ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު ދައުލަތުގެ އިސްވެރިންގެ މުސާރަތައް ބޮޑުކުރަން އިއްޔެ ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކުރީ ސަރުކާރާއި އިދިކޮޅު ހިމެނޭހެން ބޮޑު ތިން ޕާޓީން ވޯޓު ދީގެންނެވެ.
އެ ކޮމިޓީގެ އިއްޔެ ބައްދަލުވުމުގައި އެމްޑީޕީ، ޕީއެންސީ، އަދި ދަ ޑިމޮކްރެޓްސް އިން މުސާރަތައް ބޮޑުކުރުމާ އެއްްކޮޅަށް ވަނީ ވޯޓު ދީފަ އެވެ.
އިސްލާހަށް ތާއީދުކޮށް ވޯޓު ދެއްވި މެމްބަރުން
އެމްޑީޕީ
- ދާންދޫ ދާއިރާގެ ޔައުގޫބު އަބްދުﷲ
- ހަނިމާދޫ ދާއިރޭގެ އަބްދުލްގަފޫރު މޫސާ
- ދިއްދޫ ދާއިރާގެ އަބްދުﷲ ވަހީދު
- ކުޅުދުއްފުށި އުތުރު ދާއިރާގެ ޔާސިރު އަބްދުއްލަތީފު
- މަތިވެރި ދާއިރާގެ ހަސަން ޒަރީރު
- ފުވައްމުލަކު ދެކުނު ދާއިރާގެ މުހައްމަދު މުމްތާޒު
- ފުވައްމުލަކު މެދު ދާއިރާގެ ހުސައިން މުހައްމަދުދީދީ
ދަ ޑިމޮކްރެޓްސް
- ވިލުފުށި ދާއިރާގެ ހަސަން އަފީފު
ޕީއެންސީ
- ފޮނަދޫ ދާއިރާގެ މޫސާ ސިރާޖު
އިއްޔެ ބައްދަލުވުމުގައި ސަރުކާރު ކޯލިޝަނުން ބައިވެރިވެވަޑައިގެންނެވި ހަމައެކަނި މެމްބަރު، ފޮނަދޫ ދާއިރާގެ މެމްބަރު މޫސާ ސިރާޖު ވަނީ ވޯޓު ދެއްވުމުގެ އިތުރުން މި އިސްލާހަށް ތާއީދުކުރައްވާ ބައްދަލުވުމުގައި ވާހަކަ ވެސް ދެއްކެވި އެވެ.
އެގޮތުން މުސާރަތައް ބޮޑުކުރުމަކީ ކޮންމެހެން ވެސް ކުރަންޖެހޭ ބޭނުންތެރި އިސްލާހެއް ކަމަށް ސިރާޖު ވިދާޅުވި އެވެ.
އެ ބައްދަލުވުމުގައި ޑިމޮކްރެޓްސްއަށް ނިސްބަތްވާ ހުޅުދޫ ދާއިރާގެ މެމްބަރު އިލްޔާސް ލަބީބު ބައިވެރިވި ނަމަވެސް އޭނާ ވަނީ ވޯޓަށް އެހުމުގެ ކުރިން ބައްދަލުވުން ދޫކުރައްވާފަ އެވެ.
މާލިއްޔަތު ކޮމިޓީގެ އިއްތިފާގުން ވަނީ މަޖިލިސް މެމްބަރުންގެ މުސާރަ 80،000ރ. އަށް ބޮޑުކުރަން ފާސްކޮށްފަ އެވެ. އެ ބަދަލާއެކު މެމްބަރުންނަށް ކުރިއެކޭ އެއްގޮތަށް ކޮމިޓީ އެލަވަންސް ވެސް ލިބޭނެ އެވެ. އެހެން ކަމުން ކޮމިޓީ އެލަވަންސަށް ދޭ 20،000ރ. ހިމަނައިގެން މެމްބަރެއްގެ މުސާރައިގެ ގޮތުގައި 100،000ރ. ޖެހެ އެވެ.
އަދި، މާލިއްޔަތު ކޮމިޓީން މިއަދު ފާސްކޮށްފައިވަނީ، ރައީސުލްޖުމްހޫރިއްޔާގެ މުސާރަ 120،000ރ. އަށް ބޮޑުކޮށް ނައިބު ރައީސްގެ މުސާރަ 93،000ރ. އަށް ބޮޑު ކުރުމަށްވެސް ކޮމިޓީން ފާސްކުރި އެވެ. އަދި ވަޒީރުންގެ މަޖިލީހުގެ މެމްބަރުންގެ މުސާރަ 66،000ރ. އިން 74،000ރ. އަށް ބޮޑުކުރުމަށް ވެސް ވަނީ ފާސްކޮށްފަ އެވެ.
މިގޮތަށް ފާސްކުރުމާއެކު ރައީސް ޑރ. މުހައްމަދު މުއިއްޒު ވަނީ ދައުލަތުގެ ވެރިންގެ މުސާރަ ބޮޑުކުރަން ކޮމިޓީން ފާސްކުރީ ސަރުކާރާ މަޝްވަރާ ނުކޮށް ކަމަށާއި މުސާރައަށް އިތުރުވާ ބައި ނުނަންގަވާނެ ކަމަށް ވިދާޅުވެފަ އެވެ.
އަދި، ކޮމިޓީން ފާސްކުރި ރިޕޯޓާ ދެކޮޅަށް ތަޅުމުގައި ވޯޓު ދޭން ދަ ޑިމޮކްރެޓްސްއިން "ރެޑް" ތްރީ ލައިން ވިޕެއްވެސް ވަނީ މިއަދު ނެރެފަ އެވެ.
ނަމަވެސް، ރައީސްގެ ޕީއެންސީ އަދި ޑިމޮކްރެޓްސްއިންވެސް ކޮމިޓީގައި ވޯޓުދިނީ މުސާރަތައް ބޮޑުކުރުމާ އެއްކޮޅަށެވެ.
