ޕީއެންސީ/ޕީޕީއެމް ސަރުކާރު ވެރިކަމަށް އައީ ހަގީގަތާއި ހިލާފު ބައެއް ވާހަކަތައް ދައްކައިގެން ކަމަށާއި ނަމަވެސް މި ދަނޑިވަޅު އެންމެ ރަނގަޅު ގޮތަކީ ގައުމުގެ ހައްގުގައި ސަރުކާރަށް އެއްބާރުލުން ދިނުން ކަމަށް ޕްރޮފެސަރު ހަސަން އުގައިލް ވިދާޅުވެއްޖެ އެވެ.
އުގައިލް މިހެން ވިދާޅުވީ އިންޑިއާ ސިފައިންގެ އަދަދު ނުރައްކަލަކަށް ވެގެން ނޫޅޭ ކަމަށް ސަރުކާރުގެ ތަރުޖަމާނު މުހައްމަދު ޝަހީބު މިދިޔަ ބުރާސްފަތި ދުވަހު ވިދާޅުވުމާ ގުޅިގެންނެވެ.
"މިފަދަ ސުރުހީ ތަކުން މިހާރު މިފެންނަނީ މީގެ ދުވަސްކޮޅެއް ކުރިން ގިނަ ދިވެހިންގެ ހިތްތަކުގައި ޖެހި ޖަޒުބާތީ ވިންދުގެ ނަތީޖާ. ރައްޔިތުންނަށް އޮޅުންއަރާ ގޮތަށް ހަގީގަތާ ހިލާފު ބައެއް ވާހަކަތައް ދައްކައިގެން ހޮވުނު ސަރުކާރެއް ކަމުގައި ވިއަސް އެކަންތައް އެއްފަރާތް ކޮށްފައި ސަރުކާރަށް އެއްބާރުލުން ދީގެން ގައުމުގެ ޙައްގުގައި ކުރިއަށް ދިއުން އެއީ މިވަގުތު ރައްޔިތުންނަށް އޮތް އެންމެ ރަނގަޅު ގޮތް،" ޝަހީބު ވިދާޅުވި ވާހަކައާ ގުޅޭ ގޮތުން އަދަދު ނޫހުގައި ޝާއިޢުކުރި ހަބަރާއެކު ފޭސްބުކްގައި ލިޔުއްވި ޕޯސްޓެއްގައި އުގައިލް ވިދާޅުވި އެވެ.
އިނގިރޭސި ވިލާތުގައި ދިރިއުޅުއްވާ އުގައިލް ބައެއް ފަހަރު ރާއްޖޭގެ ސިޔާސީ ކަންކަމާއި، އަދި އެހެނިހެން މައްސަލަތަކާ ގުޅޭ ގޮތުން ހިޔާލުފާޅު ކުރައްވާފައިވެ އެވެ.
ސަރުކާރަށް ދޮޅުމަސް ވެގެން ދާއިރު ރާއްޖޭގައި ތިބި އިންޑިއާގެ ސިފައިންގެ އަދަދު އިތުރުވެ ނުވަތަ މަދުވުމަކީ ވެސް އެކަށީގެންވާ ކަމެއް ކަމަށާއި މިވަގުތު ރާއްޖޭގައި ތިބި އިންޑިއާ ސިފައިންގެ އަދަދުން ގައުމީ ސަލާމަތަށް ނުރައްކަލެއް އޮތް ކަމަށް ނުދެކޭ ކަމަށް ޝަހީބު ވިދާޅުވި އެވެ.
އިންޑިއާ ސިފައިންގެ އަދަދު ސަރުކާރަށް ޔަގީން ކުރެވިފައި ނުވާ ކަމަށް ބުނާތީވެ، އެ ސުވާލުތައް އަބަދުވެސް ނޫސްވެރިން އަމާޒުކުރެ އެވެ. އަދި އާންމުން ވަރަށް ބޮޑަށް ސަރުކާރަށް ފާޑުކިޔަ އެވެ.
މިހާރު ރާއްޖޭގައި ތިބީ 89 އިންޑިއާ ސިފައިން ކަމަށް ސަރުކާރުން ހާމަކޮށްފައިވީ ނަމަވެސް އަދިވެސް އެ އަދަދަށް އުނިއިތުރު އައުން އެކަށީގެންވާ ކަމަށް ޝަހީބު ވިދާޅުވި އެވެ.
