ގދ. ތިނަދޫއަށް ސިޓީއެއްގެ ދަރަޖަ ދީފައިވީ ނަމަވެސް ލޯކަލް ކައުންސިލް އިންތިހާބު ބާއްވައި، ސިޓީ ކައުންސިލެއް އިންތިހާބުކުރުމާ ހަމައަށް އެ ރަށުގައި އޮންނާނީ ރަށު ކައުންސިލެއް ކަމަށް ލޯކަލް ގަވަމަންޓު އޮތޯރިޓީ (އެލްޖީއޭ) އިން ބުނެފި އެވެ.
"ތިނަދޫ ސިޓީ ކައުންސިލަށް" އެޑްރެސްކޮށް ސިޓީ ފޮނުވުމަށާއި ލިޔެކިޔުންތަކުގައި "ކައުންސިލުގެ ރައީސް" ގެ ބަދަލުގައި "މޭޔަރު" ބޭނުން ކުރުމަށް އަންގާފައިވާތީ އެ މައްސަލަ ބެލުމަށްފަހު އެލްޖީއޭއިން ބުނީ މިހާރު އޮތް ތިނަދޫގެ ރަށު ކައުންސިލަށް ސިޓީ ކައުންސިލެއްގެ ދަރަޖަ ދެވެން ނެތީ އެކަމަށް ގާނޫނުން ތަން ނުދޭތީ ކަމަށެވެ.
ރައީސުލްޖުމްހޫރިއްޔާއަށް ލިބިދޭ އިހްތިޔާރުގެ ދަށުން އެފަދަ ސިޓީ ކައުންސިލް އިދާރާއެއް އުފައްދާފައި ނުވާނަމަ، އިންތިހާބަކުން ހޮވާފައި އޮންނަ ރަށު ކައުންސިލަކަށް ސިޓީ ކައުންސިލުގެ ދަރަޖަ ނުދެވޭނެ ކަމަށް އެލްޖީއޭއިން ބުންޏެވެ.
"އެހެންކަމުން، ހިނގަމުންދާ ތިނަދޫ ރަށު ކައުންސިލުގެ ދައުރު ހަމަވެ ސިޓީ ކައުންސިލެއް އިންތިހާބުވަންދެން ކައުންސިލުގެ ހައިސިއްޔަތަށް އެއްވެސް ބަދަލެއް ނައިސް ރަށު ކައުންސިލު ދެމި އޮންނާނެކަމަށް ދެކެން،" އެލްޖީއޭގެ ނިންމުމުގައި ބުނެފައި ވެއެވެ.
ސިޓީއެއްގެ ދަރަޖަ އަލަށް ދޭ ރަށެއްގެ ރަށު ކައުންސިލުގެ ދައުރު ހަމަ ނުވާނަމަ އެ ސިޓީއެއް ހިންގަންވާނީ ރަށު ކައުންސިލުން ކަމަށާއި، އެކަން ލާމަރުކަޒީ ގާނޫނުގައި ސާފުކޮށް ބަޔާންކޮށްފައިވާ ކަމަށް އެލްޖީއޭއިން ބުނެ އެވެ.
އެ ގާނޫނުގައި ބަޔާންކޮށްފައިވާ ގޮތުން ސިޓީއެއް ހިންގާ ރަށު ކައުންސިލަށް ސިޓީ ކައުންސިލަކަށް ލިބޭ ހުރިހާ ބާރެއް ލިބެ އެވެ. އަދި ސިޓީއެއްގެ ދަރަޖަދޭ ހިސާބުން، ސިޓީ ކައުންސިލަކުން ދޭން ޖެހޭ ހުރިހާ ހިދުމަތެއް ވެސް ރަށު ކައުންސިލުން ދިނުމަށް ލާޒިމު ކުރެ އެވެ.
ތިނަދޫ ކައުންސިލަށް ސިޓީ ކައުންސިލެއްގެ ދަރަޖަ ނުދޭތީ ކަންބޮޑުވުން ފާޅުކޮށް މަޖިލީހަށް ހުށަހެޅި މައްސަލާގައި ލާމަރުކަޒީ ކޮމެޓީއިން ނިންމި ނިންމުމަށް ވެސް އެލްޖީއޭއިން ރިއާޔަތްކޮށްފައިވެ އެވެ. އެގޮތުން ރަށު ކައުންސިލުގެ ދައުރުގެ މެދު ތެރެއިން ސިޓީއެއްގެ ދަރަޖަ ދިންކަމުގައިވީ ނަމަވެސް، ސިޓީ ކައުންސިލު އިންތިހާބު ކުރުމަށް އިންތިހާބެއް ބާއްވަން ވެސް ލާޒިމު ނުކުރާ ކަމަށާއި އެފަދަ ރަށު ކައުންސިލަކަށް ސިޓީ ކައުންސިލުގެ ދަރަޖަ ދިނުމަށް ލާޒިމު ނުކުރާ ކަމަށް ކޮމެޓީން ނިންމިކަން ފާހަގަކޮށްފައިވެ އެވެ.
ހދ. ކުޅުދުއްފުއްޓަކީ ވެސް ރަށު ކައުންސިލުގެ ދައުރުގެ މެދުތެރެއިން ސިޓީއެއްގެ ދަރަޖަ ދިން ރަށެއްކަން ފާހަގަކޮށްފައިވެ އެވެ. ޖެނުއަރީ 1، 2020، ގައި ކުޅުދުއްފުއްޓަށް ސިޓީއެއްގެ ދަރަޖަ ދިން ނަމަވެސް، 21 މެއި 2021 ގައި ސިޓީ ކައުންސިލެއް އިންތިހާބު ކުރުމާ ހަމަޔަށް ކުޅުދުއްފުށި ސިޓީގައި ހިންގަމުން ދިޔައީ ރަށު ކައުންސިލެއް ކަމަށް އެލްޖީއޭއިން ފާހަގަކުރެ އެވެ.
ތިނަދޫއަށް ސިޓީއެއްގެ ދަރަޖަ ދިނީ އޮގަސްޓް 31، ގަ އެވެ. އެ ނިންމުން ކުރީގެ ރައީސް އިބްރާހިމް މުހައްމަދު ސޯލިހު އިއުލާން ކުރެއްވީ އެމަނިކުފާނުގެ ރިޔާސީ ކެމްޕެއިންގެ ތެރެއިން ތިނަދޫއަށް ވަޑައިގެން ބޭއްވި ޖަލްސާއެއްގަ އެވެ.
ގދ. އަތޮޅު ވެރިކަންކުރާ ރަށް، ތިނަދޫއަށް ސިޓީގެ ދަރަޖަ ދިންއިރު ސިޓީއަކަށް ބޭނުންވާ އަދަދަށް ރަށުގެ ރަޖިސްޓްރީގައި މީހުން ހަމަވާކަމާ މެދު ވެސް ސުވާލުތަކެއް އުފެދިފައިވެ އެވެ. އޭގެ އަހަރެއްހާ ދުވަސް ކުރިން، އެ ރަށު ކައުންސިލުން އެ ކަމަށް އެދި ހުށަހެޅި އިރު ރަޖިސްޓްރީ އާބާދީ އުޅުނީ 7،000 ގަ އެވެ.
ރައީސް ސޯލިހު ގދ. ތިނަދޫއަށް ސިޓީއެއްގެ ދަރަޖަ ދެއްވި ކަން އިއުލާން ކުރެއްވި އިރު ވެސް ޑިޕާޓްމަންޓް އޮފް ނެޝަނަލް ރަޖިސްޓްރޭޝަން އިން ދައްކަނީ ރަށުގެ ރަޖިސްޓްރީގައި ހިމެނެނީ 7،906 މީހުން ކަމަށެވެ.
ނަމަވެސް އޭގެ ފަހުން އިލެކްޝަންސް ކޮމިޝަން (އީސީ) އިން 20 ވަނަ ރައްޔިތުންގެ މަޖިލީހުގެ އިދާރީ ދާއިރާތައް ކަނޑައެޅުމަށް މި ފަހުން އެކުލަވާލި ރިޕޯޓުގައިވާ ގޮތުން ތިނަދޫގެ ރަޖިސްޓްރީ އާބާދީއަކީ 10،150 އެވެ.
