ރައީސް ޑރ. މުހައްމަދު މުއިއްޒު އައްޔަންކުރައްވާފައިވާ ވަޒީރުންނަށް ރުހުންދިނުމާ މެދު ގޮތެއް ނިންމަން ރައްޔިތުންގެ މަޖިލީހުގެ މެޖޯރިޓީ ޕާޓީ، އެމްޑީޕީގެ ޕާލަމެންޓްރީ ގްރޫޕުން ބައްދަލުވުމެއް ބާއްވަން ތައްޔާރުވެއްޖެ އެވެ.
"އަދަދު"އަށް މައުލޫމާތު ދެއްވި މެމްބަރަކު ވިދާޅުވި ގޮތުގައި ވަޒީރުންނަށް ރުހުން ދިނުމާ މެދު މަޝްވަރާކުރަން އެމްޑީޕީގެ ޕީޖީ ގްރޫޕުން ބައްދަލުވުމެއް ބާއްވާނީ މަޖިލީހުުގައި މިހާރު ކުރިއަށްދާ ޖަލްސާގެ ފުރަތަމަ ހުސްވަގުތުކޮޅުގައި، 10:00 ގަ އެވެ. ވަޒީރުންނަށް ރުހުން ދިނުމާ މެދު އެ ގްރޫޕުން ނިންމާ ގޮތެއްގެ މައްޗަށް ތުރީލައިން ވިޕެއް ނެރޭނެ ކަމަށް ބެލެވެ އެވެ.
އެމްޑީޕީއާ ހިޔާލު ތަފާތުވެ، އެ ޕާޓީން ވަކިވެވަޑައިގެންނެވި ބޭފުޅުން އިސްކޮށް ތިއްބަވާ ދަ ޑިމޮކްރެޓްސް އާއި އެމްޑީޕީން ވަނީ 19 ވަނަ މަޖިލީހުގެ ދައުރުގެ ބާކީ އޮތް ބައިގައި ގުޅިގެން މަސައްކަތް ކުރަން ނިންމައިފަ އެވެ. އެ ގޮތަށް ނިންމާފަައި ވަނިކޮށް ދަ ޑިމޮކްރެޓްސް އިން މިއަދު ނެރުނު ބަޔާނެއްގައި ބުނީ ބައެއް ވަޒީރުންނަށް ރުހުން ނުދޭން އެޕާޓީން ނިންމާފައިވާ ކަމަށެވެ. އެހެން ނަމަވެސް އެއީ ކޮންކޮން ވަޒީރުންނެއް ކަމެއް އަދި ހާމައެއް ނުުކުރެ އެވެ.
އެމްޑީޕީގެ މެމްބަރަކު "އަދަދު" އަށް ވިދާޅުވި ގޮތުގައި އެމްޑީޕީގެ ޕާލަމެންޓްރީ ގްރޫޕުން ވެސް ނިންމާނީ ބައެއް ވަޒީރުންނަށް ރުހުން ނުދިނުމަށެވެ. އެހެން ނަމަވެސް ރުހުން ނުދޭނީ ކޮންކޮން ވަޒީރުންނަކަށް ކަމެއް އޭނާ ވިދާޅެއް ނުވެ އެވެ.
