މިހާރަށްވުރެ ގިނައިން ޗައިނާގެ ފަތުރުވެރިން ރާއްޖެއަށް ޒިޔާރަތް ކުރަން ބާރު އެޅުމަށް ޗައިނާގެ ސަރުކާރުން އޮތީ ތައްޔާރަށް ކަމަށް އެ ގައުމުން ރާއްޖެއަށް ކަނޑައަޅާފައިވާ ސަފީރު ވަން ލިޖިން މިއަދު ވިދާޅުވެއްޖެ އެވެ.
ފަތުރުވެރިކަމަކީ ރާއްޖޭގެ އިގްތިސާދަށް މުހިންމު ސިނާއަތެއްކަން ފާހަގަ ކުރައްވަމުން ޗައިނާގެ ސީޖީޓީއެން ރޭޑިއޯއަށް ދެއްވި އިންޓަވިއުއެއްގައި ސަފީރު ވިދާޅުވީ އެ ދާއިރާއިން ގުޅުން ބަދަހި ކުރުމަކީ ދެ ގައުމުން އެދޭ ގޮތް ކަމަށެވެ.
"ޗައިނާގެ ފަތުރުވެރިން ރާއްޖެއަށް ޒިޔާރަތް ކުރަން ބާރު އަޅަން ޗައިނާގެ ސަރުކާރުން އޮތީ ތައްޔާރަށް. ފަތުރުވެރިކަމުގެ ދާއިރާއިން ދެ ގައުމުން ގުޅިގެން އެކީގައި މަސައްކަތް ކުރަން ރާއްޖެއިން ވެސް ވަރަށް ބޮޑަށް ބޭނުންވޭ،" އޭނާ ވިދާޅުވި އެވެ.
ވަން ލިޖިން ވިދާޅުވީ މީގެ ކުރިން ވެސް ޗައިނާއަކީ ރާއްޖެއަށް އެންމެ ގިނައިން ފަތުރުވެރިން އަންނަ ގައުމު ކަމަށާއި ރާއްޖޭގެ ފަތުރުވެރިކަން ޗައިނާގައި ޕްރޮމޯޓު ކުރުމަށް މިހާރު ވެސް ވާހަކަ ދައްކަމުން އަންނަ ކަމަށެވެ.
"ދިވެހިރާއްޖެއަކީ ޗައިނާގެ ފަތުރުވެރިންގެ މެދުގައި އެންމެ މަގުބޫލު އެއް ގައުމު. ކޮވިޑުގެ ކުރިން، ގާތްގަނޑަކަށް 10 ވަރަކަށް އަހަރު ވަންދެން، ރާއްޖެއަށް އެންމެ ގިނައިން ފަތުރުވެރިން ދިޔައީ ޗައިނާއިން،" ސަފީރު ވިދާޅުވި އެވެ. "ރާއްޖޭގެ ވަފުދެއް ޗައިނާއަށް އައިސް ފަތުރުވެރިކަން ޕްރޮމޯޓު ކުރަން މަސައްކަތް ކުރާނެ. އަދި މިހާރު ވެސް، ދެ ގައުމުގެ ދޭތެރޭގައި ޑައިރެކްޓް ފްލައިޓު އިތުރު ކުރަން ދަނީ ވާހަކަ ދައްކަމުން." އޭނާ ވިދާޅުވި އެވެ.
އެ އިންޓަވިއުގައި ސަފީރު ވިދާޅުވީ ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުގެ ސަބަބުން އިންފްރާސްޓްރަކްޗާ އާއި ކޮންސްޓްރަކްޝަންގެ ދާއިރާ އާއި ފެހި، ނޫ، އަދި ޑިޖިޓަލް އިގްތިސާދުގެ ދާއިރާ އާއި ފަތުރުވެރިކަމާއި ކުޅިވަރުގެ ދާއިރާއިން ދެ ގައުމުގެ ގުޅުން އިތުރަށް ބަދަހިވާނެ ކަމަށެވެ.
"ކުރިއަށް އޮތް ތަނުގައި އިންފްރާސްޓްރަކްޗާ އާއި ކޮންސްޓްރަކްޝަންގެ ދާއިރާއިން ގުޅުން ބަދަހިވާނެ ކަމަށް އުއްމީދު ކުރެވޭ. އޭގެ ތެރޭގައި މަގު ހެދުމާއި ސޯޝަލް ހައުސިން އަދި ހޮސްޕިޓަލްތައް ބިނާކުރުން ހިމެނޭ. މިފަދަ ކަންކަމުން އާންމުންގެ ދިރިއުޅުމަށް ފަސޭހަތަކެއް ލިބޭނެ. ދެ ވަނަ ކަމަކީ، ނޫ އިގްތިސާދު، ފެހި އިގްތިސާދު އަދި ޑިޖިޓަލް އިގްތިސާދު. ތިން ވަނަ ކަމަކީ ދެ ގައުމުގެ ރައްޔިތުންގެ މެދުގައި އޮންނަ ގުޅުން. އޭގެ ތެރޭގައި ފަތުރުވެރިކަމާއި ކުޅިވަރުގެ ދާއިރާ ހިމެނޭ،" ވަން ލިޖިން ވިދާޅުވި އެވެ.
ސަފީރު ވިދާޅުވީ ރައީސް މުއިއްޒު ޗައިނާއަށް ކުރެއްވި ދަތުރުގައި ޗައިނާގެ ވިޔަފާރިވެރިން ރާއްޖޭގައި އިންވެސްޓު ކުރުމަށް އެމަނިކުފާނު ވަރަށް ބޮޑަށް މަސައްކަތް ކުރެއްވި ކަމަށެވެ.
"ޕްރޮޓޮކޯލް ހަމަޖައްސާފައި އޮތީ ބިޒްނަސް ފޯރަމަށްފަހު ރައީސް މުއިއްޒު އެތަނުން ވަޑައިގަތުމަށް. އެކަމަކު ރައީސް މުއިއްޒު މަޑު ކުރެއްވުމަށްފަހު ދެ ގައުމުގެ ވިޔަފާރިވެރިންނާ ވަކިވަކިން ބައްދަލު ކުރައްވާ ހުރިހާ ބޭފުޅުންނާ ސަލާމް ކުރައްވާ ވާހަކަ ދެއްކެވި. އަދި ރާއްޖެއާއެކު ގާތް ގުޅުމެއް ބޭއްވުމަށް ހާއްސަކޮށް ޗައިނާގެ ވިޔަފާރިވެރިންގެ ކިބައިން އެދިވަޑައިގެންނެވި،" ސަފީރު ވިދާޅުވި އެވެ.
"އޭގެ ސަބަބުން ޗައިނާގެ ވިޔަފާރިވެރިން ރާއްޖޭގައި އިންވެސްޓު ކުރުމަށް ބާރު އެޅޭނެ. އަދި އެކަމަކީ ރާއްޖޭގެ ވިޔަފާރިވެރިން ޗައިނާއަށް މުދާ އެކްސްޕޯޓު ކުރުމަށް ވެސް އެޅޭ ބާރަކަށް ވާނެ. ހާއްސަކޮށް މެރިން ޕްރޮޑަކްޓްސް."
ޖެނުއަރީ 7، ފެށިގެން ރައީސް މުއިއްޒު ޗައިނާއަށް ކުރެއްވި ދަތުރު ނިންމާލެއްވީ ހުކުރު ދުވަހެވެ. އެ ދަތުރުގައި ޗައިނާ އާއި ރާއްޖެއާ ދެމެދު 20 އެއްބަސްވުމެއްގައި ސޮއި ކުރި އެވެ. އޭގެ ތެރޭގައި ފަތުރުވެރިކަމުގެ ދާއިރާއިން ގުޅުން ބަދަހި ކުރުމުގެ އެއްބަސްވުމެއް ވެސް ހިމެނެ އެވެ. އަދި ގުޅިފަޅާއި ގިރާވަރުފަޅާއި ފުށިދިއްގަރުފަޅުގެ މަގު ހެދުމާއި ޔުޓިލިޓީސް ބިނާކުރުން ހިމެނެ އެވެ.
