އަންނަ މާޗު މަހު ބާއްވާ ރައްޔިތުންގެ މަޖިލިސް އިންތިހާބު އެމްޑީޕީން ބޮޑު އަގުލަބިއްޔަތަކުން ކާމިޔާބުކުރާނެ ކަމަށް މާލޭ މޭޔަރުކަމަށް އިންތިހާބުވި އާދަމް އާޒިމް މިރޭ ވިދާޅުވެއްޖެ އެވެ.
މޭޔަރުކަމަށް އިންތިހާބުވުން ފާހަގަކުރުމަށް މިރޭ ސަލްޓަން ޕާކުގައި ބޭއްވި ޖަލްސާގައި އާޒިމް ވިދާޅުވީ، ދެން އެންމެ ބޮޑު އަމާޒަކީ މަޖްލިސް އިންތިހާބު ކަމަށާއި، އެ އިންތިހާބު ކާމިޔާބު ކުރާނީ ބޮޑު އަގުލަބިއްޔަތުން ކަމަށެވެ.
"އަޅުގަނޑުމެންނަށް ބައެއް ފަހަރު މާޔޫސްކަން ފެނުނަސް ފަހަތެއް ނުފެނޭ. އަޅުގަނޑުމެންނަށް ފެންނަނީ ކުރި. އެމްޑީޕީގެ ކުރިމަގު ވަރަށް އުޖާލާ" އާޒިމް ވިދާޅުވި އެވެ.
އޭނާ ވިދާޅުވީ އެމްޑީޕީއިން އަބަދުވެސް ފެންނަނީ ކޮންމެ ކާމިޔާބީއަކާ އެކީވެސް މަޑުކޮށްލާތަން ކަމަށާއި، އެކަން ބަދަލުކޮށް ކޮންމެ ކާމިޔާބީއަކާ އެކު ގަދަޔަށް، ބާރަށް މަސައްކަތް ކުރަން ޖެހޭ ކަމަށެވެ.
އާޒިމް ވިދާޅުވީ ހުރިހާ މެންބަރުން ވެސް މަސައްކަތްކުރަންވީ ޕާޓީ އިތުރަށް ވަރުގަދަކުރުމަށް ކަމަށެވެ.
"އަޅުގަނޑު ބުނަން އޮތް ވާހަކައަކީ މި ޕާޓީން މަސައްކަތް ކުރަނީ މުޅި ގައުމުގެ ހުރިހާ ރައްޔިތުންނަށް ކަންތައްތައް ކޮށްދޭށޭ. އަޅުގަނޑުމެން ބޭނުމެއް ނުވޭ ކަންތައްތަކުގަ ސަލާންޖަހާކަށެއް" އާޒިމް ވިދާޅުވި އެވެ.
މޭޔަރުކަމަށް އިންތިހާބުވި އާޒިމް ވިދާޅުވީ، މިވަގުތު މާލެ ސަރަހައްދަށް އެންމެ ބޭނުންޖެހިފައިވާ ކަމަކީ ބޯހިޔާވަހިކަން ކަމަށެވެ.
ގެދޮރުވެރިކަމަށް ބޭނުން ޖެހިފައިވާ ރައްޔިތެއް ނަމަ އެ ރައްޔިތަކަށް ނިމިދިޔަ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ގޯތި ދީފައިވާކަމަށް ވިދާޅުވަމުން އާޒިމް ވިދާޅުވީ، ގިރާވަރު، ގުޅީފަޅު އަދި އުތުރުތިލަފަޅު އަދި ހުޅުމާލެއިން ދީފައިވާ ގޯތިތައް ކަށަވަރު ކޮށްދެއްވާނެ ކަމަށެވެ.
އާޒިމްގެ އިތުރުން މިއަދުގެ އިންތިހާބުގައި ވާދަ ކުރެއްވީ ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ކެންޑިޑޭޓު އާޒިމާ ޝަކޫރާއި ދަ ޑިމޮކްރެޓްސްގެ ކެންޑިޑޭޓު ސައިފު ފާތިހާއި އަމިއްލަ ގޮތުން ވާދަ ކުރެއްވި ހުސެއިން ވަހީދާއި ޝުއައިބު އަލީ އެވެ.
އާޒިމް މޭޔަރު އިންތިހާބު ކާމިޔާބުކުރެއްވީ 44.8 ޕަސެންޓު ކާމިޔާބުކުރައްވައިގެންނެވެ. ދެވަނައަށް އެންމެ ގިނަ ވޯޓު ހޯއްދެވި ކުރީގެ ބަންޑާރަ ނައިބު އަދި ރައީސް އޮފީހުގެ މިނިސްޓަރު، އާޒިމާ ޝަކޫރަށް ލިބިވަޑައިގެންނެވީ 29.6 ޕަސެންޓެވެ.
މިއަދުގެ އިންތިހާބުގައި 54،680 މީހުންނަށް ވޯޓުލުމުގެ ހައްގު ލިބުނެވެ. ނަމަވެސް ވޯޓުލާން ނުކުތީ 31 ޕަސެންޓު މީހުންނެވެ. އެއީ 17442 މީހުންނެވެ.
