ދިވެހިރާއްޖެ އާއި މޮރިޝަސްއާ ދެމެދު އިން ކަނޑައެޅުމުގެ މައްސަލައިގެ ތެރެއިން އެ ގައުމުގެ ބޮޑުވަޒީރަށް ކުރީގެ ރައީސް އިބްރާހިމް މުހައްމަދު ސޯލިހު ފޮނުއްވި ސިޓީ ސަރުކާރުން އާންމު ކުރަން ނިންމައިފި އެވެ.
އެނގިފައިވާ ގޮތުގައި މިއަދު 5:30 ގައި އެ ސިޓީ ރައީސުލްޖުމްހޫރިއްޔާގެ އޮފީހުން އާންމު ކުރާނެ އެވެ. އެފަދަ އިޝާރާތެއް ރައީސް އޮފީހުން ވެސް ވަނީ ދީފަ އެވެ. އެ އޮފީހުން ބުނީ "ކަޑުގެ ބައެއް ގެއްލިފައިވާ މައްސަލަ ރިވިއު ކުރުމަށް ދިވެހި ސަރުކާރުން ގެންދާ މަސައްކަތާ ގުޅޭ ބަޔާނެއް" މިއަދު ހާމަ ކުރާނެ ކަމަށެވެ.
"ދިވެހިރާއްޖޭގެ ކަނޑުގެ ބައެއް ގެއްލިފައިވާ މައްސަލަ ރިވިއު ކުރުމަށް ދިވެހި ސަރުކާރުން ކުރަމުންގެންދާ މަސައްކަތްތަކާ ގުޅޭގޮތުން ދެއްވާ ބަޔާނެއް މިއަދު 5:30 ގައި މި އޮފީހުން ހާމަކުރުމަށްވަނީ ހަމަޖެހިފައި. މި ބަޔާނުގެ ލައިވް ކަވަރޭޖް ޕީއެސްއެމް މެދުވެރިކޮށް ދުރަށް ފޮނުވާނެ. އަދި މި ބަޔާނުގެ ސޮފްޓް ކޮޕީ މީޑިއާ ގްރޫޕްގައި ހިއްސާކުރާނެ ވާހަކަ ދަންނަވަން،" ރައީސް އޮފީހުން މީޑިއާތަކަށް ފޮނުވި މެސެޖެއްގައި ބުނެފައިވެ އެވެ.
ބައިނަލްއަގްވާމީ ކޯޓަކުން ރާއްޖެ އާއި މޮރިޝަސްއާ ދެމެދު އިން ކަނޑައަޅަން ޖެހުނީ ޗާގޯސްއަކީ މޮރިޝަސްގެ ބައެއް ކަމަށް ކަމާބެހޭ ފަރާތްތަކުން ކަނޑައެޅުމުންނެވެ. ރާއްޖެއިން ކުރިން ވަކާލާތު ކުރަމުންދިޔައީ ޗާގޯސްއަކީ މޮރިޝަސްގެ ބައެއް ނޫން ކަމަށެވެ. އެކަމަކު ފަހުން ރާއްޖެއިން ދެކޭ ގޮތް ވަނީ ބަދަލުކޮށްފަ އެވެ.
އޯގަސްޓު 22، 2022 ގައި ކުރީގެ ރައީސް ސޯލިހު، މޮރިޝަސްގެ ބޮޑުވަޒީރު ޕްރަވިންދު ޖަގްނައުތަށް ފޮނުއްވި ސިޓީގައި، ރާއްޖޭގެ މަސްލަހަތާ ގުޅޭ ސިއްރު ބައެއް ކަންކަން ހުރި ކަމަށް އެއިރުގެ އިދިކޮޅު ފަރާތްތަކުން ބުންޏެވެ. އަދި އިދިކޮޅުން ގޮވާލަމުންދިޔައީ ސިޓީ އާންމު ކުރުމަށެވެ.
ނަމަވެސް ސަރުކާރުން ބުނީ އެ ސިޓީގައި ގައުމީ ސަލާމަތާ ގުޅޭ އެއްވެސް ވާހަކައެއް ނޯންނާނެ ކަމަށެވެ. ނަމަވެސް އެއް ވެރިއަކު އަނެއް ވެރިއަކަށް ފޮނުވާ އެފަދަ ސިޓީތަކުގެ ސިއްރު ހިފަހައްޓަންޖެހޭނީ އެ ސިޓީ އާންމު ކުރެވެން ނެތް ކަމަށް ސަރުކާރުން އެއިރު ބުނެފައިވެ އެވެ. އެކަމަކު، ނިމިދިޔަ ރިޔާސީ އިންތިހާބުގެ ކެމްޕެއިނުގެ ތެރޭގަައި އެ ސިޓީ ވަނީ ލީކުވެފަ އެވެ.
ލީކުވި ސިޓީގައި ރައީސް ސޯލިހު ވިދާޅުވެފައި ވަނީ ޗާގޯސްއަކީ މޮރިޝަސްގެ ބައެއް ކަމަށް އިންޓަނޭޝަނަލް ކޯޓް އޮފް ޖަސްޓިސް އިން ނިންމުމުން، އދ. ގެ އާންމު މަޖިލީހަށް ހުށަހަޅާފައިވާ މައްސަލައިގައި މޮރިޝަސްއާ އެއްކޮޅަށް ވޯޓު ދެއްވާނެ ކަމަށެވެ.
އޭގެ އިތުރުން، ރާއްޖެ މަގުން ޗާގޯސްއަށް ދަތުރު ކުރައްވަން ބޭނުންވެވަޑައިގެންފި ނަމަ މޮރިޝަސްގެ ބޮޑުވަޒީރަށް ދިވެހި ސަރުކާރުން އެހީތެރިވެދެއްވާނެ ކަމަށް ވެސް ރައީސް ސޯލިހު އެ ސިޓީގައި ވިދާޅުވެފައިވެ އެވެ.
