ޗައިނާގެ ރިސާޗު އުޅަނދު, ޝިއެން ޔެން ހޮން 3, އާއި އެހެން އުޅަނދެއް ރާއްޖެއަށް ދަތުރުކުރަމުން އަންނަ ކަމަށް ބުނާތީ އެކަން ގާތުން ބަލަމުން އަންނަ ކަމަށާއި އިންޑިއާގެ މަސްލަހަތުތައް ރައްކާތެރި ކުރަން އަަޅަން ޖެހޭ ފިޔަވަަޅުތައް އަޅަމުން އަންނަ ކަމަށް އިންޑިއާ ސަރުކާރުން ބުނެފި އެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީން މިއަދު ބޭއްވި ނޫސްކޮންފަރެންސެއްގަައި ނޫސްވެރިއަކު ސުވާލުކުރީ ޗައިއިނާގެ އުޅަނދުތައް ރާއްޖެއަށް ދަތުރުކުރަމުން އަންނަ އައުމާ މެދު ދެކޭ ގޮތެއް ބެލުމަށެވެ. އެ ސުވާލަށް ޖަވާބުދެއްވަމުން ތަރުޖަމާނު ރަންދީރް ޖައިސްވަލް ވިދާޅުވީ އިންޑިއާއިން ކުރިން ވެސް ބުނެފައިވާ ފަދައިން، އެގައުމު މަސްލަހަތުތަކަށް އަސަރުކުރާ ގޮތަށް ހިނގާ ކަންތައްތައް ގާތުން ބަލަމުން ގެންދާނެ ކަމަށެވެ.
"ކުރިން ވެސް ބުނެފައިވާނެ ފަދައިން އަޅުގަނޑުމެންގެ މަސްލަހަަތުތަކަށް އަސަރުކުރާ ކަންތައްތައް ގާތުން ބަލަމުން ގެންދާނަން. އިގުތިސާދީ މަސްލަހަތުތައް، ތަރައްގީއާ ގުޅޭ މަސްލަހަތުތައް އަދި ސަލާމަތީ މަސްލަހަތުތައް،" ޖައިސްވަލް ވިދާޅުވި އެވެ.
ކަނޑު އުޅަނދުތައް ޓްރެކް ކުރާ ސައިޓްތަކުން ލިބެން ހުރި މައުލޫމާތުން އެނގޭ ގޮތުގައި ޗައިނާގެ ރިސާޗު އުޅަނދު, ޝިއެން ޔެން ހޮން 3, މިހާރު ވެސް އޮތީ ރާއްޖޭގެ އެކްސްކްލޫޒިވް އިކޮނޮމިކް ޒޯނުގެ ކައިރީގަ އެވެ.
އެ އުޅަނދު ރާއްޖެ އަންނަން އެންމެ ފުރަތަމަ ތާވަލުކޮށްފައި އޮތީ އިއްޔެ އެވެ. ނަމަވެސް, ކަނޑު އުޅަނދުތައް ޓްރެކްކުރާ ސައިޓުތަކުން ބުނާ ގޮތުގައި އެ އުޅަނދު މާލޭގައި ދެން ބަނދަރުކުރާނީ މި މަހުގެ އަށެއްގަ އެވެ.
