ޖެނުއަރީ 13، ގައި ބޭއްވި މާލެ ސިޓީ ކައުންސިލްގެ ބައި-އިލެކްޝަނުގައި، އިދިކޮޅު އެމްޑީޕީގެ ޓިކެޓުގައި މެދު ހެންވޭރު ދާއިރާގެ ކައުންސިލް ގޮނޑިއަށް އިންތިހާބުވި އަހުމަދު ރިޝްވާން ރަޝީދު ވެރިކަންކުރާ ޕީއެންސީއަށް ސޮއިކުރައްވައިފި އެވެ.
އޭނާ މިއަދު ޕީއެންސީއަށް ސޮއިކުރެއްވިއިރު، އާ މޭޔަރާއި ކައުންސިލަށް އަލަށް އިންތިހާބުވި ތިން މެމްބަރުން ހުވާ ކުރެއްވުމުގެ ދަރުބާރު މިރޭ އޮންނާނެ އެވެ. ރައީސް ޑރ. މުހައްމަދު މުއިއްޒު ވެސް ބައިވެރިވެވަޑައިގަންނަވާ އެ ހަފުލާ އޮންނާނީ ދަރުބާރުގޭގަ އެވެ.
ރިޝްވާން ޕީއެންސީއަށް ސޮއިކުރެއްވި ފޯމު، ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުއިއްޒުއާ ހަވާލުކުރައްވާ މަންޒަރުގެ ފޮޓޯއަކާއެކު އެ ކަން ހާމަކުރެއްވީ ޕީއެންސީގެ ރަޖިސްޓްރާ އަފޫ ހާމިދު އެކްސްގައި ކުރެއްވި ޕޯސްޓެއްގަ އެވެ.
ސިޓި ކައުންސިލްގެ މޭޔަރު ހިމެނޭހެން ހަތަރު ގޮނޑިއެއް ހުސްވީ ރައީސް މުއިއްޒުގެ ސަރުކާރުގެ މަގާމުތަކަށް އެ ގޮނޑިތަކުގައި ތިއްބެވި ބޭފުޅުން ވަޑައިގަތުމުންނެވެ. މޭޔަރުގެ ގޮނޑި މިދިޔަ ދެ އަހަރު ފުރުއްވީ ރައީސް މުއިއްޒެވެ.
ބައި-އިލެކްޝަނުގައި އިދިކޮޅު އެމްޑީޕީން ވަނީ މެދު ހެންވޭރު ދާއިރާގެ ގޮނޑީގެ އިތުރަށް މޭޔަރު ގޮނޑި ވެސް ކާމިޔާބުކޮށްފަ އެވެ. ޕީއެންސީއަށް ކާމިޔާބުވީ ހެންވޭރު ދެކުނު ދާއިރާ އަދި މާފަންނު ދެކުނު ދާއިރާ އެވެ.
މާލެ ސިޓީ ކައުންސިލުގެ ބައި-އިލެކްޝަނުގެ ނަތީޖާ
- ހެންވޭރު ދެކުނު ދާއިރާ - އައިމިނަތު އަހުމަދު ރިޝްފާ (ޕީއެންސީ)
- މެދު ހެންވޭރު ދާއިރާ - އަހުމަދު ރިލުވާން ރަޝީދު (އެމްޑީޕީ)
- މާފަންނު ދެކުނު ދާއިރާ - ހަސަން ނިޒާމު (ޕީއެންސީ)
- މޭޔަރު - އާދަމް އާޒިމް (އެމްޑީޕީ)
ސިޓީ ކައުންސިލްގައި މޭޔަރު ހިމެނޭހެން 19 ކައުންސިލަރުން ހިމެނޭ އިރު، ރިޝްވާން ވެސް ހިމެނޭހެން 13 ކައުންސިލަރުންނަކީ ވެރިކަންކުރާ ޕީއެންސީ/ޕީޕީއެމްގެ މެމްބަރުންނެވެ. އޭގެ ތެރެއިން ދެ ކައުންސިލަރުންނަކީ ކުރިން އެހެން ޕާޓީތަކުގައި ތިބެފައި ޕީއެންސީއާ ގުޅުނު މެންބަރުންނެވެ. އިދިކޮޅު ޕާޓީއަށް ނިސްބަތްވާ މޭޔަރަކު ހުރި ނަމަވެސް ކައުންސިލްގެ ސުޕަ މެޖޯރިޓީ އޮތީ ވެރިކަންކުރާ ޕީއެންސީއަށެވެ.
ރިޝްވާން ޕީއެންސީއާ ގުޅިވަޑައިގަތީ ކީއްވެގެން ކަމެއް ހާމަކޮށްފައެއް ނެތެވެ.
ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ ގިނަ މެމްބަރުންތަކެއް ޕީއެންސީއަށް ސޮއިކޮށްފައި ވާއިރު، އެ މެމްބަރުން ޕާޓީ ބަދަލުކުރީ ފައިސާއަށް ކަމަށް ތުހުމަތުކޮށް މަޖިލީހުގެ ބައެއް މެމްބަރުން ވާހަކަ ދައްކަވާފައިވެ އެވެ.
