ރައީސުލްޖުމްހޫރިއްޔާ ޑރ. މުހައްމަދު މުއިއްޒު، މޭޔަރު ކަމުގައި ހުންނެވި ދުވަސްވަރުން ފެށިގެން މާލޭ ސިޓީ ކައުންސިލްގައި ކޮންސަލްޓެންޓެއްގެ ގޮތުގައި މަސައްކަތް ކުރައްވަމުން ގެންދެވި މުހައްމަދު ޝާހިދު، ރައީސް އޮފީހުގެ މިނިސްޓަރު ކަމަށް ވަޑައިގެންނެވި ފަހުން ވެސް ކައުންސިލުގެ މަސައްކަތްތައް ކުރައްވައި އެކަމަށް ފައިސާ ހޯއްދަވަން ބިލު ކުރައްވައިފި އެވެ.
މި މައްސަލައިގައި "އަދަދު" ނޫހުން އެތައް ފަހަރަކު ސުވާލު ކުރުމުން އެ އިންވޮއިސް ކެންސަލް ކުރަން ކައުންސިލްގައި ކުރިން ވެސް ދެންނެވި ކަމަށް ޝާހިދު ވިދާޅުވި އެވެ.
އެ އިންވޮއިސް އަށް ފައިސާ ދޫކޮށްފައި ނެތް ކަމަށް ސިޓީ ކައުންސިލް މިހާރު ހިންގެވުމަށް ހުންނެވި ޑެޕިއުޓީ މޭޔަރު އަހުމަދު ނަރީޝް ވެސް "އަދަދު" ނޫހާ ވާހަކަ ދައްކަވަމުން ވިދާޅުވި އެވެ. އަދި ޝާހިދުއާއެކު ހަދާފައިވާ އެއްބަސްވުން، އޭނާ ރައީސް އޮފީހުގެ މަގާމަށް ވަޑައިގަތުމުން ބާތިލު ވެފައިވާ ކަމަށް ވެސް ނަރީޝް ވިދާޅުވި އެވެ.
ނަމަވެސް އޭނާ ގެންދަވަނީ ކައުންސިލަށް މަސައްކަތް ކޮށްދެއްވަމުންނެވެ.
މި ނޫހަށް ލިބިފައިވާ އިންވޮއިސްއެއްގައިވާ ގޮތުން ޝާހިދު ސިޓީ ކައުންސިލަށް ބިލު ކުރެއްވީ މި ސަރުކާރު އެކުލަވާލި ފަހުން ނޮވެމްބަރު 20، އިން ފެށިގެން ޑިސެމްބަރު 20، އަށް ސިޓީ ކައުންސިލަށް ވަޑައިގެން ކުރެއްވި މަސައްކަތަށެވެ.
އެ މުއްދަތުގައި ރަސްމީ ބަންދު ދުވަސްތައް ފިޔަވައި ހުރިހާ ދުވަހެއްގައި ސިޓީ ކައުންސިލަށް ވަޑައިގެން ކުރެއްވި މަސައްކަތަށް 30،000ރ. ހޯއްދެވުމަށް އޭނާ ބިލުކުރެއްވި އެވެ.
ޝާހިދު ހުށަހެޅުއްވި އިންވޮއިސް
ޝާހިދު ބިލު ކުރެއްވި ބައެއް މަސައްކަތްތައް
- ލޯކަލް މާރުކޭޓް އަޅާ ކުންފުންޏާ މުއާމަލާތްކޮށް، ކޮންސެޕްޓް ޑިޒައިން، ޕްރޮޖެކްޓް ޓައިމްލައިން ފައިނަލް ކުރުން
- ލޯކަލް މާރުކޭޓް އިމާރާތްކުރުމުގެ މަަޝްރޫއު އިފްތިތާހުކުރުމުގެ ތައްޔާރީތައް
- ކައުންސިލް ހައުސިންގެ ގޮތުގައި ސިނަމާލެ ފްލެޓްތައް އަލުން އިމާރާތްކުރުމުގެ މަޝްރޫއުގެ ކޮންސެޕްޓް ޑިޒައިން ފައިނަލް ކުރުން
- އެ މަޝްރޫއަށް ހިނގާނެ ހަރަދު ދެނެގަނެ ޝެޑިއުލް އެކުލަވައިލުން
- ވިލިމާލެ ބީޑީޔޫ ވިލިމާލެ ކޮމިއުނިޓީ ޕްރޮޖެކްޓް ހިންގާ ކުންފުންޏާ ނެގޯޝިއޭޓްކުރުން
- ޕާކިން ބިލްޑިންގެ ކުރެހުންތައް ޑިވެލޮޕަރުންނާ އެކު މުރާޖައާކުރުން
މި މަސައްކަތްތަކުގެ އިތުރުން ވަރަށް ގިނަ އެހެން މަސައްކަތްތައް ވެސް ޝާހިދު ސިޓީ ކައުންސިލަށް ހުށަހެޅުއްވި އިންވޮއިސްގައި ހިމަނުއްވާފައި ވެ އެވެ.
ރައީސް އޮފީހުގެ މިނިސްޓަރުން މިހާރު ވެސް ސިޓީ ކައުންސިލްގެ މަސައްކަތްތައް ކުރައްވަމުން ގެންދަވާތީ ބައެއް ކައުންސިލަރުނާއި އިންތިހާބީ މޭޔަރު އާދަމް އާޒިމް ވެސް ކަންބޮޑުވުން ފާޅުކުރައްވާފައިވެ އެވެ.
