މިދިޔަ އަހަރު ވުޖޫދުކުރި ދަ ޑިމޮކްރެޓްސްގެ ޒުވާނުންގެ ގޮފި, ޔަންގް ޑެމްސްގެ އިންތިހާބުގައި މައްސަލަ ދިމާވި ފޮށިތަކުގައި އަލުން ވޯޓުލުން ގެންދާނީ ފެބްރުއަރީ މަހު 17، ގައި ކަމަށް ކަނޑައަޅައި ޑިމޮކްރެޓްސްއިން އެ ކަން އިއުލާން ކޮށްފި އެވެ.
ދަ ޑިމޮކްރެޓްސްގެ އަސާސީ ގަވާއިދުގެ ދަށުން ގައުމުގެ ސިޔާސީ، އިޖުތިމާއީ އަދި އިގުތިސޯދީ ކަންކަމުގައި ޕާޓީ ރައީސަށް ލަފާ ދިނުމަށް އުފައްދާ ޕާޓީ ރައީސްގެ ކައުންސިލަށް، ޕާޓީގެ މަގާމުތަކަށް އިންތިހާބުވެފައިވާ މެމްބަރުން އެ ކައުންސިލަށް އައްޔަންކުރާނެ ކަން އެ ޕާޓީން މިދިޔަ ޖެނުއަރީ 31، ގައި އިއުލާން ކުރި އެވެ. އޭގެ ތެރޭގައި ޔަންގް ޑެމްސްގެ ލީޑަރު އަދި ނައިބު ލީޑަރު ވެސް ހިމެނެ އެވެ.
އެހެން ނަމަވެސް ޑިސެމްބަރު 2، 2023، ގައި ބޭއްވި ޑިމޮކްރެޓްސްގެ އެތެރޭގެ އިންތިހާބުގައި އިންތިހާބު އިންތިޒާމް ކުރުމުގައި ހަރަކާތްތެރިވި ބޭފުޅުންނަށް ހެދިފައިވާ ގޯހަކުން ބައެއް ފޮށިތަކަށް ވޯޓު ލާން ޖެހޭ މިންވަރަށް ވުރެ ގިނައިން ވޯޓު ކަރުދާސް ދޫކުރެވިފައިވާ ބައިތައް ބާތިލް ކުރަން ނިންމީ އެވެ.
އޭގެ ފަހުން ދެ މަސް ދުވަސްވީއިރު ބާތިލުކުރި ބައިތަކުގެ ވޯޓުލުން އަލުން އޮންނާނެ ދުވަސް އިއުލާންނުކޮށް، ޕާޓީ ރައީސްގެ ކައުންސިލް ވަނީ އެ މަގާމުތައް ނުލައި އެކުލަވާލައިފަ އެވެ. އެކަމާ ޒުވާން މެންބަރުން ނުރުހުން ފާޅު ކުރަމުން ދަނިކޮށް ޑިމޮކްރެޓްސްއިން އިއުލާން ކުރި ގޮތުގައި އެ ވޯޓުތައް އޮންނާނީ ފެބްރުއަރީ މަހުގެ 17، ގަ އެވެ.
ޔަންގް ޑެމްސްގެ ލީޑަރު ކަމަށް ވާދަކުރެއްވި ޔޫސުފު ޝާހު މިހާރު ވަނީ އޭނާގެ ނަން އަނބުރާ ގެންގޮސްފަ އެވެ. އަދިވެސް އިތުރު ޒުވާން މެންބަރުން ގެންދަނީ ސޯޝަލް މީޑިއާ އެކްސްގައި ހިޔާލު ފާޅުކޮށް ޕާޓީގެ ލީޑާޝިޕަށް ވަރަށް ބޮޑަށް ފާޑުކިޔަމުންނެވެ.
ޔަންގް ޑެމްސް އިންތިހާބުގެ ނަތީޖާގެ އިތުރުން 13 ރަށެއްގެ ނަތީޖާ އާއި ނ. އަތޮޅުގެ ނަތީޖާގެ ބައެއް ވެސް ބާތިލް ކުރި އެވެ. މި ބާތިލްކުރި އިންތިހާބުތައް ވެސް ފެބްރުއަރީ 17، ގައި އޮންނާނެ ކަމަށް އެ ޕާޓީން މިއަދު ކުރި އިއުލާނުގައިވެ އެވެ.
