މަސް ދޯނިން ދޯނިން މާރުކޭޓަށް މަސް ބޭލޭ ގޮތް ހެދުމަށްޓަކައި މިހާރު ވަޅޯމަސް މާރުކޭޓު ހުރި ތަނަށް މާލޭ ރޯމަސް މާރުކޭޓު ބަދަލު ކުރާނެ ކަމަށް މާލޭ މޭޔަރު ކަމަށް އެމްޑީޕީގެ ޓިކެޓްގައި ވާދަ ކުރައްވާ އާދަމް އާޒިމް ރޭ ވިދާޅުވެއްޖެ އެވެ.
ސޯޝަލް މީޑިއާ ޕްލެޓުފޯމް، އެކްސް (ކުރީގެ ޓްވިޓާ) ސްޕޭސްގައި ކުރިއަށް ގެންދިޔަ ފޯރަމެއްގައި އާޒިމް ވިދާޅުވީ މަގު ހުރަސްކޮށް މާރުކޭޓަށް މަސް ގެންދަން ޖެހުމުގެ ބަދަލުގައި، މިހާރު ވަޅޯމަސް ހުރި ތަނަށް ރޯމަސް މާރުކޭޓު ބަދަލުކޮށްފި ނަމަ މަސްވެރިންނަށް އެތައް ފަސޭހައެއް ލިބި، މަހުގެ ރައްކާތެރިކަމާއި ސާފުތާހިރުކަން ވެސް ބޮޑުވާނެ ކަމަށެވެ.
"މަސް މާރުކޭޓު ހުރި ތަން އަޅުގަނޑު ބަދަލުކުރަން ބޭނުންވަނީ ވަޅޯމަސް މާރުކޭޓު ހުރި ތަނަށް، އޭރުން އެ ހިސާބުގަނޑު ވެސް [މިހާރު ރޯމަސްމާރުކޭޓު ހުރި ސަރަހައްދާއި މަގު] ސާފުތާހިރު ވެގެންދާނެ،" އާޒިމް ވިދާޅުވި އެވެ.
"ގަންނަ މަހަކީ ރަނގަޅު މަސްކަން ޔަގީން ކުރެވޭނެ ނިޒާމު މަސް މާރުކޭޓުގައި ހުންނަން ޖެހޭނެ، ވިއްކާ މަހަކީ ކޮލިޓީ ރަނގަޅު މަސްކަން ޔަގީން ކުރެވޭނެ ލެބެއް (މަސް މާރުކޭޓުގައި) ގާއިމުކުރަނަށް."
އާ ރޯމަސް މާރުކޭޓު ތަރައްގީ ކުރާނީ، އެ ސަރަހައްދުގެ އެއްބައިގައި ހިތްފަސޭހަ ކޮށްލަން ތިބެވޭނެ ގޮތަށާއި، ދަތުރުވެރިންނާއި އެހެން މީހުންނަށް ފާހާނާ ކުރެވޭނެ ގޮތަށް ކަމަށް އާޒިމް ވިދާޅުވި އެވެ.
މާރުކޭޓު ބަދަލުކުރުމުގެ އިތުރުން، އާޒިމް އެންމެ އިސްކަމެއް ދެއްވާނެ ކަންކަމުގެ ތެރޭގައި މާލޭގެ މަގުތަކުގައި އުޅޭ ބުޅާތަކަށް ހާއްސަ ތަނެއް ހެދުން ހިމެނެ އެވެ. ބުޅާތައް ގެންގުޅޭނެ އިމާރާތް ހަ މަސް ދުވަސްތެރޭގައި ހަދާނެ ކަމަށް އޭނާ ވިދާޅުވި އެވެ.
އެމްޓީސީސީގެ މެނޭޖިން ޑިކެޓަރު ކަމުގައި ހުންނަވާ ކާމިޔާބު ގިނަ ޕްރޮޖެކްޓަކެއް ހިންގަވާފައިވާ އާޒިމް ވިދާޅުވީ މި މަހުގެ 13 ވަނަ ދުވަހު ބާއްވާ އިންތިހާބު ކާމިޔާބު ކުރައްވާ، ކުރިއަށް އޮތް ދެ އަހަރާއި ބައިގެ ތެރޭގައި މާލެ އަކީ ތަފާތު ތަނަކަށް ހައްދަވާނެ ކަމަށެެވެ.
"އަޅުގަނޑު ބުނި ކަމެއް ވިއްޔާ މިހާތަނަށް ހާސިލު ކޮށްފައި އޮންނާނީ. މާލީ ދާއިރާގެ ތަޖުރިބާ ހުރުމާއިއެކު އަޅުގަނޑަށް ވަރަށް ބޮޑަށް މި ކަންތައްތަކަށް ފައިސާ ހޯދޭނެ ގޮތްތައް ވެސް އެބައެނގޭ،" އާޒިމް ވިދާޅުވި އެވެ.
