ރައްޔިތުންގެ މަޖިލީހުގެ އިންތިހާބު، އަންނަ ރޯދަ މަހުގެ ފަހުން ބާއްވާ ގޮތަށް ހުށަހަޅާފައިވާ ބިލުގެ އިބުތިދާއީ ބަހުސްގެ މަސައްކަތް އެޖެންޑާކޮށް މެންދުރުފަހު ޖަލްސާއެއް ބާއްވަން ނިންމައިފި އެވެ.
މާދަމާއަކީ މި އަހަރަށް ރައްޔިތުންގެ މަޖިލިސް ހުޅުވާ ޖަލްސާ ބާއްވާ ދުވަހެވެ. އާންމު އުސޫލަކީ، މަޖިލިސް ހުޅުވާ ޖަލްސާގައި ރައީސްގެ ރިޔާސީ ބަޔާން އިއްވުމަށް ފަހު ޖަލްސާ ނިންމައިލުމެވެ. އެ ޖަލްސާ މާދަމާ ހެނދުނު ނުވައެއް ޖަހާއިރު ބޭއްވުމަށް ތާވަލުގައިވެ އެވެ.
މަޖިލީހުގެ ވެބްސައިޓުން ދައްކާ ގޮތުން، މާދަމާ މެންދުރުފަހު ދޭއް ޖަހާއިރު ވެސް ޖަލްސާއެއް ތާވަލުކޮށްފައިވެ އެވެ. މަޖިލިސް އިންތިހާބު ފަސްކުރެވޭ ގޮތަށް މަޖިލީހުގެ އިހަވަންދޫ ދާއިރާގެ އެމްޑީޕީ މެންބަރު ހުށަހަޅުއްވާފައިވާ އިންތިހާބުތަކުގެ ގާނޫނަށް އިސްލާހު ގެންނަ ބިލުގެ ބަހުސް އެޖެންޑާގައިވެ އެވެ.
އިސްލާހުގައި އޮތީ އެއްވެސް އިންތިހާބެއް ރޯދަ މަހުގެ ދުވަހެއްގައި ނުބޭއްވޭނެ ކަމަށެވެ. އަދި އެއްވެސް އިންތިހާބެއް ރޯދަ މަހުގެ ދުވަހަކާ ދިމާވާ ނަމަ އެ އިންތިހާބެއް ބާއްވަން ޖެހޭނީ ރޯދަ މަސް ނިމޭތާ 10 ދުވަސް ފަހުން ކަމަށް ވެސް އިސްލާހުގައި ބުނެފައިވެ އެވެ.
މަޖިލީހުގެ އިންތިހާބު ބޭއްވުމަށް އިލެކްޝަންސް ކޮމިޝަނުން ނިންމާފައިވަނީ މާޗު 17،ގަ އެވެ. އެ ދުވަސް ރޯދަ މަހުގެ ތެރެއަށް ދިމާވާއިރު މިއީ ރޯދަ މަހުގެ ދުވަހެއްގައި އިންތިހާބެއް ބާއްވަން ނިންމި ފުރަތަމަ ފަހަރެވެ. ރޯދަ މަހުގެ ތާރީހެއް ދިމާވީ، ގާނޫނުގައި ކަނޑައަޅާފައިވާ މުއްދަތުތަކާ އެ ދުވަސް ދިމާވެގެނެވެ.
މަޖިލީހުން ރުހުން ނުދިން ތިން ވަޒީރަކު އަލުން އައްޔަން ކުރުމުން ގަލޮޅު އުތުރު ދާއިރާގެ ޑިމޮކްރެޓްސް މެންބަރު އީވާ އަބްދުﷲ ހުށަހަޅުއްވާފައިވާ ގަރާރުގެ ފުރަތަމަ ކިޔުން އިއްވުން ވެސް އެޖެންޑާގައި ހިމަނާފައިވެ އެވެ.
މީގެ އިތުރަށް މިދިޔަ ހަފުތާގައި ދެ ދުވަހަކު، އިންޑިއާ ސިފައިންގެ މަނަވަރެއް ރާއްޖޭގެ ކަނޑުގެ ސަރަހައްދުން ދިވެހި ހަތަރު މަސް ދޯންޏެއް ހިފަހައްޓައި، އެ ދޯނިތަކަށް އަރައި ދޯނީގައި ތިބި މަސްވެރިންނަށް އިންޒާރު ދިން މައްސަލައާ ގުޅިގެން ކުއްލި މައްސަލައެއް ވެސް ވައްދާފައިވެ އެވެ.
ރައްޔިތުންގެ މަޖިލީހުގެ ގަވާއިދު ބުނާ ގޮތުން ކުއްލި މައްސަލައެއް އޮވެއްޖެނަމަ، ޖަލްސާގައި ފުރަތަމަ ކުރަން ޖެހޭނެ ކަމަކީ އެ ކުއްލި މައްސަލައަށް ބަހުސް ކުރުމާ މެދު މެންބަރުން ގޮތެއް ނިންމެވުމެވެ.
