ރައްޔިތުންގެ މަޖިލީހުގެ އިންތިހާބު ރޯދަ މަހުގެ ފަހުން ބޭއްވުމަށް ގާނޫނަށް ގެންނަަޖެހޭ ބަދަލާއި މަޖިލީހުން ނިންމަން ހުރި އެހެން ބައެއް މަސައްކަތްތައް އަވަސްކުރުމަށް ދައުރުން ބޭރު ޖަލްސާއެއް ބާއްވަން ހުށަހަޅައިފި އެވެ.
މި ޖަލްސާ ބާއްވަން ހުށަހަޅާފައި ވަނީ 38 މެމްބަރުންގެ ސޮޔާ އެކު އެވެ. އޭގެ ތެރޭގައި އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އާއި އެ ޕާޓިން ވަކިވި މެމްބަރުންތަކެއް އުފެއްދި ދަ ޑިމޮކްރެޓްސްއަށް ނިސްބަތްވާ މެމްބަރުން ވެސް ހިމެނެ އެވެ.
ވަޒީރުންނަށް ރުހުން ދިނުމާއި މިނިސްޓްރީތަކުގެ މެންޑޭޓް ފާސްކުރުން ވެސް މި ޖަލްސާ ބާއްވަން ހުށަހެޅި ސަބަބެއްގެ ގޮތުގައި ވަނީ ބަޔާންކޮށްފަ އެވެ.
މަޖިލީހުގެ މިއަހަރުގެ ފުރަތަމަ ދައުރު ފަށާނީ ފެބްރުއަރީ 5، ގަ އެވެ. އެ ޖަލްސާ އޭގެ ކުރިއަށް ބާއްވާނެ ކަމަށް މިއަދު ބޭއްވި ނޫސްވެރިންގެ ބައްދަލުވުމެއްގައި ޑިމޮކްރެޓްސް އާއި އެމްޑީޕީން ހާމަކުރި އެވެ.
ރައްޔިތުންގެ މަޖިލީހުގެ އިންތިހާބު މިހާރު ތާވަލުކޮށްފައި އޮތީ މާޗް 17، އަށެވެ. އެއީ ރޯދަމަހުގެ ހަތް ވަނަ ދުވަހެވެ.
އެކަން ބަދަލުކުރުމަށް ޓަކައި އިހަވަންދޫ ދާއިރާގެ އެމްޑީޕީ މެމްބަރު މުހައްމަދު ޝިފާއު މިއަދު ވަނީ ހުށަހަޅުއްވައިފަ އެވެ. އިންތިހާބުތަކާ ބެހޭ އާންމު ގާނޫނަށް، ރޯދަ މަހު އިންތިހާބުތައް ބޭއްވުން މަނާކުރާ މާއްދާ ހިމެނޭހެން 20 މާއްދާ އިސްލާހުކުރަން އޭނާ ވަނީ ހުށަހަޅާފަ އެވެ.
