މާލޭ ރައްޔިތުންގެ އިހުސާސްތަކާ އެއްގޮތަށް މަސައްކަތް ކުރުމުގައި އެމްޑީޕީން ސާބިތުކަމާއެކު ދެމިއޮންނާނެ ކަމަށް ކުރީގެ ރައީސް އަދި އެމްޑީޕީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ މިއަދު ބޭއްވި މާލެ ސިޓީއަށް މޭޔަރަކު ހޮވުމަށް ބޭއްވި ބައި-އިލެކްޝަން, އާދަމް އާޒިމް ކާމިޔާބު ކުރެއްވުމުންނެވެ. އެ އިންތިހާބު ބޮޑު އަގުލަބިއްޔަތަކުން ކާމިޔާބު ކުރުމުން ރައީސް ސޯލިހު ވަނީ, އޭނާއަށް މަރުހަބާ ވިދާޅުވެފަ އެވެ.
"މިއަދު ބޭއްވި މާލޭ މޭޔަރގެ ބައިއިލެކްޝަން ތަނަވަސް އަޤްލަބިއްޔަތަކުން ކާމިޔާބު ކުރެއްވި އާދަމް އާޒިމް އަށް އިހުލާސްތެރި މަރުހަބާ ދަންނަވަން. މާލޭގެ ރައްޔިތުންގެ އިހުސާސްތަކާ އެއްގޮތަށް މަސައްކަތްކުރުމުގައި އެމްޑީޕީ ސާބިތުވެ ދެމިއޮންނާނެ،" ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި އެމަނިކުފާނު ވިދާޅުވި އެވެ.
އިންތިހާބުގެ ރަސްމީ ނަތީޖާ އިއުލާނު ނުކުރި ނަމަވެސް, މިހާތަނަށް ގުނި 47 ފޮށީގެ ނަތީޖާއިން ދައްކާ ގޮތުގައި އާޒިމަށް އިންތިހާބު ކާމިޔާބުވެއްޖެ އެވެ. އޭނާއަށް ވަނީ މި އިންތިހާބުގައި 6000 އަށްވުރެ ގިނަ ވޯޓު ލިބިފަ އެވެ.
މާލޭގެ މޭޔަރުގެ މަގާމަށް ފަސް ކެންޑިޑޭޓުން ވާދަ ކުރެއްވި އެވެ. އެއީ އާޒިމްގެ އިތުރުން ސަރުކާރު ހިންގާ ޕީއެންސީގެ ކެންޑިޑޭޓު އާޒިމާ ޝަކޫރާއި ދަ ޑިމޮކްރެޓްސްގެ ސައިފް ފާތިހާއި އަމިއްލަ ގޮތުން ވާދަ ކުރައްވާ ހުސެއިން ވަހީދާއި ޝުއައިބު އަލީ އެވެ.
އާދަމް އާޒިމް މިދިޔަ ސަރުކާރުގައި ހުންނެވީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ސީއީއޯގެ މަގާމުގަ އެވެ. އެ ސަރުކާރުގައި ފުރަތަމަ ހުންނެވީ މޯލްޑިވްސް ވޯޓާ އެންޑް ސްވަރޭޖު ކޮމްޕެނީ (އެމްޑަބްލިޔުއެސްސީ)ގެ މެނޭޖިން ޑިރެކްޓަރަކަށެވެ.
އޭގެ ކުރިން ވެސް އާޒިމް ވަނީ ސަރުކާރާއި އަމިއްލަ ކުންފުނިތަކުގައި އިސް މަގާމުތަކެއް އަދާކުރައްވާފަ އެވެ. އެކަމަކު މިއީ އިންތިހާބެއްގައި ވާދަކޮށްގެން އޭނާއަށް މަގާމަކަށް އާދެވުނު ފުރަތަމަ ފަހަރެވެ.
