މިދިޔަ ހަފުތާ މާލެއަށް ކުރި ވިއްސާރާގައި ފެންބޮޑުވުމުގެ ސަބަބުން، ހުޅުމާލެ ސަހަރާގެ ބިމު އަޑީގައި ހެދިފައިވާ ފެންގަނޑު އަދިވެސް ނުހިނދޭތީ މާލެ ސަރަހައްދުން މަރުވާ މީހުން ވަޅުލުން އާ ސަހަރާއަށް ބަދަލުކޮށްފި އެވެ.
މާލެ ސިޓީ ކައުންސިލްގެ މީޑިއާ އޮފިޝަލް އާމިނަތު ޝަތުފާ "އަދަދު" އަށް ވިދާޅުވީ ހުޅުމާލެ ސަހަރާގައި މީހުން ވަޅުލުން ހުއްޓާލާފައިވަނީ ވަގުތީ ގޮތުން ކަމަށެވެ. ސަބަބެއް ކަމަށް ވިދާޅުވީ ހުޅުމާލެ ސަހަރާގެ ބިމު އަޑީގައި ހުރި ފެންގަނޑު ނުހިނދޭތީ ފޫޓެއްހާ ތަން ކޮންނައިރަށް ފެން އެރުމެވެ.
އޭނާ ވިދާޅުވި ގޮތުގައި ހުޅުމާލެ ސަހަރާއަށް ދިމާވެފައިވާ މައްސަލަ ހައްލުވާން ހަފުތާއެއްހާ ދުވަސް ނަގާނެ އެވެ. މައްސަލަ ހައްލުވަންދެން މީހުން ވަޅުލުން އާ ސަހަރާއަށް ބަދަލުކުރި ނަމަވެސް މޫނު ދެއްކުން އަދިވެސް ކުރިއަށް ގެންދާނީ ހުޅުމާލެ ސަހަރާގަ އެވެ.
އާ ސަހަރާގައި މޫނު ދެއްކުމުގެ ކަންކަން މިވަގުތު ހަމަ ނުޖެއްސެނީ ސިޓީ ކައުންސިލުން އެ ތަން ތަރައްގީ ކުރުމަށް މިދިޔަ އަހަރު ކުރީކޮޅު ފެށި މަޝްރޫއު އަދިވެސް ނުނިމޭތީ އެވެ.
އާސަހަރާގެ މިސްކިތާއި ހިނަވާގެ މަރާމާތު ކުރަން ހަވާލުކުރި ކޮންޓްރެކްޓަރަށް އެ މަސައްކަތުގެ އަގުގެ ތެރެއިން 3.9 މިލިއަން ރުފިޔާ ވެސް ދީފައި ވަނިކޮށް، މަސައްކަތުގެ މެދު ތެރެއިން ކޮންޓްރެކްޓް ވެސް ބާތިލު ކުރި އެވެ.
މި ފަހުން ސިޓީ ކައުންސިލުން ބުނި ގޮތުގައި އާ ސަހަރާގެ މަސައްކަތް އެހެން ބަޔަކާ ހަވާލުކޮށް އަލުން ފެށުމުގެ މަސައްކަތް މިހާރު ދަނީ ކުރަމުންނެވެ.
