ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި އެމަނިކުފާނުގެ އަނބިކަނބަލުން ސާޖިދާ މުހައްމަދު ޗައިނާއަށް ކުރެއްވި ރަސްމީ ދަތުރު ރޭ ވަނީ ނިންމާލައިފަ އެވެ.
ޗައިނާގެ ރައީސް ޝީ ޖިންޕިންގެ ދައުވަތަށް ކުރެއްވި މި ދަތުރަކީ ރައީސްކަމުގެ ހުވާކުރެއްވުމަށް ފަހު އެމަނިކުފާނު ރާއްޖެއިން ބޭރަށް ކުރެއްވި ފުރަތަމަ ފުރަމާނަ ދަތުރެވެ.
މި ދަތުރުގައި ދެ ރައީސުން ވަނީ ރަސްމީ ވާހަކަތައް ބާއްވާފައި، ދާއިރާތަކުން 20 އެއްބަސްވުމެއްގައި ސޮއިކޮށްފަ އެވެ.
ރައީސްގެ ދެ ކަނބަލުން ޗައިނާގެ މުހިންމު ބައެއް ތަންތަނަށް ޒިޔާރަތްކުރައްވައި, ހަރަކާތްތަކުގައި ބައިވެރިވެ ވަޑައިގެންނެވުމުގެ އިތުރުން ސަގާފީ, އިގްތިސޯދީ އަދި ސިޔާސީ ގޮތުން ދެ ގައުމުގެ ގުޅުން ބަދަހިކުރެއްވުމަށް މަތީ ފެންވަރުގެ މަޝްވަރާތައް ކުރިއަށް ގެންދަވާފައި އެވެ.
ރާއްޖޭގެ އެކި ދާއިރާތަކަށް ޗައިނާގެ ވިޔަފާރިވެރިން ޝައުގުވެރިކުރަން، އިންވެސްޓް މޯލްޑިވްސް ނަމުގައި ފޯރަމެއް ވެސް ބޭއްވި އެވެ.
އެ ފޯރަމްގައި ރައީސް މުއިއްޒު ވިދާޅުވީ ޗައިނާއަކީ ރާއްޖޭގެ އުމްރާނީ ތަރައްގީގެ މުހިންމު ބައިވެރިޔާ ކަމަށެވެ.
ސަރުކާރުގެ މަތީ ފަންތީގެ ވަފުދެއް ވެސް ބައިވެރިވެ ވަޑައިގެންނެވި މި ދަތުރުގައި ރައީސްގެ ދެކަނބަލުން ވަނީ ޗައިނާގެ ވެރިރަށް ބެއިޖިންގައި ދިރިއުޅޭ ދިވެހިންނާ ވެސް ބައްދަލު ކުރައްވައިފަ އެވެ.
ރައީސްގެ ވަފުދު އެނބުރި މާލެ ވަޑައިގަންނަވާނީ ދުބާއީގައި މަޑުކުރެއްވުމަށް ފަހު، މިއަދުގެ މެންދުރު ފަހުގެ ވަގުތެއްގަ އެވެ.
