ރައީސް ޑރ.،މުހައްމަދު މުއިއްޒު އައްޔަންކުރެއްވި ވަޒީރުންނަށް ރުހުންދިނުމާ މެދު ގޮތެއް ނިންމަން ރައްޔިތުންގެ މަޖިލީހުގައި މިއަދު ނެގި ވޯޓުގައި އެމްޑީޕީގެ ހަތަރު މެމްބަރަކު އެ ޕާޓީގެ ވިޕްލައިނާ ހިލާފަށް ވޯޓު ދެއްވި ކަން އެނގިއްޖެ އެވެ.
ރައްޔިތުންގެ މަޖިލީހުގެ އެމްޑީޕީ މެމްބަރަކު "އަދަދު" އަށް މައުލޫމާތު ދެއްވި ގޮތުގައި އިކޮނޮމިކް މިނިސްޓަރު މުހައްމަދު ސައީދަށް ރުހުން ނުދޭން އެމްޑީޕީގެ ޕާލަމެންޓްރީ ގްރޫޕުން އޮތީ ވިޕްލައިން އަޅައިފަ އެވެ. އެހެން ނަމަވެސް ސައީދަށް ރުހުންދޭން މިއަދުގެ ޖަލްސާއިން ފާސްކުރި އިރު އެމްޑީޕީގެ ތިން މެމްބަރަކު ވޯޓު ދެއްވީ ރުހުން ދިނުމާ އެއްކޮޅަށެވެ.
ވިޕާ ދެކޮޅަށް ވޯޓު ދެއްވީ އިހަވަންދޫ ދާއިރާގެ މެމްބަރު މުހައްމަދު ޝިފާއު، ފުވައްމުލަކު ދެކުނު ދާއިރާގެ މެމްބަރު މުހައްމަދު މުމްތާޒް، ކުޅުދުއްފުށި ދެކުނު ދާއިރާގެ މެމްބަރު ޖަމްޝީދު އަދި ބިލެއްދޫ ދާއިރާގެ މެމްބަރު އަހުމަދު ހަލީމެވެ.
"[މިނިސްޓަރު ސައީދަށް ރުހުންދޭން] އެމްޑީޕީ މެމްބަރުން ވޯޓު ދިނީ ވިޕްއާ ހިލާފަށް،" މެމްބަރު ވިދާޅުވި އެވެ.
ވަޒީރުންނަށް ރުހުން ދިނުމާ މެދު ގޮތެއް ނިންމަން މަޖިލީހުގެ މިއަދުގެ ޖަލްސާގައި ނެގި ވޯޓުގައި ރުހުން ނުދޭން ނިންމީ ތިން ބޭފުޅަކަށެވެ. އެއީ އެޓާނީ ޖެނެރަލް އަހުމަދު އުޝާމް، ހައުސިން މިނިސްޓަރު ޑރ. އަލީ ހައިދަރު އަދި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށެވެ.
އެހެން ނަމަވެސް އެމްޑީޕީގެ މަސްދަރުތަކުން އިއްޔެ މައުލޫމާތު ދީފައިވާ ގޮތުގައި އެ ތިން ބޭފުޅުންގެ އިތުރުން އިކޮނޮމިކް މިނިސްޓަރު ސައީދަށް ވެސް ރުހުން ނުދޭން އެމްޑީޕީގެ ޕާލަމެންޓްރީ ގްރޫޕުން އިއްޔެ ނިންމި އެވެ.
