ޗައިނާއަކީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ގައުމަށް ހަދައިދިނުމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު އެދިވަޑައިގަނެފި އެވެ.
ޗައިނާގެ ފުޖިއާން ޕްރޮވިންސްގެ ވެރިކަން ކުރާ ފޫޖޯ ސިޓީގައި މިއަދު ހެނދުނު ފެށި އިންވެސްޓް މޯލްޑިވްސް ފޯރަމްގައި ދެއްވި ތަގުރީރުގައި ރައީސް މުއިއްޒު ވިދާޅުވީ، ރާއްޖޭގެ ފަތުރުވެރިކަން އިތުރަށް ކުރިއަރުވައި ޑައިވާސިފައިކޮށް، ސްޕޯޓްސް، މެޑިކަލް އަދި ކަލްޗަރަލް ޓޫރިޒަމް ކުރިއަރުވަން ސަރުކާރުން ޕްލޭންކުރަމުން އަންނަ ކަމަށެވެ.
ޗައިނާއަކީ ރާއްޖޭގެ ފަތުރުވެރިކަމުގެ ދާއިރާގެ ބޮޑު ހިއްސާއެއްކަން ފާހަގަ ކުރައްވަމުން ރައީސް ވިދާޅުވީ، ކޮވިޑުގެ ކުރިން ޗައިނާއަކީ އެއް ގައުމަކުން ރާއްޖެއަށް އެންމެ ގިނަ ފަތުރުވެރިން އައި ގައުމު ކަމަށެވެ. އަދި ޗައިނާއަށް އަލުން އެ މަގާމު ހޯދުމަށް މަސައްކަތް ކުރަން ޖެހޭ ކަމަށް އެމަނިކުފާނު ވިދާޅުވި އެވެ.
"ޗައިނާގެ މި މަގާމު އަލުން ހޯދުމަށް އަޅުގަނޑުމެން ގަދައަޅައި މަސައްކަތް ކުރުމަކީ އަޅުގަނޑު އެދޭ އެދުމެއް،" ރައީސް މުއިއްޒު ވިދާޅުވި އެވެ.
ކޮވިޑުގެ ކުރިން 2017 އަދި 2018 ވަނަ އަހަރު ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކުރި ގައުމަކީ ޗައިނާ އެވެ. ޖެހިގެން އައި 2019 ވަނަ އަހަރު 280،000 އަށްވުރެ ގިނަ ޗައިނާ ފަތުރުވެރިން ވަނީ ރާއްޖެ އައިސްފަ އެވެ.
ކޮވިޑަށް ފަހު ރާއްޖޭގެ ބޯޑަރުތައް އަލުން ހުޅުވާލުމާއެކު އެންމެ ގިނައިން ފަތުރުވެރިން އައިސްފައި ވަނީ އަވައްޓެރި އިންޑިއާއިންނެވެ. ތިން އަހަރު ދުވަސް ވަންދެން ގައުމު ބަންދުކޮށްފައި އޮތް އޮތުން ނިމުމަކަށް ގެނެސް ޗައިނާއިން އެ ގައުމުގެ ބޯޑަރު ހުޅުވާލީ މިދިޔަ އަހަރުގެ ޖެނުއަރީ އަށެއްގަ އެވެ.
މިދިޔަ އަހަރު ޖުމުލަ 187،118 ޗައިނާ ފަތުރުވެރިން ވަނީ ރާއްޖެ އައިސްފަ އެވެ.
ޗައިނާ ރާއްޖޭގެ އެެއް ނަމްބަރު މާކެޓަށް ހެދުމަށް ރައީސް އިލްތިމާސްކުރެއްވި އިރު، އިންޑިއާގެ ގިނަ ބަޔަކު ދަނީ ރާއްޖެ ބޯއިކޮޓްކޮށް، ރާއްޖޭގެ ބަދަލުގައި އެ ގައުމުގެ ލަކްޝަދީޕަށް ޒިޔާރަތްކުރަން ގޮވާލަމުންނެވެ.
ރާއްޖެއަށް އިންޑިއާގެ އެއާލައިންތަކުން ކުރާ ދަތުރުތައް ހުއްޓާލައި އެގައުމުގެ ޓުއާ އޮޕަރޭޓަރުން ރާއްޖޭގެ ޕެކޭޖުތައް ވިއްކުން ހުއްޓާލައި ރާއްޖެ ބޮއިކޮޓް ކުރުމަށް ވެސް އިންޑިއާގެ ވިޔަފާރިވެރިންގެ ޖަމިއްޔާއިން ވަނީ ގޮވާލާފަ އެވެ.
