އިދިކޮޅު މައި ޕާޓީ, އެމްޑީޕީން ފޮނުވި ސިޓީއަކާ ގުޅިގެން ކުރިއަށް އޮތް ރައްޔިތުންގެ މަޖިލީހުގެ އިންތިހާބުގެ ތާރީހު ކަނޑައެޅުމުގައި އިލެކްޝަން ކޮމިޝަނުން އިތުރު މަޝްވަރާއަކަށް ގޮސްފި އެވެ.
އެމްޑީޕީން އީސީއަށް ސިޓީ ފޮނުވީ, އިންތިހާބުގެ ތާރީހާ މެދު މުއައްސަސާތަކުން އީސީއަށް ދިން ލަފަޔާ ހިލާފަށް ސަރުކާރުގެ ނުފޫޒާއެކު ރޯދަ މަސް ތެރޭގައި އިންތިހާބު ބާއްވަން އުޅޭ ކަމުގެ ތުހުމަތު ކޮށްފަ އެވެ. އަދި ރޯދަ މަހުގެ ފަހުގެ ތާރީހެއްގައި އިންތިހާބު ބާއްވަން އެ ޕާޓީން އެދިފައި ވެއެވެ.
އިންތިހާބުތަކާ ބެހޭގޮތުން މިއަދު އީސީން ބޭއްވި ނޫސްވެރިންގެ ބައްދަލުވުމުގައި ކޮމިޝަނުގެ ނައިބު ރައީސް އިސްމާއިލް ހަބީބް ވިދާޅުވީ, ކުރިން ނިންމައިގެން ތިބި ގޮތުން ނަމަ މިއަދު އިންތިހާބުގެ ތާރީހު އިއުލާނު ކުރާނެ އެވެ. އެހެން ނަމަވެސް އެކަން މަޑުޖައްސާލީ އެމްޑީޕީން އެ ކޮމިޝަނަށް ފޮނުވި ސިޓީއަކާ ގުޅިގެން ކަމަށެވެ.
"އެ ސިޓީ ފޮނުވުމާ ގުޅިގެން ކޮމިޝަނުން މިއަދު ޕްރެސްއަށް އައުމުގެ ކުރިން މަޝްވަރާ ކޮށްފައި މިއައީ. ކޮމިޝަނުން ނިންމީ އެކަމާ ގުޅޭގޮތުން ސިޔާސީ ޕާޓީއާ މަޝްވަރާ ކުރުމަށް ފަހު މި ހަފްތާގައި ގޮތެއް ނިންމަން," ހަބީބް ވިދާޅުވި އެވެ.
އޭނާ ވިދާޅުވި ގޮތުގައި އިންތިހާބުގެ ތާރީހާ ގުޅޭގޮތުން އެމްޑީޕީ އާއެކު މަޝްވަރާ ކުރުމަށް މާދަމާ 11:30 ގައި ބައްދަލުވުމެއް ބާއްވަން ވަނީ ހަމަޖެހިފަ އެވެ.
ހަބީބް ވިދާޅުވީ އިންތިހާބު ބާއްވާ ތާރީހު ކަނޑައަޅާނީ އާންމު ރައްޔިތުންނާއި ކެންޑިޑޭޓުންނަށް ފަސޭހަ ވާނެ ގޮތަކަށް ކަމަށެވެ. އަދި, އެކަން އިންތިޒާމު ކުރުމަށް އީސީއަށް ހުރި ގޮންޖެހުންތަކަށް ބަލައި, ނިންމާނީ އެންމެ ރަނގަޅަށް އެކަން ކުރެވޭނެ ތާރީހެއް ކަމަށް ވެސް އޭނާ ވިދާޅުވި އެވެ.
ރޯދަ މަސް ތެރޭގައި ބާއްވައިފިނަމަ, ވޯޓުލާން ނިކުންނަ މީހުންގެ އަދަދު ދަށްވެދާނެތީ އެކަމަށް ވިސްނައި, ކޮމިޝަނަށް ފެންނަ އެންމެ ރަނގަޅު ނިންމުމެއް ނިންމައި އިއުލާން ކުރާނެ ކަމަށް ހަބީބް ވިދާޅުވި އެވެ.
މަޖިލިސް އިންތިހާބުގެ ތާރީހު ކަނޑައެޅުމާ ގުޅޭގޮތުން ރައްޔިތުންގެ މަޖިލީހުގެ ކޮމިޓީން އީސީއަށް ލަފާ ދިނީ ރޯދައިގެ ފަހުން އިންތިހާބު ބޭއްވުމަށެވެ. އެހެން ނަމަވެސް ރޯދައިގެ ފަހަށް އިންތިހާބު ލަސްކޮށްފި ނަމަ ދެ ވަނަ ބުރަކަށް ދާންޖެހޭ ހާލަތުގައި އެކަން ކުރުމުގެ ފުރުސަތެއް ނޯންނާނެތީ ދަތިވާނެ ކަމަށް ހަބީބް ވަނީ މީގެ ކުރިން ވިދާޅުވެފަ އެވެ.
