މޫސުން ގޯސްވެ، ފުވައްމުލަކާއި އައްޑޫއަށް މީޓިއޮރޮލިޖިކަލް ސާވިސް އިން އޮރެންޖު އެލާޓެއް މިއަދު ނެރެފި އެވެ.
އޮރެންޖު އެލާޓު ނެރުނީ މިއަދު މެންދުރު ފަހު 1:30 އިން ފެށިގެން 3:20 އާ ހަމައަށެވެ. އޮރެންޖު އެލާޓަކީ އެލާޓް ލެވެލް ތިނެއްގެ އިންޒާރެކެވެ. އޮރެންޖު އެލާޓާއެކު ބޯކޮށް ވާރޭ ވެހި، ފެންބޮޑުވެދާނެ ކަމަށް ވެސް މެޓް އޮފީހުން ބުނެފައިވެ އެވެ.
ފުވައްމުލައް، އައްޑޫއަށް އޮރެންޖް އެލާޓު ނެރެފައިވާތީ ސަމާލުވުމަށް ޑިޒާސްޓާ މެނޭޖްމަންޓު ސެންޓަރުން ވަނީ އިލްތިމާސްކޮށްފަ އެވެ. އަދި ފެން ބޮޑުވެދާނެތީ މުދަލަށް ރައްކާތެރިވުމަށް ވެސް އިލްތިމާސްކޮށްފައިވެ އެވެ.
އޭގެ އިތުރުން، އިރުވައި މޫސުމާއެކު ކުރިއަށް އޮތް ތިން ދުވަހު ރާއްޖޭގެ އެކި ހިސާބުތަކަށް ވައިގަދަވާނެ ކަމަށް ވެސް މެޓް އޮފީހުން ބުންޏެވެ.
އެގޮތުން ހާއްސަކޮށް ސިނަމާލެ ބުރިޖު އަދި ހައިވޭއިން ދަތުރުކުރާ ފަރާތްތަކާއި ކަނޑުދަތުރުކުރާ ފަރާތްތަކުން އިތުރަށް ސަމާލުވުމަށް އެ އިދާރާއިން އެދިފައިވެ އެވެ.
ވައި ބާރުވެ ކަނޑުތައް ގަދަވާނެ ކަމަށް އެންމެ ބޮޑަށް ބެލެވެނީ އުތުރު އަދި މެދުރާއްޖެތެރޭގެ އަތޮޅުތަކަށް ކަމަށް ވެސް މެޓް އޮފީހުން ސޯޝަލް މީޑިއާގައި ކޮށްފައިވާ ޕޯސްޓުގައި ބުނެފައިވެ އެވެ.
"ހާއްސަކޮށް އުތުރާއި މެދުރާއްޖެތެރޭގައި ގަދަވަޔާއެކު ކަނޑުތައް ވަރަށް ގަދަވާނެ ކަމަށް ލަފާކުރެވޭ، އަދި ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވޭ،" އެ އިދާރާއިން ބުނެފައިވެ އެވެ.
ރާއްޖެއަށް އިރުވައި މޫސުން ފެށުނީ މި މަހުގެ 24 ގަ އެވެ.
