ރައީސް ޑރ. މުހައްމަދު މުއިއްޒުގެ މޭޔަރު ކަމުގައި މާލެ ސިޓީ ކައުންސިލުން ލިޔަން ޖެހޭ އިނގިރޭސި ސިޓީތައް ލިޔުމަށް މި ސަރުކާރުގެ އެމްބެސެޑާ އެޓް ލާޖު، މުހައްމަދު ހުސައިން ޝަރީފް (މުންދު) ގެ ކުންފުންޏަށް 561،000 ރުފިޔާ ދީފައިވާކަން ހާމަވެއްޖެ އެވެ.
މައުލޫމާތު ހޯދައި ލިބިގަތުމުގެ ހައްގުގެ ދަށުން "އަދަދު" އިން ހުށަހެޅި ހުށަހެޅުމަށް ސިޓީ ކައުންސިލުން ވަނީ އެ އިދާރާގެ ކޮންސަލްޓެންޓުގެ ތަފުސީލުތައް ހާމަކޮށްފަ އެވެ.
މައުލޫމާތު ފެތުރުމަށާއި, ސިޓީ ކައުންސިލް ބޭނުންތަކަށް އިނގިރޭސި ބަހުން ލިޔަން ޖެހޭ ލިޔުންތައް ލިޔުމުގެ މަސައްކަތް ސިޓީ ކައުންސިލުން ހަވާލުކޮށްފައިވަނީ ކިންގްސް ކޮންސަލްޓިން ޕްރައިވެޓް ލިމިޓެޑް ކިޔާ ކުންފުންޏަކާ އެވެ.
އެ ކުންފުނީގެ ވެބްސައިޓުން އެނގުނު ގޮތުގައި އެއީ ރައީސް މުއިއްޒުގެ ސަރުކާރުގައި މިނިސްޓަރެއްގެ ފެންވަރުގައި އެމްބެސެޑާ އެޓް ލާޖުގެ މަގާމަށް އައްޔަނުކުރައްވާފައިވާ މުހައްމަދު ހުސައިން ޝަރީފް (މުންދު) ގެ ކުންފުންޏެކެވެ.
"އަދަދު" ނޫހުން އިކޮނޮމިކް މިނިސްޓްރީގެ ބިޒްނަސް ޕޯޓަލްއިން ބެލިބެލުމުން އެނގުނު ގޮތުގައި މި ކުންފުނީގެ ހިއްސާދާރުންގެ ގޮތުގައި ތިއްބެވީ މުންދު އާއި އިބްރާހިމް މުހައްމަދު އެވެ.
titledesc
އެ މަސައްކަތަށް ބަޔަކު ހޯދުމަށް ސިޓީ ކައުންސިލުން އިއުލާނުކޮށްފައިވަނީ ނޮވެމްބަރު 10، 2021 ގަ އެވެ. މުންދުގެ ކުންފުނި އިކޮނޮމިކް މިނިސްޓްރީގައި ރަޖިސްޓްރީ ކޮށްފައިވަނީ އޮކްޓޯބަރު 17، 2021 ގަ އެވެ.
މުންދުގެ އިތުރުން މި ސަރުކާރުގެ ސޯޝަލް އެންޑް ފެމިލީ ޑިވެލޮޕްމަންޓުގެ ސްޓޭޓް މިނިސްޓަރުގެ މަގާމުގައި ހުންނެވި އައިމަނަތު ހުސައިން ޝަރީފަކީ ވެސް އެ ކުންފުނީގައި މަސައްކަތް ކުރައްވާ ބޭފުޅެއް ކަމަށް ވެބްސައިޓުގައި ބުނެފައިވެ އެވެ.
ސިޓީ ކައުންސިލުން ދިން މައުލޫމާތުތަކަށް ބަލާއިރު މަހެއްގެ މައްޗަށް 10,078,500.00ރ. (ދިހަ މިލިއަން ހަތް ލައްކަ އައްޑިހަ ހަ ހާސް ރުފިޔާ) އެ ފަރާތްތަކަށް ސިޓީ ކައުންސިލުން ހޭދަކޮށްފައިވާނެ އެވެ. އޭގެ ތެރެއިން ބައެއް ކޮންޓްރެކްޓްތައް މިހާރު ނިމިފައިވާއިރު ބައެއް ކޮންސަލްޓަންޓުންގެ މަގާމުގައި ތިބި މީހުން ވަނީ ރައީސް މުއިއްޒުގެ ސަރުކާރުގެ އެކި ފަންތީގެ މަގާމުތަކަށް ހަމަޖައްސާފަ އެވެ.
