ހުޅުމާލޭގެ މުނިސިޕަލް މަސައްކަތްތައް މާލެ ސިޓީ ކައުންސިލަށް ބަދަލުވުމާއެކު ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ގެ 600 އަށްވުރެ ގިނަ މުވައްޒަފުން ކައުންސިލަށް ބަދަލުވާނެ ކަމަށް ސިޓީ ކައުންސިލުން ބުނެފި އެވެ.
ސިޓީ ކައުންސިލުގެ މީޑިއާ އޮފިޝަލް އާމިނަތު ޝަތުފާ މިއަދު ވިދާޅުވީ އެޗްޑީސީގެ މުނިސިޕަލް މަސައްކަތްތައް ކުރާ ބައެއް މުވައްޒަފުން ސިޓީ ކައުންސިލަށް ބަދަލުވާން ދެކޮޅުހަދާފާނެ ކަމަށާއި އެހެންކަމުން ސީދާ އަދަދެއް އަދި ބުނަން ނޭންގޭ ކަމަށެވެ. ކައުންސިލަށް ބަދަލުވާން ދެކޮޅު ހަދަންޖެހޭ ސަބަބެއް އޭނާ ވިދާޅެއްނުވެ އެވެ.
ނަމަވެސް އެޗްޑީސީގެ 600 އަށްވުރެ ގިނަ މުވައްޒަފުން ސިޓީ ކައުންސިލުގެ ދަށަށް ބަދަލުވާނެ ކަމަށް ޝަތުފާ ވިދާޅުވި އެވެ.
ސިޓީ ކައުންސިލުގެ ދަށަށް ބަދަލުވާ އެޗްޑީސީގެ މުވައްޒަފުންގެ މުސާރައަށް އެއްވެސް ބަދަލެއް ނާންނާނެކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ދެއްވާފަ އެވެ. ރައީސް މިގޮތަށް ނިންމެވީ މުނިސިޕަލް ހިދުމަތްތަކާއި އެ މަސައްކަތް ކުރާ މުވައްޒަފުން ސިޓީ ކައުންސިލުގެ ދަށަށް ބަދަލުވާތާ އެއް އަހަރު ދުވަހަށް މުސާރައަށް ބަދަލު ނުގެންނާނެ ކަމަށް އިއުލާނުކުރުމުން މުވައްޒަފުން ކަންބޮޑުވުން ފާޅުކުރުމުންނެވެ.
ހުޅުމާލޭގެ މުނިސިޕަލް މަސައްކަތް އާބަންކޯއިން އަތުލުމަށްފަހު، މާލޭ ސިޓީ ކައުންސިލަށް ބަދަލު ކުރުމަކީ ރައީސް މުއިއްޒުގެ ރިޔާސީ ވައުދެކެވެ. އެއީ ސަރުކާރާ ހަވާލުވެވަޑައިގަންނަވާތާ 100 ދުވަހުގެ ތެރޭގައި ފުއްދަން އެމަނިކުފާނު ވެވަޑައިގެންފައިވާ ވައުދެކެވެ.
ހުޅުމާލެއަކީ މާލެ ސިޓީގެ ބައެއް ނަމަވެސް މިހާތަނަށް އެ ރަށް ބަލަހައްޓަމުންދިޔައީ އެޗްޑީސީއިންނެވެ. އެޗްޑީސީއަކީ ސަރުކާރުގެ ކުންފުންޏެވެ.
މާލޭ ސިޓީ ކައުންސިލުގެ ދަށަށް ހުޅުމާލެ ބެލެހެއްޓުން ބަދަލު ކުރުމަށް މީގެ ކުރިން ވެސް އެ ކައުންސިލް މަސައްކަތް ކުރި އެވެ. ނަމަވެސް ކުރީ ސަރުކާރުން ނިންމީ، އަބަދުވެސް ހުޅުމާލެ ހިންގަމުން އައި ގޮތަށް އެޗްޑީސީގެ ދަށުން ހިންގުމަށެވެ.
