އިދިކޮޅު އެމްޑީޕީގެ ޓިކެޓުގައި، ރައްޔިތުންގެ މަޖިލީހުގެ އިންތިހާބުގައި ވާދަކުރަން ހުޅުވާލި ފުރުސަތުގައި އެއްވެސް ކެންޑިޑޭޓަކު ނުވި ދާއިރާތަކަށް ކެންޑިޑޭޓުން ހޯދުމުގެ މަސައްކަތް ކުރަމުން އަންނަ ކަމަށް އެ ޕާޓީން ބުނެފި އެެވެ.
އަންނަ ހޮނިހިރު ދުވަހު އޮންނަ އެ ޕާޓީގެ އެތެރޭގެ ޕްރައިމަރީގައި ވާދަކުރަން ހުޅުވައިލި ފުރުސަތުގައި އެއްވެސް މީހަކު ކުރިމަތިނުލާ 14 ދާއިރާއެއް އެބަ އޮތެވެ. އޭގެ ފަހުން އެޕާޓީން އިއުލާން ކުރި ގޮތުގައި، އެއިން ހަތް ދާއިރާއަކަށް ކެންޑިޑޭޓުން ހޯދައި ޓިކެޓު ދޭން ވަނީ ނިންމައިފަ އެވެ.
މިހާރު ބާކީ އޮތް ހަތް ދާއިރާއަކީ، އައްޑޫ ސިޓީ ފޭދޫ ދެކުނު ދާއިރާ، ފުވައްމުލައް ސިޓީ ދެކުނު ދާއިރާ، ތިމަރަފުށި ދާއިރާ، ނިލަންދޫ ދާއިރާ، މުލަކު ދާއިރާ، ފެލިދޫ ދާއިރާ، އަދި އޭދަފުށި ދާއިރާ އެވެ. މި ދާއިރާތަކަށް އަދި އެމްޑީޕީގެ ކެންޑިޑޭޓަކު ނެތް ކަމަށް ބެލެވެ އެވެ.
ޕްރައިމަރީއާ ގުޅޭ ގޮތުން މައުލޫމާތު ދޭން މިއަދު ބޭއްވި ޕްރެސް ކޮންފެރެންސްގައި އެ ދާއިރާތަކާ ގުޅޭ ގޮތުން ސުވާލު ކުރުމުން، ޕްރައިމަރީގެ މަސައްކަތުގައި އިސްކޮށް އުޅުއްވާ މަޖިލީހުގެ މާފަންނު ހުޅަނގު ދާއިރާގެ މުހައްމަދު ފަލާހު ވިދާޅުވީ އެެ ޕާޓީގެ އަމާޒު ހުރީ އެ ހުރިހާ ދާއިރާއަކަށް ވެސް ވާދަކުރުމަށް ކަމަށެވެ.
"އެބަ އުޅޭ ފަހެއް ނޫނީ ހަ ދާއިރާއެއް، އަޅުގަނޑުމެން އިއުލާން ކުރި އިރު ނަން ހުށަނާޅާ، އެ ދާއިރާތައް ފިލްކުރަން މިހާރު އެބަ މަސައްކަތްކުރަން، އަޅުގަނޑުމެންގެ ކެންޑިޑޭޓުން ވާދަކުރާނީ، އެހެން ޕާޓީއަކާ އެކު ނޯންނާނެ މަޝްވަރާއެއް [އެ ދާއިރާތައް ދޫކޮށްލަން]،' ފަލާހު ވިދާޅުވި އެވެ.
ފަލާހު ވިދާޅުވި ގޮތުގައި ކެންޑިޑޭޓުން މިވަގުތު ނެތް ދާްއިރާތަކުގެ ޓިކެޓަށް ވާދަކުރަން އަލުން ހުޅުވައެއް ނުލާނެ އެވެ. އޭގެ ބަދަލުގައި ޝައުގު ހުރި މީހުން ހޯދާނީ ގޮފިތަކާ ވާހަކަ ދައްކައިގެން ކަމަށް ވެސް އޭނާ ވިދާޅުވި އެވެ.
ބައެއް ސިޔާސީ ޕާޓީތަކާ އެކު އެ ޕާޓީން މަޝްވަރާތަކެއް ގެންގޮސްފައި ވެސް ވެ އެވެ. އޭގެ ތެރޭގައި ޖުމްހޫރީ ޕާޓީ، އަދާލަތު ޕާޓީ، އަދި އެ ޕާޓީ ދޫކޮށްދިޔަ މެންބަރުންތަކެއް އުފެއްދި ޑިމޮކްރެޓްސް ވެސް ހިމެނެ އެވެ. އެމްޑީޕީން ބުނަމުން ދަނީ އެ މަޝްވަރާތަކުގައި އެއްވެސް ދާއިރާއަކަށް އެ ޕާޓީން ވާދަނުކޮށް އެހެން ޕާޓީއެއްގެ ކެންޑިޑޭޓަކަށް ތާއީދު ކުރުމާ ގުޅޭ ގޮތުން ވާހަކަ ދައްކައި ގޮތެއް ނިންމާފައި ނުވާ ކަމަށެވެ.
ވިހިވަނަ ރައްޔިތުންގެ މަޖިލީހަށް 93 ދާއިރާއަށް މެންބަރުން އިންތިހާބު ކުރާނެ އެވެ. އޭގެ ތެރެއިން އެމްޑީޕީން ޕްރައިމަރީ ބާއްވަނީ 40 ދާއިރާއަކަށެވެ. އެ 40 ދާއިރާއަށް 149 ކެންޑިޑޭޓުން ވާދަކުރާއިރު، 25،325 މީހަކަށް ވޯޓު ލުމުގެ ހައްގު ލިބެ އެވެ. މި ޕްރައިމަރީއަށް 95 ރަށެއްގައި ވޯޓު ފޮށި ބަހައްޓާއިރު މާލެ ސަރަހައްދުގައި 27 ފޮއްޓެއް ބަހައްޓަ އެވެ.
އެންމެ ފަހުން ބޭއްވި ރައްޔިތުންގެ މަޖިލިހުގެ އިންތިހާބުގައި އެމްޑީޕީން ބޮޑު ކާމިޔާބީއެއް ހޯދާފައިވެ އެވެ. 2019 ވަނަ އަހަރު ބޭއްވި އެ އިންތިހާބުގައި އެ ޕާޓީން ވަނީ 87 ދާއިރާގެ ތެރެެއިން 65 ދާއިރާ ކާމިޔާބުކޮށްފަ އެވެ. އެއީ އެއް ޕާޓީއަކަށް އެހާ ބޮޑު މެޖޯރިޓީއެއް ލިބުނު ހަމައެކަނި ފަހަރެވެ.
