ރައްޔިތުންގެ މަޖިލީހަށް މެމްބަރުން ހޮވަން އަންނަ މާޗްމަހު ބާއްވާ އިންތިހާބުގައި އިދިކޮޅު އެމްޑީޕީގެ ފަރާތުން ވާދަކުރާނެ ކެންޑިޑޭޓުން ކަނޑައަޅަން ބާއްވާ ޕްރައިމަރީ އަންނަ މަހުގެ ތިންވަނަ ދުވަހަށް ތާވަލުކޮށްފި އެވެ.
ރާއްޖޭގެ އިންތިހާބުތަކުގައި އެންމެ ކާމިޔާބު ޓްރެކް ރެކޯޑެއް އޮތް އެމްޑީޕީން މިއަދު ވަނީ އެ ޕާޓީގެ އެތެރޭގެ ޕްރައިމަރީތައް ބާއްވާނެ ދާއިރާތަކާއި އެ ދާއިރާތަކަށް ވާދަކުރާ ކެންޑިޑޭޓުންގެ ލިސްޓު އާންމުކޮށްފަ އެވެ.
އެ ލިސްޓާއެކު ޕާޓީން ކުރި އިއުލާނުގައިވާ ގޮތުން ޕްރައިމަރީ ބޭއްވުމަށް ހަމަޖެހިފައިވާ ތާރީހަކީ ފެބްރުއަރީ މަހު ތިންވަނަ ދުވަހެވެ.
ޕްރައިމަރީއަށް ކުރިމަތިލާން ހުޅުވައިލި ފުރުސަތުގައި އެންމެ ކެންޑިޑޭޓަކު ކުރިމަތިލާފައިވުމުން 36 ދާއިރާއެއްގެ ޕްރައިމަރީއެއް ނޯވެ އެވެ. އެމްޑީޕީން މިއަދު އާންމުކުރި ޕްރައިމަރީ އޮންނަ ދާއިރާތަކުގެ ލިސްޓުގައިވާ ގޮތުން އެޕާޓީން ބާއްވާނީ 43 ދާއިރާގެ ޕްރައިމަރީ އެވެ.
ވިހިވަނަ ރައްޔިތުންގެ މަޖިލީހަށް 93 ދާއިރާއަށް މެންބަރުން އިންތިހާބު ކުރާނެ އެވެ. އެހެންކަމުން އެމްޑީޕީގެ ޓިކެޓަށް ކުރިމަތިލާން ހުޅުވާލި ފުރުސަތުގައި 14 ދާއިރާއަކަށް ކުރިމަތިލާފައިނުވާ ކަމަށް ދައްކަ އެވެ.
ކެންޑިޑޭޓުން ކުރިމަތިލާފައިނުވާ ބައެއް ދާއިރާތަކަށް ކުރިމަތިލާނެ ކަމަށް ބައެއް އިސް ބޭފުޅުން މި ފަހުން ވިދާޅުވެފައި ވެސް ވެ އެވެ. އެ ގޮތުން ކުރެންދޫ ދާއިރާއަށް، މިހާރު ހުޅުމާލެ ދާއިރާގެ މެންބަރު އަލީ ނިޔާޒު ވާދަކުރައްވާނެ ކަން އިއުލާން ކުރައްވާފައިވެ އެވެ.
އެންމެ ފަހުން ބޭއްވި ރައްޔިތުންގެ މަޖިލިހުގެ އިންތިހާބުގައި އެމްޑީޕީން ބޮޑު ކާމިޔާބީއެއް ހޯދާފައިވެ އެވެ. 2019 ވަނަ އަހަރު ބޭއްވި އެ އިންތިހާބުގައި އެ ޕާޓީން ވަނީ 87 ދާއިރާގެ ތެރެެއިން 65 ދާއިރާ ކާމިޔާބުކޮށްފަ އެވެ. އެއީ އެއް ޕާޓީއަކަށް އެހާ ބޮޑު މެޖޯރިޓީއެއް ލިބުނު ހަމައެކަނި ފަހަރެވެ.
