މަރުތޭލަކުން ހަމަލާދީ މިއަދު ޒަހަމްކޮށްލި ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމްއަށް އޭޑީކޭ ހޮސްޕިޓަލުގައި ފަރުވާ ދިނުމަށް ފަހު ގެއަށް ދޫކޮށްލައިފި އެވެ.
ފަރުވާއަށް ފަހު ހޮސްޕިޓަލުން ދޫކޮށްލިކަން ހާމަކުރައްވައި ފޭސްބުކް ގައި ލިއުއްވި ލިއުއްވުމެއްގައި ޝަމީމު ވިދާޅުވީ، ފަރުވާއަށް ފަހު ގެއަށް ދޫކޮށްލާފައިވާކަމަށާއި، އެނބުރި މަސައްކަތަށް ވަޑައިގަންނަވާނީ ގަދަކޮށް ކަމަށެވެ.
"އާއިލާ ކައިރިއަށް ގެއަށް އާދެވިއްޖެ. މިހާރަށްވުރެ ގަދަކޮށް ދެން މަސައްކަތަށް ނިކުންނާނީ." ޝަމީމް ވިދާޅުވި އެވެ.
ޝަމީމްއަށް ބަޔަކު ހަމަލާ ދިނީ، ސައިކަލު ޕާކޮށްފައި ގެެއަށް ވެދެވަޑައިގަންނަވަނިކޮށް މަރުތޭލެއް ބޭނުންކޮށްގެންނެވެ. އެ ހަމަލާގެ ސަބަބުން ޝަމީމްގެ ވައަތުގެ ކަށިގަނޑަށް ގެއްލުން ލިބުނެވެ.
ޕީޖީ އޮފީހުގެ "ހަބަރުފީތާ" ވެބްޕޭޖުގައި ޝާއިއުކޮށްފައިވާ ގޮތުގައި ޝަމީމަށް މާލޭގެ މަގުމަތީގައި ހުންނަވަނިކޮށް ހަމަލާ ދިނީ ސައިކަލެއް އައި ދެ މީހަކު ވެގެންނެވެ.
އެމްއެންޑީއެފުން ޕީީޖީގެ ސެކުއިރިޓީ އިތުރަށް ވަރުގަދަކޮށްފައިވާ ކަމަށާއި، ޕޮލިސް ކޮމިޝަނަރު އަލީ ޝުޖާއު މިއަދު ހެނދުނު ޝަމީމްގެ ހާލު ބެއްލެވި ކަމަށް ވެސް އެ އޮފީހުން ބުންޏެވެ.
މި މައްސަލަ ފުލުހުން ތަހުގީގު ކުރަމުންދާއިރު، އަދި މި މައްސަލައިގެ ތުހުމަތުގައި މީހަކު ހައްޔަރުކޮށްފައެއް ނުވެ އެވެ.
