ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އެއްކޮށް ވާދަކުރުމުގެ އެއްވެސް ވިސްނުމެއް އަދި އެއްބަސްވުމެއް ވެސް ނެތް ކަމަށް އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަދި ދަ ޑިމޮކްރެޓްސްއިން ވެސް ބުނެފި އެވެ.
ހިޔާލު ތަފާތުވުންތަކެއް އުފެދި އެކުގައި މަސައްކަތް ނުކުރެވޭ ހިސާބަށް ދިޔުމުން މެމްބަރުންތަކެއް އެމްޑީޕީން ވަކިވެ އުފެއްދި ޑިމޮކްރެޓްސްއާ އެ ޕާޓީއާ ދެމެދު ހޫނު ބަހުގެ ހަމަލާތަކެއް ނިމިދިޔަ ސިޔާސީ ކެމްޕޭނުތަކުގައި ވަނީ ބަދަލުކޮށްފަ އެވެ.
ނަމަވެސް, ބައެއް ގާނޫނުތަކަށް މުހިންމު އިސްލާހުތަކެއް ގެނައުމަށް ދެ ޕާޓީން އެކުގައި މަސައްކަތް ކުރާނެކަން މިއަދު ވަނީ ހާމަކޮށްފަ އެވެ. އެމްޑީޕީގެ ޗެއާޕާސަން ފައްޔާޒް އިސްމާއީލާއި މަޖިލީހުގެ ނައިބު ރައީސް އަހްމަދު ސަލީމާއި ޑިމޮކްރެޓްސްގެ ރައީސް ހަސަން ލަތީފާއި ޕީޖީ ލީޑަރު އަލީ އާޒިމް އެކުގައި ނޫސްވެރިންނާ ބައްދަލުކުރައްވައި އެކަމުގެ މައުލޫމާތު ގެންދަވަނީ ހިއްސާކުރައްވަމުންނެވެ.
"އަޅުގަނޑުމެންގެ ތެރޭގައި ހުރި ހިޔާލު ތަފާތުވުންތައް އަދިވެސް އެބަހުރި. އަޅުގަނޑުމެން މި އުޅެނީ އެއްގޮތަކަށް ވެސް ކައިވެންޏެއް ކުރާކަށް ނޫން. މި މަސައްކަތް ކުރަނީ މި ގައުމުގައި އަޅުގަނޑުމެން ދެ ބައި ވެސް ކަންބޮޑުވާ ކަންތައްތަކެއް ހުރުމީ އެކަންކަން [ހައްލު ކުރަން] މަޖިލިސް ތެރެއިން އެކުގައި މަސައްކަތް ކުރެވޭނެ ގޮތެއް ހޯދަން. އެގޮތަށް އެބަ ލިބޭ, އެއްބަސްވެވޭ ކަންތައްތަކެއްގެ ތެރޭގައި," ފައްޔާޒް ވިދާޅުވި އެވެ.
އެކަމާ ގުޅޭގޮތުން އެއްވެސް ވާހަކައެއް ދެކެވިފައި ނުވާ ކަމަށް ޑިމޮކްރެޓްސްގެ ޕާލިމެންޓަރީ ގްރޫޕްގެ ލީޑަރު އަލީ އާޒިމް ވެސް މިއަދު ހާމަކުރެއްވި އެވެ. އަދި, މަސައްކަތް ކުރަނީ މިވަގުތުގެ ހާލަތުގައި އޮތް ކަންކަމާ ގުޅިގެން ކަމަށް އޭނާ ވިދާޅުވި އެވެ.
"ކުރިއަށް އޮތް މަޖިލިސް ގޮނޑިތައް ހޯދަން އެއްކޮށް ދިޔުމުގެ އެއްވެސް ވިސްނުމެއް އެއްވެސް އެއްބަސްވުމެއް ނެތް. އަޅުގަނޑުމެންގެ ޕާޓީން ހުރިހާ ދާއިރާއަކަށް ވެސް ކުރިމަތިލާނެ. ވިހިވަނަ މަޖިލިސް އެކުލެވިގެން އަންނަ ގޮތަކުން އެ ހިސާބުން އަނެއްކާގައި ވެސް އެކުގައި ސިޔާސީ މަސައްކަތް ކުރާނެތޯ އެއީ އެ ހިސާބުން އެ ވާހަކަ ދައްކާނީ," ފައްޔާޒު ވިދާޅުވި އެވެ.
ރައްޔިތުންގެ މަޖިލީހުގައި މިވަގުތު ތިއްބެވީ އެމްޑީޕީގެ 43 މެމްބަރުން ތިއްބަވާއިރު ޑިމޮކްރެޓްސްގެ 12 މެމްބަރުން ތިއްބަވަ އެވެ. ޑިމޮކްރެޓްސްގެ 12 މެމްބަރުން ވެސް މަޖިލީހަށް އިންތިހާބުވެވަޑައިގަތީ އޭރު ވެރިކަމުގައި އޮތް އެމްޑީޕީގެ ޓިކެޓުގަ އެވެ.
