ގައުމުގެ ވެރިކަންކުރާ މާލެ ސިޓީގެ މޭޔަރުގެ މަގާމާ ހަވާލުވުމަށް ފަހު، މާލެ ސިޓީގެ އިހުތިސޯސް ބޮޑު ކޮށްދިނުމަށް ރައީސް ޑރ. މުހައްމަދު މުއިއްޒުގެ އަރިހުން އާ މޭޔަރު އާދަމް އާޒިމް އެދިވަޑައިގެންފި އެވެ.
އިދިކޮޅު އެމްޑީޕީއަށް ނިސްބަތްވާ އާޒިމް ވިދާޅުވީ، މިދިޔަ ދެ އަހަރު ދުވަހު މާލޭގެ މޭޔަރުގެ މަގާމުގައި ހުންނެވީ ރައީސް މުއިއްޒު ކަމަށް ވާތީ މާލެ ރައްޔިތުންނަށް ކުރިމަތިވެފައިވާ މައްސަލަތައް އެމަނިކުފާނު ރަނގަޅަށް ދެނެވަޑައިގަންނަވާ ކަމާ މެދު އެއްވެސް ޝައްކެއް ނުކުރައްވާ ކަމަށެވެ.
އާޒިމް ފުރަތަމަ ވެސް މޭޔަރު ކަމުގައި ހުންނެވި ދުވަސްވަރު ރައީސް މުއިއްޒު ކުރެއްވި ހިދުމަތްތަކަށް ޝުކުރު ދަންނަވައިފަ އެވެ. އެއަށް ފަހު އޭނާ ވަނީ މާލެ ސިޓީގެ އިހުތިސޯސުގެ ތެރެއަށް ހުޅުމާލޭގެ ތިންވަނަ ފިޔަވައްސާއި، ގުޅީފަޅާއި ގިރާވަރުފަޅު ހިމަނައިދެއްވުމަށް އެދިވަޑައިގެންފަ އެވެ.
"މާލޭގެ ރައްޔިތުން އެދެނީ، ބްރިޖަކުން ގުޅައިލެވޭ ސަރަހައްދުތަކަކަށް، ބޯހިޔާވަހިކަމުގެ ހަޔާތަކަށް ދާން، އެ ކަން ކޮށްދެއްވުމަކީ މަނިކުފާނުގެ ސަރުކާރުން އެ ހިތްތަކަށް ދެވޭނެ ތަސައްލީއެއް، މާލޭގެ އިހުތިސޯސުގެ ތެރެއަށް ހުޅުމާލޭގެ ތިންވަނަ ފިޔަވައްސާއި ގުޅީފަޅާއި ގިރާވަރުފަޅު ހިމަނާ ދެއްވާށޭ،" މޭޔަރު ވިދާޅުވި އެވެ.
މޭޔަރު އާޒިމް ވަނީ އެމްޑީޕީގެ ސަރުކާރުން ގްރޭޓާ މާލެ ސަރަހައްދަށް ގެންގުޅުނު ބޯހިޔާވަހިކަމުގެ ބައެއް ސިޔާސަތުތައް މި ސަރުކާރުން ވެސް ތަންފީޒުކޮށްދެއްވުމަށް ވެސް އެދިވަޑައިގެންފަ އެވެ. އޭގެ ތެރޭގައި އުތުރުތިލަފަޅުން މާލޭގެ ދަފްތަރުގައި ހިމެނޭ ރައްޔިތުންނަށް ގެދޮރު ދޫކުރުން ހިމެނެ އެވެ.
މާލޭގެ މީހުން ބޭނުންވަނީ އެ ސިޔާސަތު ކަމަށް ހަރު އަޑުން އާޒިމް ވިދާޅުވިއިރު، ކެމްޕެއިނުގައި އޭނާ ގެންދެވީ މާލެ އަތޮޅުގެ ދެކުނު ސަރަހައްދުގައި ހިމެނޭ ފުށިދިއްގަރުފަޅު ހިއްކައި ރަސްމާލެ ނަމުގައި އަވަށެއް ތަރައްގީ ކުރުމަށް މި ސަރުކާރުން ނިންމާފައިވާ ސިޔާސަތަށް ފާޑުވިދާޅުވެފަ އެވެ.
އާޒިމް މިރޭ ވެސް ތަކުރާރު ކުރެއްވީ، އެންމެ ފުރަތަމަ ތަރައްގީކޮށް މީހުން އާބާދުކުރަން ޖެހޭނީ ސިޓީގެ މައި ރަށް ކަމަށްވާ މާލެއާ ބްރިޖަކުން ގުޅައިލެވެން ހުރި ރަށްރަށް ކަމަށް ވިދާޅުވާ ވާހަކަ އެވެ.
"އަވަސް ތަރައްގީ ކުރެވޭނީ ބްރިޖަކުން ގުޅައިލެވޭ ސަރަހައްދަށް، އެ އަވަށްތަކަށް ތަރައްގީ ގެނެސްދީގެން، ފުރަތަމަ ކުރަންވީ ކަމަކީ އެއީ،" ރައީސް މުއިއްޒާއި ސަރުކާރުގެ ގިނަ ވަޒީރުން ވެސް ބައިވެރިވެވަޑައިގަންނަވާ ޖަލްސާގައި އާޒިމް ވިދާޅުވި އެވެ.
އާޒިމްގެ ވާހަކައިގައި އޭނާ ވަނީ ލާމަރުކަޒީ ނިޒާމު ކުރިއެރުމުގެ ސިޔާސަތެއް ގެންގުޅުމަށް ސަރުކާރުތަކުން މަސައްކަތްކޮށްފައިވާތީ ކުރީގެ ސަރުކާރުތަކަށް ޝުކުރު ދަންނަވައިފަ އެވެ. އަދި އެމްޑީޕީން ރާއްޖެއަށް ތައާރަފުކުރި ނިޒާމެއްގެ ގޮތުގައި ސިފަކުރެއްވުމަށް ފަހު، އާޒިމް ވަނީ އެ ނިޒާމު ކުރިއަށް ގެންދަން މިހާރުގެ ރައީސް މުއިއްޒު ވެސް ނިންމަވާފައިވާތީ އެ ކަމަށް މަރުހަބާ ދަންނަވައިފަ އެވެ.
މާލެ ސިޓީގެ އިހުތިސޯސުގެ ތެރެއަށް ހުޅުމާލޭގެ ތިންވަނަ ފިޔަވައްސާއި ގުޅީފަޅާއި ގިރާވަރުފަޅު ހިމެނުމަށް އާ މޭޔަރު އާޒިމް އެދިވަޑައިގެންނެވިިއިރު އެއީ މޭޔަރު ކަމުގައި ރައީސް މުއިއްޒު ހުންނެވި އިރު ވެސް ކުރުމަށް ސަރުކާރުގައި އެދުނު ކަމެކެވެ. އޭރު ގުޅީފަޅާއި ގިރާވަރުފަޅު ހިއްކުމުގެ މަސައްކަތް ފަށާފައެއް ވެސް ނުވެ އެވެ.
