މިއަދު ކުރިއަށްދާ އެމްޑީޕީ ޕްރައިމަރީގެ ވޯޓުލުން ފަށަން އޮތް ވަގުތަށްވުރެ އަވަހަށް ބައެއް ދާއިރާތަކުގައި ފަށައިފި އެވެ.
އެމްޑީޕީގެ އިސް އޮފިޝަލަކު "އަދަދު" އާ ވާހަކަ ދައްކަމުން ބުނީ ބައެއް ދާއިރާތަކުގެ ވޯޓުލުން ފެށީ ސަރުކާރު ކުންފުނިތަކުގެ މުވައްޒަފުން މިއަދާ ދިމާކޮށް ރަށުން ބޭރަށް ފޮނުވުމަށް ސަރުކާރުން ރޭވުމުން ކަމަށެވެ. އެގޮތުން އޭނާ ވަނީ ސަރުކާރުގެ ނުފޫޒުން މިއަދަށްވާ ގޮތަށް ބައެއް ކުންފުނިތަކުން ހަރަކާތްތައް ރާވާފައިވާ ކަމަށް ވެސް ތުހުމަތުކޮށްފަ އެވެ.
"ފެނަކައިން ވެސް އެބަހުރި ވޯކްޝޮޕުތައް ހިންގަން އެހެން ރަށްރަށަށް މިއަދު ފޮނުވާފައި، ސެކިއުރިޓީ ގާޑުންނަށް ދަންދެން، މިއީ ހަމަ ސީދާ އެމްޑީޕީގެ ޕްރައިމަރީއަށް ހުރަސް އަޅަން ރޭވި ކަމެއް ކަމަށް އަޅުގަނޑުމެން ދެކެނީ،" ނަން ނުޖެހުމަށް ޝަރުތުކޮށް "އަދަދު" އާ ވާހަކަ ދެއްކި އޮފިޝަލް ބުންޏެވެ.
އޭނާ ތުހުމަތު ކުރި ގޮތަށް ސަރުކާރު ހިއްސާވާ ސްޓެލްކޯ ކުންފުނިން ވަނީ މިއަދަށް "ސްޓެލްކޯ ކްލީނިން" ހަރަކާތެއް ކުރިއަށް ގެންގޮސްފަ އެވެ. އެ ކުންފުނީގެ މެނޭޖުމަންޓުން މިދިޔަ އާދީއްތަ ދުވަހު ނެރުނު ގައިޑްލައިނުގައި ބުނެފައި ވަނީ ސްޓެލްކޯގެ ހުރިހާ މުވައްޒަފުން ވެސް އެ ހަރަކާތުގައި ބައިވެރިވެ އެ މުވައްޒަފަކު މަސައްކަތް ކުރާ ސަރަހައްދު ސާފުކުރަން ޖެހޭނެ ކަމަށެވެ.
މިއަދު ހެނދުނު 8:00 އިން 12:00 އަށް ކުރިއަށް ގެންދިޔަ އެ ހަރަކާތުގައި ބައިވެރިވި މުވައްޒަފުންގެ ނަންތައް އަންނަ ހޯމަ ދުވަހުގެ ކުރިން ސްޓެލްކޯގެ ކޯޕަރޭޓު އެފެއާޒްއަށް ފޮނުވުމަށް ވެސް އެ ގައިޑްލައިނުގައި އަންގާފައިވެ އެވެ.
އެމްޑީޕީ މަޖިލިސް ޕްރައިމަރީގެ ވޯޓުލުން މިއަދު ފެށުމަށް ހަމަޖެހިފައި ރަސްމީ ގަޑިއަކީ ހެނދުނު 9:00 އެވެ. ނަމަވެސް އެއް ދާއިރާއަށް ވުރެ ގިނަ ދާއިރާތަކުގައި ވޯޓުލުން ވަނީ އެ ވަގުތަށް ވުރެ އަވަހަށް ފަށައިފަ އެވެ. އެކަމާ ގުޅިގެން އެމްޑީޕީގެ ސެކްރެޓޭރިއެޓުން އެކްސްގައި ކުރި ޕޯސްޓެއްގައި ވެސް ވަނީ ސަރުކާރުން މިއަދުގެ ވޯޓަށް ނުފޫޒު ފޯރުވި ކަމަށް ތުހުމަތުކޮށްފަ އެވެ.
"ސަރުކާރު ހިއްސާވާ ބައެއް ކުންފުނިތަކުގެ މުވައްޒަފުން އެކިއެކި ބަހަނާ ދައްކައި މިއަދު ރަށުން ބޭރަށް ފޮނުވަމުން ދިއުމާ ގުޅިގެން އެ ރަށްރަށުގައި ހެނދުނު 9:00 ގެ ކުރިން ބޯޓުލުން ފެށުމަށް ވާނީ ހުއްދަ ދެވިފައި،" އެމްޑީޕީގެ ޕޯސްޓުގައި ބުނެފައިވެ އެވެ.
އެމްޑީޕީ ޕްރައިމަރީގެ ވޯޓުލުން މިއަދު 4:00 ގައި ނިމުނުއިރު، މިއަދުގެ ވޯޓުލުން ދިޔައީ ވަރަށް ސުލްހަވެރިކަމާއެކު އެވެ.
