އިންޑިއާ ސިފައިން ރާއްޖެ ފޮނުވާލުމުގެ ކަންކަން މަޝްވަރާކުރަން ރާއްޖެ އާއި އިންޑިއާ ސަރުކާރުގެ މަތީފަންތީގެ ބޭފުޅުން އެކުލެވޭ ކޯ ގްރޫޕުގެ ބައްދަލުވުމުގައި ދިވެހި ސަރުކާރުން ހުށަހެޅީ ހެލިކޮޕްޓަރާއި ޑޯނިއާ ދުއްވަން ސިފައިންގެ ބަދަލުގައި މަދަނީ މީހުން ގެނައުމަށް ކަމަށް ސަރުކާރުން މިދިޔަ އާދީއްތަ ދުވަހު ބުނެފި އެވެ.
ހެލިކޮޕްޓަރާއި ޑޯނިއާ ދުއްވަން މަދަނީ މީހުން ގެނައުން "އެންމެ ރަނގަޅު" ކަމަށް އިންޑިއާ ސަރުކާރާ ކުރި މަޝްވަރާތަކުގައި ދިވެހި ސަރުކާރުން ބުނެފައިވާ ކަމަށް ރައީސް އޮފީހުން ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް އިބްރާހިމް ވިދާޅުވީ މިދިޔަ އާދީއްތަ ދުވަހު ބޭއްވި ނޫސްވެރިންގެ ބައްދަލުވުމެއްގަ އެވެ.
"ދެން ޑޯނިއާ އޮޕަރޭޓު ކުރުމާއި މިފަދަ ކަންކަމުގައި ވެސް މިލިޓަރީ ބޭފުޅުން ތިއްބެވި ނަމަ މިލިޓަރީ ބޭފުޅުން ހަމަ މި ގައުމު ދޫކޮށް، ދިވެހި ގައުމު ދޫކޮށް ދާން ޖެހޭނެ ކަމާއި އެކަން ކުރުމުގައި ސިވިލް ބޭފުޅުން ތިއްބެވުން އެންމެ ރަނގަޅު ކަމަށް އެގޮތަށް މަޝްވަރާތައް ކުރިއަށް އެދަނީ. ދެން ނިމިގެން ދާނެ ގޮތެއް ދަންނަވަން މާ އަވަސް ކަން ނޭނގެ،" ޖެނުއަރީ 14، ގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނާޒިމް ވިދާޅުވި އެވެ.
ކޯ ގްރޫޕުގެ ބައްދަލުވުމުގައި ދިވެހި ސަރުކާރުން ހުށަހެޅި އަނެއް ކަމަކީ، ރާއްޖޭގައި ތިބި އިންޑިއާގެ 89 ސިފައިން މާޗު 15، ގެ ކުރިން އަނބުރާ ގައުމަށް ގެންދިޔުމެވެ. މިކަމާ ގުޅޭގޮތުން ކުރަން ޖެހޭ މަޝްވަރާތައް ވެސް އެ ދުވަހު ކުރިއަށްގެންދިޔަ ކަމަށް ނާޒިމް ވިދާޅުވި އެވެ.
ސަރުކާރުން ހާމަކޮށްފައިވާ ގޮތުގައި ރާއްޖޭގައި މި ވަގުތު ތިބީ ހެލިކަޕްޓަރު އުދުހުމުގެ މަސައްކަތާ ހަވާލުވެގެން ތިބި އިންޑިއާގެ 50 ސިފައިންނާއި ޑޯނިއާ ފުލައިޓު ދުއްވުމަށް ހާއްސަވެގެން ތިބި 25 ސިފައިންނެވެ. ދެން އިތުރަށް ތިބީ ސެނަހިޔާ އަސްކަރީ ހޮސްޕިޓަލުގައި ބަލި މީހުން ބަލައި އިންޑިއާ ސިފައިންގެ ޑޮކްޓަރުންނެވެ.
ދިވެހި ސަރުކާރުން މިހެން ބުނި ފަހުން މިދިޔަ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އިންޑިއާގެ އެކްސްޓާނަލް މިނިސްޓްރީގެ ތަރުޖަމާނު، ރަންދިރު ޖައިސްވަލް ވަނީ، ސީދާ މިކަން ކަށަވަރުކޮށް ނުދެއްވި ނަމަވެސް، އިންޑިއާ ސަރުކާރުން މަސައްކަތް ކުރަމުން އަންނަނީ އިންޑިއާގެ އޭވިއޭޝަން ޕްލެޓްފޯމުތަކުން އިންސާނީ އެހީ އާއި ބަލި މީހުން އުފުލުން ހުއްޓާ ނުލައި ކުރިއަށް ގެންދެވޭނެ ގޮތެއް ހޯދަން ކަމަށް ވިދާޅުވެފަ އެވެ.
"އެ ދުވަހު އަޅުގަނޑުމެން އާންމު ކުރިން ޕްރެސް ރިލީޒެއް ވެސް، އޭގައި ވެސް އޮންނާނެ އިންޑިއާގެ އޭވިއޭޝަން ޕްލެޓްފޯމުތަކުން އިންސާނީ އެހީއާއި ބަލި މީހުން އުފުލުމުގައި ރާއްޖޭގައި ފޯރުކޮށްދެމުންދާ ހިދުމަތްތައް ދެގައުމުން އެއްބަސްވާ ގޮތެއްގެ މަތިން ކުރިއަށް ގެންދަން ކުރެވުނު މަޝްވަރާތަކުގެ ވާހަކަ،" ޖައިސްވަލް ވިދާޅުވި އެވެ.
ރާއްޖެ އާއި އިންޑިއާ ސަރުކާރާ ދެމެދު ދެން ބާއްވާ މަޝްވަރާތައް އޮންނާނީ އެ ގައުމުގެ އެވެ. ނަމަވެސް އެ ބައްދަލުވުން އޮންނާނެ ވަކި ތާރީހެއް ދެ ގައުމުން ކުރެ އެއްވެސް ގައުމަކުން އަދި ނުބުނެ އެވެ.
ރާއްޖޭގައި މިހާރު އޮތް އިންޑިއާގެ ދެ ހެލިކޮޕްޓަރާއި ޑޯނިއާ މި ސަރުކާރު ވެރިކަމަށް އައި ފަހުން ބޭނުންކޮށްފައެއް ނުވެ އެވެ.
ރައީސް މުއިއްޒުގެ ހާރިޖީ ސިޔާސަތަކީ އިންޑިއާއަށް ރާއްޖެއިން ބަރޯސާވެފައި އޮތް އޮތުން ނައްތާލުން ކަމަށް ސަރުކާރުން ބުނެ އެވެ. އަދި ރާއްޖޭގައި ތިބި އިންޑިއާ ސިފައިން ބޭލުމަކީ އެމަނިކުފާނުގެ ވައުދެކެވެ.
