ފައިލޭރިއާއިން ރައްކާތެރިވުމުގެ ގޮތުން ހުޅުމާލެ ފޮގު ކުރުމުގެ މަސައްކަތް އާބަންކޯއިން ފަށައިފި އެވެ.
އާބަންކޯއިން މިއަދު ބުނީ އެ މަސައްކަތް ކުރިއަށް ގެންދަނީ ފައިލޭރިއާއިން ރައްކާތެރިވުމަށް ސަރުކާރުން ފަށާފައިވާ، "ފައިލޭރިއާއިން ރައްކާ" ކެމްޕެއިންގެ ދަށުން ކަމަށެވެ.
ޖުމުލަ 20 ސަރަހައްދަކަށް ބަހާލައިގެން ކުރިއަށް ގެންދާ އެ މަސައްކަތް ކޮންމެ ދުވަހެއްގެ ފަތިހު 5:00 6:00 އަށް އަދި އިރުއޮއްސި 6:00 އިން 7:00 އަށް ކުރިއަށް ގެންދާނެ ކަމަށް އާބަންކޯއިން ބުނެ އެވެ.
ލައްކައަކާ ގާތްކުރާ އަދަދަކަށް މީހުން ދިރިއުޅޭ ހުޅުމާލެއަކީ މަދިރި އާލާވާ ފަދަ ހުސްބިންތައް ގިނަ އަވަށެކެވެ. އަދި މި ދުވަސްވަރަކީ ވިއްސާރަ ދުވަސްވަރެއްކަމުން މަދިރީގެ އުނދަގޫ އެ އަވަށުގައި އާދަޔާ ހިލާފަށް ގިނަވެފައި ވާކަމަށް އާބަންކޯއިން ބުންޏެވެ.
މީގެ ކުރިން ވެސް ވިއްސާރަ މޫސުމާ ދިމާކޮށް މަދިރި ގިނަވުމުން އާބަންކޯއިން ފޮގު ކުރުމުގެ މަސައްކަތާއި މަދިރި އާލާވާ ފަދަ ތަންތަން ނައްތާލުމުގެ މަސައްްކަތް ކުރިއަށް ގެންދެ އެވެ. އެ ކޯޕަރޭޝަނުން ވަނީ ފޮގު ކުރާ ވަގުތުތަކުގައި މަގުމަތީ ދުއްވާ ފަރާތްތަކުން އެކަމަށް ސަމާލުވުމަށް އިލްތިމާސްކޮށްފަ އެވެ.
ފޮގު ކުރުމުގެ އިތުރުން ވެސް ފައިލޭރިއާ ބަލި ފެތުރުން ހުއްޓުވުމަށް އެޗްޕީއޭއާ ގުޅިގެން އާބަންކޯއިން ދަނީ ހުޅުމާލޭގައި ދިރިއުޅޭ ފަރާތްތައް އެ ބައްޔަށް ސްކްރީން ކުރުމުގެ މަސައްކަތް ކުރަމުންނެވެ. އެ ކޯޕަރޭޝަނުން ވަނީ މަދިރި އާލާވާ ސަރަހައްދުތަކަށް އާންމުން ނުދިޔުމަށް އިލްތިމާސްކޮށްފަ އެވެ.
ފައިލޭރިއާއަކީ ރާއްޖެއިން ނައްތާލާފައިވާ ބައްޔެކެވެ.
ނަމަވެސް ދުނިޔޭގެ އެއިޑްސް ދުވަސް ފާހަގަކުރުމުގެ ގޮތުން ކުޅުދުއްފުށީގައި ކުރިއަށް ގެންދިޔަ ސްކްރީނިން ޕްރޮގްރާމެެއްގެ ތެރެއިން ވަނީ އެބަލި ޖެހިފައި ތިބި މީހުންތަކެއް ދެނެގަނެވިފަ އެވެ. އެއަށް ފަހު ހުޅުމާލެ އާއި މާލެއިން ވެސް ވަނީ ފައިލޭރިއާ ޖެހިފައި ތިބި ބަޔަކު ދެނެގަނެވިފަ އެވެ.
އެ އެންމެންނަށް ވަނީ ފައިލޭރިއާ ބޭސް ދީފަ އެވެ. މިއީ ބަލި ޖެހިފައިވާ މީހާގެ ގައިން އެހެން މީހުންނަށް ބަލި ފެތުރުން ހުއްޓުވައިދޭ ބޭހެކެވެ.
އެޗްޕީއޭއިން ބުނީ ފައިލޭރިއާއަށް ޕޮޒިޓިވްވީ މީހުންނަކީ ފައިލޭރިއާ އާންމުކޮށް ފެންނަ "އެންޑެމިކް" ގައުމުތަކުން އައިސްފައިވާ މީހުން ކަމަށެވެ. މިހާތަނަށް ޕޮޒިޓިވްވީ މީހުންގެ ތެރޭގައި ހިމެނެނީ އިންޑިއާ އާއި ބަންގްލަދޭޝްއަށް ނިސްބަތްވާ މަސައްކަތްތެރިިންނެވެ.
