ރައީސް ޑރ.މުހައްމަދު މުއިއްޒު ޗައިނާއަށް ކުރެއްވި ރަސްމީ ދަތުރުފުޅުގައި، ސަރުކާރުން އެގައުމާ އެކު ހަގީގަތް ނޭނގޭ އެއްބަސްވުންތަކެއްގައި ސޮއިކޮށްފައިވާ ކަމަށް ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ރޭ ވިދާޅުވެއްޖެ އެވެ.
މާލޭގެ މޭޔަރުކަމަށް އެމްޑީޕީގެ ފަރާތުން ވާދަކުރައްވާ އާދަމް އާޒިމަށް ކެމްޕޭންކުރަން ރޭ ބޭއްވި ޖަލްސާގައި ފައްޔާޒް ވިދާޅުވީ ޗައިނާއާ އެކު ސޮއިކުރީ 20 އެމްއޯޔޫގައި ކަމަށް ސަރުކާރުން ބުނި ނަމަވެސް 30 އެއްބަސްވުމެއްގައި ސޮއިކުރި ކަމަށެެވެ. އޭނާ ތުހުމަތުކުރެއްވި ގޮތުގައި ހދ. މަކުނުދުއާ ގުޅޭ އެއްބަސްވުމެއް އޭގެ ތެރޭގައި ހިމެނެ އެވެ.
"އަޅުގަނޑުމެންގެ ސަރުކާރުގައި އިންޑިއާއާ އެކު 100 އެެގްރިމެންޓް ހަދާފައި އޮތް ވާހަކަ އެއީ ވަރަށް ބިރުވެރި ވާހަކައަކަށް ވެގެން އުޅުނީ. ދެމަސް ނުވަނީސް 20 އެމްއޯޔޫގައި ސޮއިކޮށްލާފައި އެއައީ، އެއީ ފަސްބައިކޮށްފައި އެއްބައި. އަޅުގަނޑުމެން ފަސް އަހަރު، 100 އޭ އެ ބުނަނީ އަޅުގަނޑަކަށް އޭގެ އަދި ހަގީގަތެއް ނުވެސް އެނގޭ. ވިއްސެއް ނޫން ކުރީކީ ވެސް، 20 އެގްރިމެންޓެއް ނޫން ކުރީކީ، މި ދަންނަވަނީ ވަރަށް ސާފުކޮށް އެނގިގެން، 30 އެގްރިމެންޓްގައި ސޮއިކޮށްފައި އައީ،" ފައްޔާޒް ވިދާޅުވި އެެވެ.
ސޮއިކުރި އެއްބަސްވުންތަކުގެ ތެރޭގައި ހދ.މަކުނުދުއާ ގުޅޭ އެއްބަސްވުމެއް ހިމެނޭ ކަމަށް ތުހުމަތުކުރައްވައި ފައްޔާޒް ވިދާޅުވީ އެ އެއްބަސްވުމުގެ ހަގީގަތް ބަލަން ބޭނުން ކަމަށާއި ރައްޔިތުންނަށް އެ އެއްބަސްވުމުގެ ހަގީގަތް އެނގެން ޖެހޭ ކަަމަށެވެ.
"އަޅުގަނޑުމެންގެ ރައްޔިތުން އެނގެން ބޭނުންވޭ މަކުނުދޫ އާއި ބެހޭ ގޮތުން ސޮއިކުރެއްވީ ކޯއްޗެއްތޯ ޗައިނާއާ އެކު. އަޅުގަނޑުމެން ބަލަން ބޭނުންވޭ ފުށިދިއްގަރަށް ބޮޑުތިލަދުންމަތީގެ އެންމެން ގެނެސް އަޅާލައިފައި މަކުނުދޫ ހިސާބު ކޮންބަޔަަކަށް ދޭން، ކީއްކުރަައްވަންތޯ އުޅެނީ،" ފައްޔާޒް ވިދާޅުވި އެވެ.
ރިޔާސީ އިންތިހާބުގެ ކެމްޕޭނުގައި ރައީސް ޑރ.މުހައްމަދު މުއިއްޒު ވެވަޑައިގެންނެވި އެއް ވައުދަކީ އެމަނިކުފާނުގެ ސަރުކާރުގައި އެއްވެސް ކަމެއް ނުފޮރުވަން ވެވަޑައިގެންނެވި ވައުދެވެ. ފައްޔާޒް ތުހުމަތުކުރެއްވި ގޮތުގައި އެ ވައުދާ އެއްގޮތަށް ސަރުކާރުން އަމަލެއް ނުކުރެ އެވެ.
