އެމްޑީޕީން ވަކިވެގެން ސަރުކާރު ހިންގާ ޕީއެންސީއަށް ބަދަލުވި ބައެއް މެމްބަރުން ވަކިވުމުގެ ކުރިން ޕްރައިމަރީއަކާ ނުލައި އެމްޑީޕީގެ މަޖިލިސް އިންތިހާބުގެ ޓިކެޓު ހޯދުމަށް ޑިމާންޑު ކުރެއްވި ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.
ޕާޓީ ދޫކޮށް ދާންޖެހޭ ވަރުގެ ކަންބޮޑުވުމެއް ވަކިވެގެން ދިޔަ މެންބަރުންގެ ފަރާތުން ހުށަހަޅާފައި ނުވާ ކަމަށް ސަންގުޓީވީގެ ޕްރޮގުރާމެއްގައި ވާހަކަ ދައްކަވަމުން ފައްޔާޒް ވިދާޅުވި އެވެ. ނަމަވެސް, ޕާޓީގެ ޓިކެޓު ޕްރައިމަރީއަކާ ނުލައި ހޯދުމަށް އެ ބޭފުޅުން ޑިމާންޑު ކުރެއްވި ކަމަށް އޭނާ ވިދާޅުވި އެވެ.
"ޓިކެޓު, އޭގެތެރެއިން ބައެއް ބެފުޅުން އަޅުގަނޑުމެންނަށް ޑިމާންޑު ކުރި ޓިކެޓު އެ ބޭފުޅުންނަށް ޕްރައިމަރީއެއް ނުބާއްވައި ދޭން، އެކަމެއް ނުކުރެވޭނެ އަޅުގަނޑުމެންނަކަށް،" މިދިޔަ ސަރުކާރުގެ އިކޮނިމިކް މިނިސްޓަރުކަން ވެސް ކުރެއްވި ފައްޔާޒް ވިދާޅުވި އެވެ.
އޭގައި ރަނގަޅު ވާހަކައެއް އޮތް ކަމަށް ގަބޫލު ކުރައްވާ ކަމަށާއި ނަމަވެސް މިވަގުތު އެމްޑީޕީގެ އަސާސީ ގަވާއިދު އެކަމަށް ތަން ނުދޭ ކަމަށް ފައްޔާޒް ވިދާޅުވި އެވެ. އެއީ ދުނިޔޭގެ ކުރިއަރާފައިވާ ގައުމުތަކުގައި ވެސް ކަން ކުރާ އުސޫލެއްކަން ފައްޔާޒު ފާހަގަކުރެއްވި އެވެ.
"އެހެން ނަމަވެސް މިވަގުތު އަޅުގަނޑުމެންގެ އަސާސީ ގަވާއިދު އެއަކަށް ޖާގައެއް ނުދޭ، މިވަގުތު އަޅުގަނޑުމެންނަށް ކުރެވޭނެ ހަމައެކަނި ކަމަކީ ކުރިމަތި ލާފައި ތިބި މީހުންގެ ތެރެއިން ވާހަކަ ދައްކައިގެން މަދުކުރެވޭތޯ ބެލުން،" ފައްޔާޒް ވިދާޅުވި އެވެ.
އެމްޑީޕީގެ ޓިކެޓު ވަކި ބަޔަކަށް ދިނުމަށް އެ ޕާޓީގެ ލީޑަރުޝިޕުން މަސައްކަތް ކުރާ ކަމަށް ބުނެ ކުރާ ތުހުމަތު ދޮގު ކުރައްވައި ފައްޔާޒް ވިދާޅުވީ މަޖިލީހަށް ވާދަކުރައްވަން ބޭނުންވާ ބޭފުޅުން ޝައުގުވެރިކަން ފާޅު ކުރުމަށް ހުޅުވައިލީ ވެސް ޕްރައިމަރީ ބާއްވާއިރުގައި ބައިވަރު ފިތުނަތައް އުފެދޭތީ އެކަން ހުއްޓުވުމަށް ގައުމީ މަޖިލީހުގެ ހުރިހާ މެންބަރުން އެދިގެން ކަމަށެވެ.
"އަޅުގަނޑުމެން ކުރަމުން މިދާ ކަމަކީ އެއް ބޭފުޅަކަށް ވުރެ އިތުރަށް އެއް ދާއިރާއަކަށް ކުރިމަތިލައްވައިފިއްޔާމުން އަޅުގަނޑުމެން ގެނެސްގެން ވާހަކަ ދައްކަން މިއުޅެނީ، ވާހަކަ ދައްކައިގެން އެކައްޗަކަށް ހެދޭތޯ، ވާހަކަ ދައްކައިގެން އެކައްޗަކަށް ނުހެދިއްޖެއްޔާ އޮންނާނެ ޕްރައިމަރީ،" ފައްޔާޒް ވިދާޅުވި އެވެ.
ނަމަވެސް, ކުރިއަށް އޮތް ތަނުުގައި އަސާސީ ގަވާއިދަށް ބަދަލު ގެނެސްގެން އެމްޑީޕީގެ މެންބަރުންގެ ގޮތުގައި ރަނގަޅަށް ދައުރު ފުރިހަމަ ކުރާ މެންބަރުންނަށް ކޮންމެވެސް ކަހަލަ ގޮތެއް ހަދައިދެވޭނެ ގޮތެއް ހޯއްދެވޭނެ ކަމަށް އުއްމީދު ކުރައްވާ ކަމަށް ފައްޔާޒް ވިދާޅުވި އެވެ.
އިދިކޮޅު މައި ޕާޓީގެ ގޮތުގައި އޮތް އެމްޑީޕީގެ 13 މެންބަރުން ޕީއެންސީއަށް ސޮއި ކުރީ މިދިޔަ މަހުގެ 28 ވަނަ ދުވަހު އެވެ. އެ ބޭފުޅުން ޕީއެންސީއަށް ސޮއި ކުރެއްވި ސީދާ ސަބަބެއް މީޑިއާއަށް ވިދާޅެއް ނުވެ އެވެ.
ސޮއިކުރެއްވި މެމްބަރުންގެ ތެރެއިން އެ ޖަލްސާގައި ވާހަކަ ދެއްކެވި އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ) ވަނީ އެމްޑީޕީން ވަޒީރުންނަށް ރުހުން ދިނުން ލަސްކޮށް ރައީސުލްޖުމްހޫރިއްޔާ އަޒުލުކުރުމަށް މަސައްކަތް ކުރާތީ ގައުމީ ފިކުރު އިސްކުރަން ޖެހުނީ ކަމަށް އެ ރޭ ވިދާޅުވެފަ އެވެ. އެ ތުހުމަތުތައް ފައްޔާޒު މިރޭ ދޮގުކުރެއްވި އެވެ.
އެ 13 ބޭފުޅުން ޕީއެންސީއާ ގުޅިވަޑައިގެނެންވުމުން ގިނަ ބަޔަކު ވަނީ އެ ބޭފުޅުންނަށާއި ސަރުކާރަށް ވެސް ފާޑު ކިޔައިފަ އެވެ.
