ކުރީގެ ޓްރާންސްޕޯޓު މިނިސްޓަރު ޑރ. އަހުމަދު ޝަމްހީދު ވެސް އެމްޑީޕީގެ ހުޅުމާލެއ ދެކުނު ދާއިރާގެ މަޖިލިސް ޓިކެޓު ކަށަވަރު ކުރައްވައިފި އެވެ.
އިއްޔެ ކުރިއަށްދިޔަ އެމްޑީޕީގެ މަޖިލިސް އިންތިހާބުގެ ވަގުތީ ނަތީޖާތައް މިހާރު އިއުލާނުކޮށްފައިވާއިރު، ޑރ. ޝަމްހީދުގެ އިތުރުން ހުޅުމާލެ ދެކުނު ދާއިރާއަށް ވާދަކުރެއްވީ ހުސެއިން ނަޒީފެވެ.
އެމްޑީޕީ ޕްރައިމަރީގެ ވަގުތީ ނަތީޖާ ދައްކާ ގޮތުން ޑރ. ޝަމްހީދަށް ވަނީ 187 ވޯޓު ލިބިވަޑައިގެންފަ އެވެ. ހުސެއިން ނަޒީފަށް ލިބިވަޑައިގަތީ 123 ވޯޓެވެ.
ޑރ. ޝަމްހީދު ވަނީ 2012 ވަނަ އަހަރު ޓްރާންސްޕޯޓު މިނިސްޓަރުގެ މަގާމު އަދާކުރެއްވުމުގެ އިތުރުން، ގައުމީ އެއާލައިން މޯލްޑިވިއަންގެ ޗެއާމަންގެ މަގާމާއި ވިލާ ޝިޕިން ކުންފުނީގެ ޑިރެކްޓަރުގެ މަގާމު ވެސް އަދާ ކުރައްވާފަ އެވެ.
ސިވިލް އިންޖިނޭރިން އަދި ސްޓްރަކްޗަރަލް އިންޖިނޭރިންގެ ދާއިރާއިން ޑރ. ޝަމްހީދު ފުރަތަމަ ޑިގްރީ ހާސިލް ކުރެއްވީ މެލޭޝިޔާގެ އައިއެންޓީއައި ކޮލެޖުންނެވެ. އަދި ސިވިލް އިންޖިނޭރިންއިން ޕީއެޗްޑީ ހާސިލްކުރެއްވީ އިނގިރޭސި ވިލާތުގެ ޔުނިވަސިޓީ އޮފް ލީޑްސް އިންނެވެ.
