ސަރުކާރުގެ ސިޔާސީ މަގާމުތައް މަދެއް ނުކުރާނެ ކަމަށާއި ސަރުކާރުން އަދިވެސް މަގާމުތަކަށް ބޭފުޅުން އައްޔަން ކުރާނެ ކަމަށް ރައީސް އޮފީހުގެ އިސް ވަޒީރު އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ މިއަދު ވިދާޅުވެއްޖެ އެވެ.
ޕީއެންސީ/ޕީޕީއެމް އިން ޕީއެންސީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން އަބްދުއްރަހީމް ސަރުކާރުގެ މެނިފެސްޓޯގައި ހުރި ކަންތައްތައް ކުރެވޭނީ އެކަމަށް އެކަށީގެންވާ ވަރަށް މަގާމުތަކަށް މީހުން ލައިގެން ކަމަށެވެ. މަގާމުތަކަށް މީހުން އައްޔަންކުރަމުން ގެންދަނީ އެ މީހުންނަށް މުސާރަ ދިނުމަށް ޓަކައި އާމްދަނީ އިތުރުކުރާނެ މަގުތައް ހޯދައިގެން ކަމަށް ވެސް އޭނާ ވިދާޅުވި އެވެ.
"އެހެންވީމާ އަަޅުގަނޑުމެން އަދިވެސް އިތުރު މަގާމުތަކަށް މީހުން އައްޔަންކުރަމުން ދާނަން، އެއީ އަޅުގަނޑުމެން ވަރަށް ބައިވަރު ކަންތައް ކުރާށޭ [ވެރިކަމަށް] އައީ. އެނގިވަޑައިގަންނަވާނެ ރަސްމާލޭގެ ޕްރޮޖެކްޓް ކަހަލަ އެތައް ބައިވަރު ޕްރޮޖެކްޓްތަކެއް އެބަހުރި. އެކަންކަން ކުރެވެން އޮތީ އެކަށީގެންވާ ގާބިލު ޓީމެއް އޮވެގެން، އެެހެންވީމާ މީހުން އައްޔަން ކުރުމުގެ ކަންތައް އަދިވެސް ކުރިއަށް ދާނެ އިނގޭތޯ،" އަބްދުއްރަހީމް ވިދާޅުވި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރު އުފެދުމުގެ ކުރިން، އަބްދުއްރަހީމް ހިމެނޭހެން ޕީއެންސީ/ޕީޕީއެމްގެ އިސް ބޭފުޅުން ވިދާޅުވަމުން ގެންދެވި އެއް ވާހަކައަކީ އޭރުގެ ސަރުކާރުގެ މަތި ބަރު ވާހަކަ އެެވެ. ސަރުކާރުގެ މަގާމުތަކުގައި އެހާ ގިނަ ބޭފުޅުން ތިބެން ނުޖެހޭނެ ކަަަމަށް އޭރު އެ ބޭފުޅުން އައީ ވިދާޅުވަމުންނެވެ.
ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރަށް ފާޑުވިދާޅުވެ، އެ ވާހަކަތައް އެހެން ދައްކަވާފައި މިހާރު އެހާ ގިނަ ސިޔާސީ މަގާމުތައް އުފައްދަނީ ކީއްވެތޯ ސުވާލުކުރުމުން އަބްދުއް ރަހީމް ތުހުމަތުކުރެއްވީ އެ ސަރުކާރުގައި ފަނަރަސަތޭކައެއްހާ ސިޔާސީ މުވައްޒަފުން ތިބި ކަމަށެވެ.
"އަޅުގަނޑުމެންގެ މިސަރުކާރުގެ ސިޔާސީ މަގާމުތަކުގެ އަދަދު އަދި ފަސްސަތޭކައަކަށް ނާރާ" އަބްދުއްރަހީމް ވިދާޅުވި އެވެ.
އަބްދުއްރަހީމް އިތުރަށް ވިދާޅުވީ މި ސަރުކާރުން މަގާމަކަށް މީހަކު އައްޔަންކޮށްފިއްޔާ އެ މީހެއްގެ ޒިންމާ އަދާކުރާނެ ކަމަށާއި ކުރީ ސަރުކާރު ނިމި ދިޔަ އިރު ހާލަތު އޮތް ގޮތް ވަރަށް އަވަހަށް ހާމަކުރާނެ ކަމަށެވެ. އެގޮތުން ބައެއް ސިއްރު ޑީލުތައް، ސީދާ ކޮން ކަމަކާ ގުޅޭ އެއްބަސްވުންތަކެއް ކަން ފާހަގަނުކޮށް، ސަރުކާރު ނިމެން އެއް ދުވަހަށް ވެފައި ވަނިކޮށް ހަދާފައިވާ ކަމަށް އޭނާ ވިދާޅުވި އެވެ.
