެ ގޮތުން، ސަރުކާރުގެ އިސް ސިޔާސީ މަގާމުތަކަށް އިތުރު މީހުން އައްޔަން ނުކުރަން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އެމަނިކުފާނުގެ ފުރަތަމަ ރިޔާސީ ބަޔާން އިއްވަވަމުން ރައީސް މިއަދު ވިދާޅުވީ، ކުރިއަށް އޮތް ތަނުގައި އެފަދަ މަގާމުތަކަށް އިތުރު މީހުން އައްޔަން ކުރާނީ އިސްތިސްނާ ހާލަތެއްގައި އެކަނި ކަމަށެވެ. ނަމަވެސް އެ ހާލަތްތަކަކީ ކޮބައިކަމާއި އެކަމާ ގުޅޭ އިތުރު އެއްވެސް ތަފުސީލެއް ރައީސް ނުދެއްވަ އެވެ.
"ހަމައެހެންމެ، ސަރުކާރުގެ ހަރަދުތައް ކުޑަކުރުމުގެ ގޮތުން އިސްތިސްނާ ހާލަތްތައް ފިޔަވައި ސިޔާސީ އިސް މަގާމުތަކަށް މީހުން އިތުރަށް އައްޔަން ނުކުރަން އަޅުގަނޑު ނިންމާފައިވާ ވާހަކަ ދަންނަވާލަން" ރައީސް ވިދާޅުވި އެވެ.
ރައީސް މިހެން ވިދާޅުވެފައިވާއިރު، ހުސްވި ހަފުތާގެ ނިޔަލަށް ސަރުކާރުގެ ވަޒީރުންގެ ނައިބުންގެ ގޮތުގައި 163 އަށް ވުރެ ގިނަ ބޭފުޅުން އައްޔަނުކޮށްފައިވެ އެވެ.
ޑެޕިއުޓީ މިނިސްޓަރެއްގެ މުސާރަ އިނާޔަތްތަކުގެ ގޮތުގައި މަހެއްގެ މައްޗަށް 35،500ރ. ލިބިވަޑައިގަންނަވާނެ އެވެ. މި އަދަދުތަކަށް ބަލާއިރު ޑެޕިއުޓީ މިނިސްޓަރުންގެ މުސާރައަށް މަހެއްގެ މައްޗަށް 5.7 މިލިއަން ރުފިޔާ އަދި އަހަރެއްގެ މައްޗަށް 69.4 މިލިއަން ރުފިޔާ ހަރަދުކުރާނެ އެވެ.
މި ސަރުކާރުގެ ސްޓޭޓް މިނިސްޓަރުންގެ ގޮތުގައި އަދި އެ ލެވެލްގައި އައްޔަނުކޮށްފައިވާ ބޭފުޅުންގެ އަދަދު 91 އަށް އަރަ އެވެ. ސްޓޭޓް މިނިސްޓަރަކަށް މުސާރަ އާއި އެލަވަންސަކާއެކު މަހަކު 47،000ރ. ލިބިވަޑައިގަންނަވާނެ އެވެ. އެ ބޭފުޅުންގެ މުސާރައަށް މަހެއްގެ މައްޗަށް 4.2 މިލިއަން ރުފިޔާ އަދި އަހަރެއްގެ މައްޗަށް 51 މިލިއަން ރުފިޔާ ހަރަދުކުރާނެ އެވެ.
މީގެ އިތުރުން ވަޒީރުންގެ މަޖިލީހުގައި ހިމެނޭ 22 މިނިސްޓަރުންނާއި އެ ފެންވަރުގެ 20 ފަރާތާއެކު ޖުމްލަ 42 މިނިސްޓަރުން އެބަތިއްބެވެ. މިނިސްޓަރުންނަށް މުސާރައިގެ ގޮތުގައި 66،000ރ. ލިބިވަޑައިގަންނަވަ އެވެ. މި ބޭފުޅުންނަށް ސަރުކާރުން މަހަކު 2.7 މިލިއަން ރުފިޔާ، އަދި އަހަރެއްގެ މައްޗަށް 33 މިލިއަން ރުފިޔާ ހަރަދުކުރާނެ އެވެ.
މި އަދަދުތަކާއެކު ޑެޕިއުޓީ މިނިސްޓަރުންނާއި އެއަށް ވުރެ މަތީ މަގާމުތަކުގައި ޖުމްލަ 300 އަށްވުރެ ގިނަ ބޭފުޅުން އެބަތިއްބެވެ. ވެރިކަމަށް ވަޑައިގަތުމުގެ ކުރިން ރައީސް ވިދާޅުވީ ސިޔާސީ މަގާމުތައް 700 އަށް ވުރެ އިތުރު ނުވާނެ ކަމަށެވެ.
