ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ޗައިނާގެ ރައީސް ޝީ ޖިންޕިންއާ މިއަދު ބައްދަލުކުރައްވައިފި އެވެ.
ޗައިނާ ރައީސްގެ ދައުވަތަކަށް އެ ގައުމަށް ވަޑައިގެން އުޅުއްވާ ރައީސް މުއިއްޒު އަރިހުގައި ކެބިނެޓު ވަޒީރުންނާއި ޗައިނާއަށް ވަޑައިގެންނެވި ވަފުދުގެ އިސްބޭފުޅުން ބައިވެރިވެޑައިގެންނެވި އެވެ.
ރައީސް މުއިއްޒު ޗައިނާގެ ވެރިރަށް ބެއިޖިންއަށް ވަޑައިގެންނެވީ މިއަދު ހެނދުނުގެ ވަގުތެއްގަ އެވެ. އެމަނިކުފާނު ފުރަތަމަ ވަޑައިގެންނެވީ ފޫޖިއާން ޕްރޮވިންސަށެވެ. ފޫޖިއާން ޕްރޮވިންސަށް ވަޑައިގެން އެ ސަރަހައްދުގެ ސަރުކާރުގެ އިސްބޭފުޅުންނާ ބައްދަލުކުރެއްވި އެވެ. އަދި ރާއްޖޭގައި ހުރި އިންވެސްޓްމަންޓު ފުރުސަތުތައް ޗައިނާ އިންވެސްޓަރުންނަށް ކިޔައިދޭން ބޭއްވި އިންވެސްޓް މޯލްޑިވްސް ފޯރަމްގައި ވެސް ބައިވެރިވެ ވަޑައިގެންނެވި އެވެ.
ރައީސް އޮފީހުން ބުނެފައިވާ ގޮތުގައި މި ފުރަމާނަ ދަތުރުގެ ތެރެއިން ދެ ގައުމުގެ ދެމެދު ރަސްމީ ވާހަކަތައް ބޭއްވުމަށާއި އެކި ދާއިރާތަކުން ގުޅުން ބަދަހިކުރުމުގެ އެއްބަސްވުންތައް ބަދަލުކުރާން ހަމަޖެހިފައި ވެ އެވެ. އެ ދާއިރާތަކުގެ ތެރޭގައި ވިޔަފާރީގެ ގުޅުންތައް ބަދަހިކުރުމާއި، ފަންނީ ދާއިރާތަކުން މީހުން ބިނާކުރުމާއި، އިޖުތިމާއީ، އިގުތިސާދީ އަދި ޓެކްނޮލޮޖީ ހިމެނޭ ކަމަށް ވެސް ރައީސް އޮފީހުން ބުންޏެވެ.
