ރައީސް ޑރ. މުހައްމަދު މުއިއްޒުގެ ކެބިނެޓުގައި ހިމެނޭ ލޯކަލް ގަވަމެންޓު މިނިސްޓަރު އާދަމް ޝަރީފަށް ރައްޔިތުންގެ މަޖިލީހުން ރުހުން ދޭން ޖެހޭ ސަބަބެއް ނުފެންނަ ކަމަށް މަޖިލީހުގެ މެޖޯރިޓީ ކޮންޓްރޯލްކުރާ އެމްޑީޕީގެ ޗެއާޕާސަން ފައްޔާޒު އިސްމާއިލު މިރޭ ވިދާޅުވެއްޖެ އެވެ.
ފައްޔާޒު މިހެން ވިދާޅުވީ ސަރުކާރަށް ފާޑުކިޔާ ބައެއް މީޑިއާތައް ބްލޮކް ކުރި މައްސަލައެއް ފެންމަތިވެފައި ވަނިކޮށް އޭނާގެ އެކްސް އެކައުންޓުން ކުރެއްވި ޕޯސްޓެއްގަ އެވެ. އެގޮތުން މިނިސްޓަރަށް ރުހުން ދޭން ނުޖެހޭ ކަމަށް ދެކޭ ތިން ސަަބަބެއް ފައްޔާޒު ލިޔުއްވާފައިވެ އެވެ.
"ޑިފެންސްގަ ހުއްނެވިއިރު މަޖްލީހުގެ ތާރީހުގަ އަލަށްސިފައިން ވައްދާ މެމްބަރުންނަށް އަނިޔާކުރެއްވި. މިހާރު ކޭމް މެދުވެރިކޮށް ހިޔާލުފާޅުކުރުމުގެ މިނިވަންކަން ނައްތާލުމަށް މަސައްކަތް ފެއްޓެވީ. ލާމަރުކަޒީ ނިޒާމު ވެސް ފުށިދިއްގަރަށް، ރުހުން ދޭންޖެހޭ އެއްވެސް ސަބަބެއް ނުފެނޭ،" ފައްޔާޒު ލިޔުއްވާފައިވެ އެވެ.
ސަރުކާރުން ހަބަރު ސައިޓުތައް ބްލޮކު ކުރަން ފެށީ ރޭގަ އެވެ. އެގޮތުން ރަޖިސްޓްރީނުކޮށް ހިންގަމުން އައި ދެ ނޫހަކާއި ރަޖިސްޓްރީކޮށްފައިވާ ނޫހެއް މިހާތަނަށް ސަރުކާރުން ވަނީ ބްލޮކު ކޮށްފަ އެވެ.
ރާއްޖޭގައި އިންޓަނެޓުގެ ހިދުމަތް ދެނީ ތިން ކުންފުންޏެކެވެ. އެ ކުންފުނިތަކުގެ ހިދުމަތް ބޭނުންކުރާ ކަސްޓަމަރުންނަށް ވަކި ވެބްސައިޓަކަށް ނުވަދެވޭ ގޮތް ހަދަނީ ކޮމިއުނިކޭޝަން އޮތޯރިޓީ އޮފް މޯލްޑިވްސްއިން އެންގުމުންނެވެ. އެ އޮތޯރިޓީ މިވަގުތު އޮންނަނީ މިނިސްޓްރީ އޮފް ސިޓީސް, ލޯކަލް ގަވަމެންޓު އެންޑް ޕަބްލިކް ވޯކްސްގެ ދަށުން ހިންގާ އިދާރާއެއްގެ ގޮތުގަ އެވެ.
މިހާތަނަށް ރާއްޖޭގައި ހިންގާ އެންމެ ބޮޑު ބޯހިޔާވަހިކަމުގެ މަޝްރޫއު ސަރުކާރުން ފެށީ މި މަހުގެ 18 ގަ އެވެ. ލަންކާގެ ސީއެމްސީސީއަށް 70 ހެކްޓަރުގެ ބިން 99 އަހަރަށް ދީގެން ހިއްކާ މި ސަހަރުގައި 65،000 ހައުސިން ޔުނިޓު އެޅަމަށް ވަނީ ނިންމާފަ އެވެ. ގިނަ ބަޔަކު ދެކޭ ގޮތުގައި މިއީ މާލެ ސަރަހަށްދަށް މުޅި ރާއްޖޭގެ އާބާދީ މަރުކަޒު ކުރުމަށް ހިންގާ މަޝްރޫއެކެވެ.
ފައްޔާޒު ދެން އެ ފާހަގަކުރައްވާ ހާދިސާ ހިނގާފައިވަނީ ޕީޕީއެމްގެ ވެރިކަމުގަ އެވެ. ރައްޔިތުންގެ މަޖިލީހުގެ ރައީސްގެ މަގާމު އަދާކުރެއްވި އަބްދުﷲ މަސީހުގެ އިތުބާރު ނެތްކަމުގެ މައްސަލަ ހިނގަނިކޮށް ސިފައިން ވަދެ އިދިކޮޅުގެ 13 މެންބަރަކު މަޖިލީހުން ނެރުނެވެ. އެކަމާ ގުޅިގެން އޭރުގެ ސަރުކާރަށް ބައިނަލްއަގުވާމީ މަޝްރަހުން ބޮޑެތި ފާޑުކިޔުންތަކެއް އަމާޒުވި އެވެ.
ރައީސް މުއިއްޒުގެ 22 މެންބަރުންގެ ކެބިނެޓަށް ރުހުން ދިނުމުގެ މައްސަލަ އަދިވެސް އޮތީ މަޖިލީހުގަ އެވެ. މިދިޔަ ހަފުތާގެ ތެރޭގައި އެ މައްސަލަ ތަޅުމަށް ހުށަހެޅުނު ނަމަވެސް މިނިސްޓްރީތަކުގެ މެންޑޭޓު މަޖިލީހަށް ހުށަހަޅާފައި ނުވާތީ އަލުން އެ މައްސަލަ ވަނީ ކޮމިޓީއަށް ފޮނުވާލާފަ އެވެ.
