މާލެ ސިޓީގެ މޭޔަރުގެ ބައި-އިލެކްޝަންގައި އާދަމް އާޒިމަށް ލިބުނު ކާމިޔާބަކީ ހައްސާސް ދަނޑިވަޅެއްގައި ލިބުނު މުހިންމު ކާމިޔާބެއް ކަމަށް އާޒިމް ވާދަކުރެއްވި ޕާޓީ، އެމްޑީޕީގެ ޗެއާޕާސަން ފައްޔާޒް އިސްމާއިލް މިރޭ ވިދާޅުވެއްޖެ އެވެ.
ބައި އިލެކްޝަންގެ ވަގުތީ ނަތީޖާތައް ދައްކާ ގޮތުން އެ އިންތިހާބު ބޮޑު ތަފާތަކުން އާޒިމް ވަނީ ކާމިޔާބު ކުރައްވައިފަ އެވެ. އާޒިމަށް 6،000 އަށްވުރެ ގިނަ ވޯޓު މިހާތަނަށް ލިބިފައިވެ އެވެ. އެއީ ވޯޓުލީ މީހުންގެ ތެރެއިން 45 ޕަސެންޓު ވޯޓެވެ.
އާޒިމް އާއި އެމްޑީޕީއަށް މަރުހަބާ ކިޔައި އެކްސް ގައި ކުރެއްވި ޕޯސްޓުގައި ފައްޔާޒް ވިދާޅުވީ މިއީ ހައްސާސް ދަނޑިވަޅެއްގައި ލިބުނު މުހިންމު ކާމިޔާބެއް ކަމަށެވެ.
"މިއީ ހައްސާސް ދަނޑިވަޅެއްގައި މާލޭގެ ރައްޔިތުން އަދި ޖުމްލަކޮށް ދިވެހިންނަށް ލިބުނު މުހިންމު ކާމިޔާބެއް. މުހިންމު މެސެޖެއް،" ފައްޔާޒް ވިދާޅުވި އެވެ.
ފައްޔާޒާ އެންމެ ގާތުން ދެން ވާދަ ކުރައްވަނީ ސަރުކާރު ތަމްސީލް ކުރާ ޕީއެންސީގެ އާޒިމާ ޝަކޫރެވެ. އެއީ 4،000 އަށްވުރެ ގިނަ ވޯޓާއެކު ވޯޓު ލީ މީހުންގެ 29 އިންސައްތަ އެވެ.
އިންތިހާބުގައި ދެން ވާދަކުރައްވަނީ އަމިއްލަ ގޮތުން ޝުއައިބު އަލީ، ހުސެއިން ވަހީދު އަދި ޑިމޮކްރެޓްސްގެ ސައިފު ފާތިހެވެ.
