އަންނަ މާޗު 17، ގައި އޮންނަ ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ކެންޑިޑޭޓުން ކަނޑައަޅަން ބާއްވާ ޕްރައިމަރީ ބޭއްވުމަށް ނިންމާފައިވާ ތާރީހު ކަމަށްވާ ފެބްރުއަރީ 3، ގައި އެ ޕާޓީ ދޫކޮށްދިޔަ މެންބަރުންތަކެއް ވެގެން އުފައްދާފައިވާ ޑިމޮކްރެޓްސްގެ ޕްރައިމަރީ ބޭއްވުމަށް ނިންމައިފި އެވެ.
މީގެ ކުރިން 16 އަހަރު ވަން ދެން އެމްޑީޕީ ލީޑުކުރައްވަމުން ގެންދެވި ކުރީގެ ރައީސް މުހައްމަދު ނަޝީދަށް އެ ޕާޓީގެ ރިޔާސީ ޓިކެޓު ނުލިބުމުން ހިނގައިދިޔަ ދެބަސްވުންތަކަށް ފަހު، އެމަނިކުފާނުގެ ސަޕޯޓަރުން އިސްވެ އުފެއްދި ޑިމޮކްރެޓްސްގެ މަޖިލިސް ޕްރައިމަރީ ބޭއްވުމަށް ފުރަތަމަ ނިންމީ ފެބްރުއަރީ 17، އަށެވެ.
ޑިމޮކްރެޓްސްގެ ޕްރައިމަރީ ބާއްވާ ތާރީހު ކުރިން ކަނޑައެޅީ، އިލެކްޝަންސް ކޮމިޝަނުން މަޖިލިސް އިންތިހާބު ބާއްވާ ތާރީހު އިއުލާން ކުރުމުގެ ކުރިއަށެވެ. މަޖިލިސް އިންތިހާބު މާޗު 17، އަށް ބާއްވަން ނިންމުމުން ކުރިން ކަނޑައެޅި ތާރީހުގައި ޕްރައިމަރީ ބާއްވައިގެން އެ ޕާޓީގެ ކެންޑިޑޭޓުންގެ ފޯމުތައް ހުށަހަޅަން ދަތިވާނެ އެވެ.
ޑިމޮކްރެޓްސްގެ ނިންމުން އާންމުކޮށް، އެ ޕާޓީގެ ވެބްސައިޓުގައި ޝާއިއުކޮށްފައިވާ ލިޔުމުގައިވާ ގޮތުން ޕްރައިމަރީގައި ވޯޓު ދެވޭނީ އަދި ޕްރައިމަރީއަށް ކުރިމަތިލެވޭނީ ވެސް މި މަހު 28، ގެ އިރުއޮއްސި 6:00 ޖަހާއިރުގެ ނިޔަލަށް ޕާޓީގެ މެންބަރުންގެ ގޮތުގައި ތިބޭ މީހުނަށެވެ.
ޕްރައިމަރީއަށް ކުރިމަތިލާން ހުޅުވާލި މުއްދަތުގެ ސުންގަޑިއަކަށް ވެސް މި މަހު 28، ގެ އިރުއޮއްސި 6:00 ޖަހާއިރު ހަމަޖެއްސުމަށް ޕާޓީން ނިންމާފައިވެ އެވެ.
ވިހިވަނަ ރައްޔިތުންގެ މަޖިލީހުގެ އިންތިހާބުގައި ޑިމޮކްރެޓްސްގެ ޓިކެޓުގައި ވާދަކުރާނެ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީ ފެބްރުއަރީ 3، ގައި ބޭއްވުމަށް ހަމަޖެހުނު އިރު އެމްޑީޕީގެ ޕްރައިމަރީ ވެސް އޮންނާނީ އެ ދުވަހުގަ އެވެ.
ވެރިކަންކުރާ ޕީއެންސީ/ޕީޕީއެމުން ވެސް ކެންޑިޑޭޓުން ކަނޑައަޅަން ނިންމާފައި ވަނީ އެތެރޭގެ ޕްރައިމަރީއަކުންނެވެ. ޕްރައިމަރީއަށް ކުރިމަތިލުމަށް ޕާޓީން ކުރިން ނެރުނު އުސޫލަށް ރިއާޔަތްކޮށް، ބައެއް ކެންޑިޑޭޓުންގެ ކެންޑިޑެސީ ބާތިލްކޮށް މައްސަލަ ހޫނުވެގެން ދިޔުމުން މިހާރު ހުރިހާ ކެންޑިޑޭޓުންނަށް ފުރުސަތު ދިނުމަށް އެ ކޯލިޝަނުން ނިންމާފައިވެ އެވެ.
ރައްޔިތުންގެ މަޖިލީހުގެ އިންތިހާބަށް މަސައްކަތްތަކެއް ކުރަމުންދާ މަންޒަރު އަދި ފެންނަނީ އެ ތިން ޕާޓީގެ އިތުރަށް، ވެރިކަންކުރާ ކޯލިޝަނުގައި ހިމެނޭ ޕީޕީއެމުން ވަކިވެވަޑައިގެން ޕީއެންއެފްގެ ނަމުގައި އާ ޕާޓީއެއް އުފެްދެވުމަށް މަސައްކަތް ކުރައްވާ ކުރީގެ ރައީސް އަބްދުﷲ ޔާމީނުގެ ސަޕޯޓަރުންނެވެ.
