ހިޔާލު ތަފާތުވުންތަކެއް އުފެދި އެކުގައި މަސައްކަތް ނުކުރެވޭ ހިސާބަށް ދިޔުމާ އެކު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ވަކިވި މެމްބަރުން އުފެއްދި ދަ ޑިމޮކްރެޓްސްއިން އަންނަ ދައުރުގައި ރައްޔިތުންގެ މަޖިލީހުގައި އެމްޑީޕީއާ އެކުގައި މަސައްކަތް ކުރާނެކަން ހާމަކުރަން މިއަދު ނޫސްވެރިންގެ ބައްދަލުވުމެއް ބާއްވަން ނިންމައިފި އެވެ.
ދެ ޕާޓީ ގުޅިގެން ބާއްވާ ނޫސްވެރިންގެ ބައްދަލުވުމަކަށް މިއަދު ހަވީރު 04:00 އަށް ވަނީ ދައުވަތު ފޮނުވާފަ އެވެ. މިއީ މި ދެ ޕާޓީ އެކުގައި އެއް މޭޒަކުން ރަސްމީ ގޮތުން ފެންނާނެ ފުރަތަމަ ފަހަރެވެ.
މި ބައްދަލުވުމާ ގުޅޭ އެއްވެސް މައުލޫމާތެއް މިހާތަނަށް ދެ ޕާޓީން ކުރެ ޕާޓީއަކުން ހާމަކޮށްފައި ނުވެ އެވެ. ނަމަވެސް, ނަން ނުޖެހުމަށް ޝަރުތުކޮށް "އަދަދު" ނޫހާ ވާހަކަ ދެއްކެވި ޕާޓީއެއްގެ އިސް ބޭފުޅަކު ވަނީ މި ފެށޭ ރައްޔިތުންގެ މަޖިލީހުގެ ދައުރުގައި އެކުގައި ކުރާނެ މަަސައްކަތްތައް ދެ ޕާޓީން ހާމަކުރާނެ ކަމަށް ވިދާޅުވެފަ އެވެ.
"ކުރިއަށް އޮތް ދުވަސްތަކުގައި މުހިންމު ބިލުތަކެއްގެ މަސައްކަތް ދެ ޕާޓީން އެކުގައި ކުރާނެ. އެކަމާ ގުޅޭ ތަފްސީލުތައް ހާމަކުރާނެ ދެ ޕާޓީން," އޭނާ ވިދާޅުވި އެވެ.
އެއްވެސް އިންތިހާބެއް ރޯދަ މަހު ނުބޭއްވޭ ގޮތަށް އެކަން މަނާކުރަން މާއްދާއެއް ހިމަނައި އިންތިހާބުތަކާ ބެހޭ އާންމު ގާނޫނު އިސްލާހުކުރަން ރައްޔިތުންގެ މަޖިލީހަށް މިއަދު ވަނީ ހުށަހަޅާފަ އެވެ.
އޭގެ އިތުރުން, މެމްބަރުން ޕާޓީ ބަދަލުކުރުން ހުއްޓުވުމަށް އެންޓި ޑިފެކްޝަން ގާނޫނެއް ވެސް މި ދައުރުގައި ތެރޭގައި އެމްޑީޕީ އާއި ޑިމޮކްރެޓްސް އެކުވެގެން ފާސްކުރަން މަސައްކަތްކުރަމުންދާ ކަމަށް ވެސް ވަނީ މައުލޫމާތު ލިބިފަ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމާއެކު މި ދެ ޕާޓީގެ މެދުގައި ނުރަސްމީ މަޝްވަރާ ބައްދަލުވުންތައް އަންނަނީ ބާއްވަމުންނެވެ.
ރައްޔިތުންގެ މަޖިލީހުގައި މިވަގުތު ތިއްބެވީ އެމްޑީޕީގެ 43 މެމްބަރުން ތިއްބަވާއިރު ޑިމޮކްރެޓްސްގެ 13 މެމްބަރުން ތިއްބަވަ އެވެ. ޑިމޮކްރެޓްސްގެ 13 މެމްބަރުން ވެސް މަޖިލީހަށް އިންތިހާބުވެވަޑައިގަތީ އޭރު ވެރިކަމުގައި އޮތް އެމްޑީޕީގެ ޓިކެޓުގަ އެވެ.
