ރައީސް އޮފީހުގެ ބައެއް މިނިސްޓަރުން މާލޭ ސިޓީ ކައުންސިލުގެ އޮފީހަށް ވަދެ މަސައްކަތަށް ނުފޫޒު ފޯރުވާ ކަމަށް ބައެއް ކައުންސިލަރުން ތުހުމަތުކޮށްފި އެވެ.
މާލެ ސިޓީ ކައުންސިލުގެ މެންބަރަކު ނަން ނުޖެހުމަށް ޝަރުތުކޮށް "އަދަދު" އާ ވާހަކަ ދައްކަވަމުން ވިދާޅުވީ މި ވެރިކަން ބަދަލުވި ފަހުން ރައީސް އޮފީހުގެ ބައެއް މިނިސްޓަރުންނާއި ސިޔާސީ މުވައްޒަފުން ކައުންސިލް އިދާރާތެރެއަށް ވަދެ އުޅުއްވާ ކަމަށެވެ. އެއީ ކޮން ކަމަކު ކަމެއް ސާފު ނުވާކަމަށް އޭނާ ބުންޏެވެ.
ދާދި ފަހުން ޕީޕަލްސް ނެޝަނަލް ފްރޮންޓުން ބޭއްވި ޖަލްސާއެއްގައި މައްޗަންގޮޅީ ދެކުނު ދާއިރާގެ ކައުންސިލަރު އައިޝަތު ނާޒިމާ ވެސް ވަނީ ރައީސް އޮފީހުގެ ބައެއް ބޭފުޅުން ސިޓީ ކައުންސިލަށް ވަޑައިގެން ނުފޫޒު ފޯރުވާ ކަމަށް ތުހުމަތުކޮށްފަ އެވެ.
ހޯމަ ދުވަހު ބޭއްވި ޖަލްސާގައި ނާޒިމާ ވިދާޅުވީ ސިޓީ ކައުންސިލުގެ ތެރެއަށް ރައީސް އޮފީހުގެ ބޭފުޅުން ވަދެ ކުރަން ޖެހޭ ކަންކަން ހުންނާނެ ކަމަށް ގަބޫލު ނުކުރައްވާ ކަމަށެވެ.
"ސިޓީ ކައުންސިލް ތެރޭގައި ވަރަށް ދަތިތައް އެބަ އާދޭ. އަޅުގަނޑު މިކަމާ ހިތްހަމަ ނުޖެހިގެން ވާހަކަ ދައްކާނަން. އެއީ ސިޓީ ކައުންސިލް ތެރޭގައި އަޅުގަނޑު ގަބޫލެއް ނުކުރަން ރައީސް އޮފީހު މީހުން ވަދެ ކުރަން ޖެހޭ ކަންތައްތަކެއް ހުންނާނެ ކަމަކަށް،" ނާޒިމާ ވިދާޅުވި އެވެ.
ނަމަވެސް ސިޓީ ކައުންސިލުގެ މީޑިއާ އޮފިސަރު އައިމިނަތު ޝަތުފާ ވިދާޅުވީ ރައީސް އޮފީހުގެ އެއްވެސް މުވައްޒަފަކު ކައުންސިލް އޮފީހަށް އައިސްފައިނުވާ ކަމަށެވެ.
ކުރިން މޭޔަރުކަމުގައި ހުންނެވި ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމާއެކު، އެމަނިކުފާނާ އެކު ސިޓީ ކައުންސިލުގައި މަސައްކަތް ކުރި ގިނަ ބަޔަކަށް ރައީސް އޮފީހާއި ދައުލަތުގެ އެހެން މުއައްސަސާތަކުން މަގާމުތައް ދެއްވި އެވެ.
ސިޓީ ކައުންސިލުގެ ތެރޭގައި މަގާމުތައް ދިން މީހުންގެ ތެރޭގައި ގިނަ އިދާރީ މުވައްޒަފުން ވެސް ހިމެނެ އެވެ.
