އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އާއި ދަ ޑިމޮކްރެޓްސްއިން ގާނޫނުތައް އިސްލާހުކުރަން ހުށަހަޅާ ހުށަހެޅުންތަކަކީ ސަރުކާރު ހުއްޓުވަން ކުރާ ކަމެއްގެ ގޮތުގައި ސިފަކޮށް އެކަން އެގޮތަށް ނުކުރެވޭނެ ކަމަށް ވިދާޅުވެ އެ ދެ ޕާޓީއަށް މި ސަރުކާރުގެ އެންމެ އިސް އެއް ވެރިޔަކަށް ހުންނެވި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޗެއާޕާސަން އަބްދުއްރަހީމް އަބްދުالله ވަރުގަދަ ރައްދެއް ދެއްވައިފި އެވެ.
އެމްޑީޕީ އާއި ދަ ޑިމޮކްރެޓްސް ގުޅިގެން މައިގަނޑު ގޮތެއްގައި ހުށަހަޅަން ނިންމާފައި ވަނީ ހަތަރު ކަމަކެވެ. އެއީ, މަޖިލިސް މެމްބަރުންގެ އަދަދު އެއްވަރެއްގައި ހިފެހެއްޓުމާއި ސަރުކާރު ހިއްސާވާ ކުންފުނިތައް ފުރިހަމައަށް ރެގިއުލޭޓް ކުރުމާ ގާނޫނުތައް އިސްލާހުކުރުމާއި ސަރުކާރުން ސިޔާސީ މަގާމުތައް އުފެއްދުން ލިމިޓް ކުރުމުގެ އިތުރުން ރައްޔިތުންގެ މަޖިލީހުގެ އިންތިހާބު ރޯދައަށް ފަހު ބޭއްވުމަށެވެ.
އޭގެ ތެރެއިން އަބްދުއްރަހީމްގެ ނުރުހުން އެންމެ ބޮޑަށް އަމާޒުވީ ސިޔާސީ މަގާމުތައް ލިމިޓުކުރަން ހުށަހެޅި ހުށަހަޅުމާ މެދު އެވެ.
"މި އުޅެނީ ސަރުކާރު ހުއްޓުމަކަށް ގެންނަން. އެއްގޮތަކަށް ވެސް ހީފުޅު ނުކުރައްވައްޗޭ ސަރުކާރު މިއީ ވަރަށް ބަލިކަށި ސަރުކާރެކޭ. ސަރުކާރު ހުއްޓުމަކަށް ގެނެވިދާނެއޭ. އެކަމެއް ނުކުރޭނެ އެނގޭތޯ. އެއީ ރައްޔިތުންގެ ތަނަވަސް އަގުލަބިއްޔަތަކުން ނިންމީ އެމްޑީޕީއަކަށް ނޭނގެއޭ ވެރިކަން ކުރަން," ރައްދު ދެއްވަމުން އޭނާ ވިދާޅުވި އެވެ.
"އިންތިހާބު ކޮށްފައިވާ ރައީސުލްޖުމްހޫރިއްޔާގެ އަތް ބަންނަން ކުރާ މަސައްކަތަކަށް އަޅުގަނޑުމެން ތާއީދެއް ނުކުރަން,"
އެފަދަ ލިމިޓެއް ކަނޑައެޅިޔަސް ރައީސުލްޖުމްހޫރިއްޔާއަކަށް ގާނޫނު އަސާސީގެ ދަށުން ސިޔާސީ މަގާމުތަކަށް މީހުން އައްޔަނުކުރުމުގެ ބާރު އޮންނާނެ ކަމަށާއި އެމްޑީޕީގެ ސަރުކާރުގައި ގާނޫނަށް ބަދަލު ގެނެސް އެކަން ނުކުރެއްވީ ކީއްވެގެންތޯ އަބްދުއްރަހީމް ސުވާލު ކުރެއްވި އެވެ.
މަޖިލީހުގެ އަދަދު ލިމިޓު ކުރުމަކީ އިދިކޮޅުގެ ވިސްނުމެއް ނޫން ކަމަށާއި އެއީ ޕީޕީއެމް/ޕީއެންސީގެ ވިސްނުމެއް ކަމަށް ވެސް އޭނާ ވިދާޅުވި އެވެ.
"ކޮންމެ ފަސް އަހަރަކުން 10 12 ގޮނޑި އިތުރުވުމަކީ އެންމެ ރަނގަޅު ގޮތެއް ނޫން. އެކަމަކު ވާދަވެރިން އެކަން ކުރައްވަން އެ އުޅުއްވަނީ އެ ވިސްނުމެއްގައި ކަމަށް ގަބޫލެއް ނުކުރަން. އެ އުޅުއްވަނީ އެހެން ވިސްނުންފުޅެއްގައި," އަބްދުއްރަހީމް ވިދާޅުވި އެވެ.
އެ އިސްލާހަށް ސަރުކާރުން ތާއިދުކުރާނެތޯ އަބްދުއްރަހީމް ހާމައެއް ނުކުރައްވަ އެވެ.
